News Continuous Bureau | Mumbai
TMKOC Set Reality| ભારતીય ટેલિવિઝન ઇતિહાસનો સૌથી લોકપ્રિય કોમેડી શો ‘તારક મહેતા કા ઉલ્ટા ચશ્મા’ છેલ્લા ૧૫ વર્ષથી વધુ સમયથી દર્શકોના દિલ પર રાજ કરી રહ્યો છે. આ સીરિયલમાં બતાવવામાં આવતી ‘ગોકુલધામ સોસાયટી’ ટીવી સ્ક્રીન પર જેટલી સુંદર, ભવ્ય અને સાચી દેખાય છે, વાસ્તવિકતામાં તે તદ્દન અલગ છે. સોશિયલ મીડિયા પર ગોકુલધામ સોસાયટીનો એક આશ્ચર્યજનક બિહાઇન્ડધસીન્સ (BTS) વીડિયો જોરદાર વાયરલ થઈ રહ્યો છે. આ વીડિયોમાં સોસાયટીનું અસલી રૂપ જોઈને ચાહકો પણ ચોંકી ગયા છે, કારણ કે જે જેઠાલાલ ગડાના ઘર અને સોસાયટીને લોકો સાચી બિલ્ડિંગ સમજતા હતા, તે પાછળની બાજુથી માત્ર લોખંડના પતરાંથી બનેલી છે.
મુંબઈની ફિલ્મ સિટીમાં આવેલો છે આખો આલીશાન સેટ
ઇન્સ્ટાગ્રામ પર શેર કરવામાં આવેલો આ વીડિયો ઇન્ટરનેટ પર સનસનાટી મચાવી રહ્યો છે. વાસ્તવમાં, સીરિયલમાં દેખાતી ગોકુલધામ સોસાયટી કોઈ સાચી રહેણાંક ઇમારત નથી, પરંતુ મુંબઈના ગોરેગાવ સ્થિત ‘ફિલ્મ સિટી’ માં (Mumbai Film City) તૈયાર કરવામાં આવેલો એક વિશાળ સેટ છે. આ સેટને માત્ર આગળના ભાગથી જ પાકો બનાવવામાં આવ્યો છે, જેમાં બિલ્ડિંગની દીવાલો, બારીઓ અને બાલકનીઓ દેખાય છે. જો કે, આ દીવાલોની પાછળ કોઈ પાકા રૂમ કે ઘરો નથી, પરંતુ શૂટિંગના સાધનો રાખવા માટે પતરાંના હંગામી શેડ બનાવવામાં આવ્યા છે.
સોશિયલ મીડિયા પર વીડિયોને મળ્યા ૨૪ લાખથી વધુ વ્યુઝ
આ વાયરલ વીડિયોને અત્યાર સુધીમાં ૨૪ લાખથી વધુ વખત જોવામાં આવ્યો છે અને લાખો લોકોએ તેના પર લાઈક્સ અને કમેન્ટ્સ કરી છે. જેઠાલાલ, આત્મારામ તુકારામ ભિડે, અય્યર, બબિતાજી અને તારક મહેતાના ઘરની પાછળનું આ અસલી દ્રશ્ય જોઈને સોશિયલ મીડિયા યુઝર્સ વિવિધ પ્રકારની રમૂજી કમેન્ટ્સ કરી રહ્યા છે. કેટલાક લોકો મજાક ઉડાવતા લખી રહ્યા છે કે, “ભિડે ભાઈ, હવે સોસાયટીને ખરેખર કલર કામ અને સેનિટરી મેન્ટેનન્સની જરૂર છે.” તો વળી કેટલાક ચાહકો આ જગ્યાની મુલાકાત લેવા માટે ફિલ્મ સિટીનો સાચો સરનામો પૂછી રહ્યા છે.
માત્ર આઉટડોર શૂટિંગ જ સેટ પર થાય છે, ઇન્ડોર માટે અલગ સ્ટુડિયો
ટેકનિકલ દ્રષ્ટિએ જોઈએ તો, જ્યારે પણ પાત્રો સોસાયટીના કમ્પાઉન્ડમાં, અબ્દુલની દુકાને કે બાલકનીમાં ઉભા રહીને વાતો કરે છે, ત્યારે જ આ ફિલ્મ સિટીના સેટનો ઉપયોગ કરવામાં આવે છે. જેઠાલાલના ઘરની અંદરના દ્રશ્યો, હોલ, રસોડું કે બેડરૂમનું શૂટિંગ આ પતરાંની પાછળ નથી થતું, પરંતુ તેના માટે સ્ટુડિયોની અંદર અલગથી ચાર દીવાલોના ઇન્ડોર સેટ તૈયાર કરવામાં આવ્યા છે. ટીવી સ્ક્રીન પર કેમેરા એંગલ્સ અને અદભુત લાઈટિંગના કારણે આ સેટ એકદમ અસલી સોસાયટી જેવો આભાસ કરાવે છે, જે બોલિવૂડની ક્રિએટિવિટીનો એક ઉત્તમ નમૂનો છે.
👉 આ સમાચાર વાચો:
System Movie Review| હલી જશે આખી ‘સિસ્ટમ’! સોનાક્ષી સિન્હા અને જ્યોતિકાની દમદાર એક્ટિંગે જીત્યા દિલ, મુવી જોતા પહેલા વાંચી લો આ રીપોર્ટ
