News Continuous Bureau | Mumbai
અમેરિકા અને ઈઝરાયેલ દ્વારા ઈરાનના વ્યૂહાત્મક ઉર્જા મથકો પર કરવામાં આવેલા હુમલા બાદ મધ્ય-પૂર્વમાં યુદ્ધ હવે નવા અને ભયાનક તબક્કામાં પ્રવેશ્યું છે. બુધવારે ઈરાનના વિશાળ ‘પાર્સ ગેસ ફિલ્ડ’ પર થયેલા હુમલાથી ઉશ્કેરાયેલા ઈરાને સાઉદી અરેબિયા અને કતર પર બેલેસ્ટિક મિસાઈલો છોડી છે. આ હુમલાઓને કારણે વૈશ્વિક તેલ બજારમાં ભારે ગભરાટ ફેલાયો છે અને ક્રૂડ ઓઈલની કિંમતોમાં 6% થી વધુનો ઉછાળો જોવા મળ્યો છે.
રિયાધમાં ધડાકા અને તેલના ભાવમાં ભડકો
સાઉદી અરેબિયાની રાજધાની રિયાધ બુધવારે રાત્રે મિસાઈલ હુમલાથી હચમચી ઉઠી હતી. જોકે, સાઉદી સંરક્ષણ પ્રણાલીએ ચાર મિસાઈલોને હવામાં જ તોડી પાડી હતી, પરંતુ આ ઘટનાને કારણે વૈશ્વિક બજારોમાં તેલના ભાવ પ્રતિ બેરલ ૧૧૦ ડોલર પર પહોંચી ગયા છે. ઈરાને ચેતવણી આપી છે કે જો તેના એનર્જી ઈન્ફ્રાસ્ટ્રક્ચર ને નિશાન બનાવવામાં આવશે, તો તે સાઉદી, યુએઈ અને કતરના તેલ મથકોને પણ નષ્ટ કરી દેશે.
આ સમાચાર પણ વાંચો : Trump’s Bold Move: ત્રીજા વિશ્વયુદ્ધના ભણકારા? ડોનાલ્ડ ટ્રમ્પ મધ્ય-પૂર્વમાં હજારો અમેરિકન સૈનિકો ઉતારવાની તૈયારીમાં, ઈરાન સાથે સીધી ટક્કરના સંકેત.
હોર્મુઝની સામુદ્રધુની બંધ થવાની ચેતવણી
ઈરાને પહેલેથી જ હોર્મુઝની સામુદ્રધુની બંધ કરવાની ધમકી આપી છે, જ્યાંથી વિશ્વનો ૨૦% તેલ અને ગેસ સપ્લાય પસાર થાય છે. ઈરાનનો દાવો છે કે આ માર્ગ અત્યારે ભારત અને તુર્કી જેવા મિત્ર દેશો માટે ખુલ્લો છે, પરંતુ અમેરિકા અને તેના સાથી દેશો માટે સંપૂર્ણપણે બંધ રહેશે. આ નાકાબંધીને કારણે અમેરિકામાં પણ ડીઝલના ભાવ ૨૦૨૨ પછી સૌથી ઉચ્ચ સ્તરે પહોંચી ગયા છે, જે રાષ્ટ્રપતિ ડોનાલ્ડ ટ્રમ્પ માટે મોટો રાજકીય પડકાર સાબિત થઈ રહ્યો છે.
પરમાણુ મથકો પર જોખમ અને ઈઝરાયેલનો એક્શન પ્લાન
ઈઝરાયેલની સેનાએ લેબનાન માં હિઝબુલ્લાહના ઠેકાણાઓ પર હુમલા તેજ કર્યા છે અને ઈરાનના બુશેહર પરમાણુ પ્લાન્ટ નજીક પણ મિસાઈલ હુમલો થયો હોવાના અહેવાલ છે. ટ્રમ્પનું કહેવું છે કે ઈરાનને કોઈપણ સંજોગોમાં પરમાણુ હથિયાર મેળવવા દેવામાં આવશે નહીં. બીજી તરફ, ઈરાને ઈઝરાયેલની ગુપ્તચર એજન્સી મોસાદ ના એક એજન્ટને ફાંસીની સજા ફટકારીને આ યુદ્ધને વધુ ઉગ્ર બનાવ્યું છે. આ સંઘર્ષને કારણે હવે વિશ્વના દેશો તેલ અને ગેસ માટે વૈકલ્પિક પાઇપલાઇન્સ પર નિર્ભર બની રહ્યા છે.
