ન્યુઝ કન્ટિન્યુઝ બ્યુરો
મુંબઈ, 21 ઑગસ્ટ, 2021
શનિવાર
અફઘાનિસ્તાન પર કબજો જમાવ્યા બાદ તાલિબાનના વીડિયો સોશિયલ મીડિયા પર વાયરલ થઈ રહ્યા છે. આવા જ એક વીડિયોમાં તાલિબાની આતંકીઓ બાળકો માટેના એમ્યુઝમેન્ટ પાર્કમાં એક રાઇડની મજા લેતા જોવા મળ્યા હતા. આ વીડિયોમાં તે હાથમાં હથિયારો સાથે ઇલેક્ટ્રિક બમ્પર કાર ચલાવી રહ્યા હતા. કેટલાક તાલિબાનીઓ કારને એકબીજા સાથે અથડાવતા જોવા મળ્યા હતા,જ્યારે કેટલાક સવારી કરતી વખતે મસ્તી કરતા જોવા મળ્યા હતા.
તાજેતરમાં જ સોશિયલ મીડિયા પર વધુ એક વીડિયો વાયરલ થયો છે, જેમાં આ એમ્યુઝમેન્ટ પાર્ક આગની જ્વાળાઓમાં ઘેરાયેલો નજરે પડે છે. આ પાર્કને તાલિબાનીઓએ આગના હવાલે કરી દીધો છે. આમ એક તરફ મહિલાઓને અધિકાર આપવાની વાત કરતા તાલિબાની આતંકીઓનો ચહેરો આ હરકત બાદ ફરી બેનકાબ થઈ ગયો છે.
સોશિયલ મીડિયા પર વીડિયો શૅર કરનાર ટ્વિટર યુઝરે દાવો કર્યો છે કે આ ક્લિપ શેબરઘનના બોખડી એમ્યુઝમેન્ટ પાર્કનો છે. ટ્વિટર યુઝરે આગળ કહ્યું કે મનોરંજન પાર્કને સળગાવવા માટે તાલિબાન દ્વારા ઉદ્ધત કારણ એ છે કે પાર્કની અંદર મૂર્તિઓ છે, જે ઇસ્લામી પ્રથાઓની વિરુદ્ધ છે.
