પરમાણુ હથિયાર મુદ્દે કોઈ સમજૂતી નહીં

 વ્હાઇટ હાઉસથી ફ્લોરિડા જવા રવાના થતી વખતે ટ્રમ્પે કહ્યું હતું કે, “અમે એવા પાગલોના હાથમાં પરમાણુ હથિયાર રહેવા ન દઈ શકીએ જેનો ઉપયોગ તેઓ સૌથી પહેલા ઈઝરાયેલ અને ત્યારબાદ મિડલ ઈસ્ટ તેમજ યુરોપ પર કરશે.” ટ્રમ્પના મતે પાકિસ્તાનની મધ્યસ્થતા દ્વારા આવેલો પ્રસ્તાવ સ્વીકારવા લાયક નથી. તેમણે દાવો કર્યો કે અમેરિકી સૈન્ય કાર્યવાહી અને B-2 બોમ્બર્સના ઉપયોગથી ઈરાનની નૌસેના અને વાયુસેનાની કમર તૂટી ગઈ છે.

હોર્મુઝ જલસંધિ અને વૈશ્વિક તેલ સંકટ

 28 ફેબ્રુઆરીથી શરૂ થયેલા અમેરિકા-ઈઝરાયેલ અને ઈરાન વચ્ચેના સંઘર્ષના કારણે હોર્મુઝ સ્ટ્રેટ (Hormuz Strait) બંધ થવાથી વૈશ્વિક ઉર્જા બજારમાં હાહાકાર મચ્યો છે. વિશ્વના 20% તેલ અને ગેસના પુરવઠાનો આ મુખ્ય માર્ગ હોવાથી ક્રૂડ ઓઈલની કિંમતો પ્રતિ બેરલ 100 ડોલરને પાર કરી ગઈ છે. 8 એપ્રિલે યુદ્ધવિરામ થયો હોવા છતાં તણાવ યથાવત છે, જેના કારણે વૈશ્વિક અર્થતંત્ર પર મંદીનું જોખમ તોળાઈ રહ્યું છે.

ઈરાનનો વળતો પ્રહાર અને કુટનીતિની તૈયારી

બીજી તરફ ઈરાનના વિદેશ મંત્રી અબ્બાસ અરાઘચીનું કહેવું છે કે જો વોશિંગ્ટન તેની ‘ધમકીભરી ભાષા’ છોડી દે તો તેઓ કુટનીતિ માટે તૈયાર છે. જોકે, ઈરાને તેની એર ડિફેન્સ સિસ્ટમ સક્રિય કરી દીધી છે અને કોઈપણ સંભવિત હુમલાનો જવાબ આપવા માટે સૈન્યને એલર્ટ પર રાખ્યું છે. અમેરિકી અધિકારીઓ હવે ઈરાન પર નાના પણ તીવ્ર હુમલાની શક્યતાઓની તપાસ કરી રહ્યા છે, જેમાં ઈઝરાયેલ પણ જોડાઈ શકે છે.