News Continuous Bureau | Mumbai
સામાન્ય રીતે ઓફિસ જવાનો અર્થ છે કે મહિનાના અંતે પગાર મળશે, પરંતુ ચીનમાં એક વિચિત્ર ટ્રેન્ડ જોવા મળી રહ્યો છે. અહીં યુવાનો નોકરી ન હોવા છતાં ઓફિસ જાય છે અને ત્યાં બેસવા માટે દરરોજ પૈસા ચૂકવે છે. આ ‘ફેક ઓફિસ ટ્રેન્ડ’ તરીકે ઓળખાય છે, જે ચીનમાં ઝડપથી ફેલાઈ રહ્યો છે. બીબીસીના એક રિપોર્ટ મુજબ, ચીનમાં યુવાનોનો બેરોજગારી દર 14% થી પણ વધુ છે. આ કારણોસર, મોટી સંખ્યામાં ભણેલા-ગણેલા યુવાનોને સારી નોકરી મળતી નથી, તેથી તેઓ આ નકલી ઓફિસ નો સહારો લઈ રહ્યા છે. ચીનના સમાજમાં બેરોજગાર હોવું શરમજનક માનવામાં આવે છે, તેથી યુવાનો બેરોજગારી છુપાવવા માટે આવું કરી રહ્યા છે.
પરિવાર અને સમાજને બતાવવા માટે ‘ફેક ઓફિસ’
ચીનના ડોંગગુઆન શહેરમાં 30 વર્ષીય શુઈ ઝોઉ રોજ સવારે 9 વાગ્યાથી રાત્રે 11 વાગ્યા સુધી ડેસ્ક પર બેસે છે. તેઓ ચા પીવે છે, સહકર્મીઓ સાથે વાત કરે છે અને મેનેજર સાથે પણ મોડે સુધી રોકાય છે. પરંતુ, વાસ્તવમાં ઝોઉ ત્યાં કામ કરવા નહીં, પરંતુ કામ કરવાનો ઢોંગ કરવા જાય છે. આ માટે તેઓ કંપનીને દરરોજ લગભગ 30 યુઆન (લગભગ ₹420) ચૂકવે છે. ઝોઉ નો ફૂડ બિઝનેસ ગયા વર્ષે નિષ્ફળ ગયો હતો. હવે તેઓ આ નકલી ઓફિસમાં બેસીને પોતાના માતા-પિતાને ફોટા મોકલે છે, જેથી તેમને લાગે કે તેમનો દીકરો નોકરી કરી રહ્યો છે. ઝોઉ કહે છે કે અહીં બધા ભેગા મળીને કામ કરે છે, વાતો કરે છે, ગેમ્સ રમે છે અને સાથે ડિનર પણ કરે છે, જેનાથી તેમને ખુશી મળે છે.
આ સમાચાર પણ વાંચો : Pakistan Bangladesh: પહેલા દાવત, પછી દોસ્તી અને હવે અપમાન: ઇશાક ડારના નિવેદનથી પાકિસ્તાન-બાંગ્લાદેશ સંબંધોમાં તણાવ, જાણો સમગ્ર મામલો
શા માટે યુવાનો આવું કરી રહ્યા છે?
શાંઘાઈની 23 વર્ષીય શિયાઓવેન ટાંગ જણાવે છે કે તેમની યુનિવર્સિટીએ ડિગ્રી માટે નોકરી અથવા ઇન્ટર્નશીપના પ્રમાણપત્રની માંગણી કરી હતી. આ કારણે તેમણે એક મહિના માટે ‘પ્રિટેન્ડ ઓફિસ’ની સીટ ભાડે લીધી. ત્યાં બેસીને તેમણે ઓનલાઇન નવલકથાઓ લખી અને યુનિવર્સિટીને ફોટા મોકલ્યા. આ અનોખા બિઝનેસના સંસ્થાપક છે ફેઈયુ, જેમણે કોરોના મહામારી દરમિયાન પોતાનો રિટેલ બિઝનેસ ગુમાવી દીધો હતો. તેમનું કહેવું છે કે તેઓ માત્ર ડેસ્ક કે વર્કસ્ટેશન નથી વેચી રહ્યા, પરંતુ યુવાનોને નિષ્ફળતાનો અહેસાસ ન થાય તે માટે તેમનું સન્માન વેચી રહ્યા છે.
કોણ કોણ આવે છે આ નકલી ઓફિસમાં?
બીબીસીના રિપોર્ટ મુજબ, આ નકલી ઓફિસમાં આવતા લોકોમાંથી 40% એવા યુવાનો છે જેઓ ડિગ્રી માટે નકલી ઇન્ટર્નશીપ પ્રમાણપત્ર બનાવી રહ્યા છે. બાકીના 60% ફ્રીલાન્સર છે, જેઓ ઓનલાઇન બિઝનેસ, ઇ-કોમર્સ અથવા લેખન જેવા કામો સાથે જોડાયેલા છે. અહીં આવનારા યુવાનોની સરેરાશ ઉંમર 30 વર્ષ છે અને સૌથી નાની ઉંમર 25 વર્ષ જણાવવામાં આવી છે.
