News Continuous Bureau | Mumbai
Global Oil Markets on Edge| અમેરિકા અને ઈરાન વચ્ચે પશ્ચિમ એશિયા (મિડલ ઈસ્ટ) માં વધી રહેલા સૈન્ય તણાવની સીધી અસર હવે વૈશ્વિક બજારો પર જોવા મળી રહી છે. બંને દેશો વચ્ચે યુદ્ધ જેવા હાલાત પેદા થવા અને શાંતિ વાટાઘાટો ખોરવાઈ જવાની આશંકા વચ્ચે આંતરરાષ્ટ્રીય બજારમાં કાચા તેલ (ક્રૂડ ઓઈલ) ની કિંમતોમાં જોરદાર ઉછાળો નોંધાયો છે. આ સૈન્ય સંઘર્ષને કારણે આગામી દિવસોમાં વૈશ્વિક સ્તરે ઇંધણના ભાવ વધુ વધવાની શક્યતાએ રોકાણકારોની ચિંતા વધારી દીધી છે.
શરૂઆતી કારોબારમાં જ બ્રેન્ટ ક્રૂડ અને ડબલ્યુટીઆઈ (WTI) ના ભાવમાં 1 ટકાથી વધુનો વધારો
બુધવારે શરૂઆતી ટ્રેડિંગ દરમિયાન આંતરરાષ્ટ્રીય સ્તરે તેલના બેન્ચમાર્ક ગણાતા બ્રેન્ટ ક્રૂડ ની કિંમત 1.05 ડોલર એટલે કે 1.09 ટકા વધીને 97.05 ડોલર પ્રતિ બેરલ પર પહોંચી ગઈ હતી. બીજી તરફ, અમેરિકી બજારના વેસ્ટ ટેક્સાસ ઇન્ટરમીડિએટ (WTI) ક્રૂડના ભાવ પણ 1.01 ડોલર એટલે કે 1.08 ટકાની તેજી સાથે 94.77 ડોલર પ્રતિ બેરલ પર ટ્રેડ થઈ રહ્યા હતા. બજારના નિષ્ણાતોના મતે જો આ સ્થિતિ લાંબી ચાલશે તો ક્રૂડ ઓઈલ ટૂંક સમયમાં 100 ડોલરની સપાટી વટાવી શકે છે.
ઈરાનના મિસાઈલ પ્રહાર સામે અમેરિકાના વળતા હુમલા બાદ તેલ બજારમાં હલચલ મચી
તેલ બજારમાં આ અચાનક આવેલી તેજી એવા સમયે જોવા મળી છે જ્યારે ઈરાને કુવૈત અને બહેરીન તરફ શક્તિશાળી બેલિસ્ટિક મિસાઈલો અને સૈન્ય ડ્રોન દાગ્યા હતા. જો કે, અમેરિકી સેનાના જણાવ્યા મુજબ, યુએસ એર ડિફેન્સ સિસ્ટમે આ હુમલા નિષ્ફળ બનાવ્યા હતા. આ ઘટનાના જવાબમાં અમેરિકી દળોએ હોર્મુઝ સ્ટ્રેટ નજીક આવેલા ઈરાનના કેશ્મ ટાપુ (Qeshm Island) પર સૈન્ય કાર્યવાહી કરીને ઈરાની સેનાના ઠેકાણાઓને નિશાન બનાવ્યા હતા, જેના કારણે દરિયાઈ માર્ગે થતા તેલના સપ્લાય પર જોખમ ઊભું થયું છે.
હોર્મુઝ સ્ટ્રેટ જળમાર્ગ પર સંકટ યથાવત, શાંતિ કરારની વાટાઘાટો મુશ્કેલ બની
આ સૈન્ય અથડામણોએ અમેરિકા અને ઈરાન વચ્ચે યુદ્ધ રોકવા માટે ચાલી રહેલી સંભવિત શાંતિ વાટાઘાટોને મુશ્કેલ બનાવી દીધી છે. ઈરાની મીડિયાનું કહેવું છે કે છેલ્લા કેટલાક દિવસોથી બંને દેશો વચ્ચે કોઈ સીધો સંપર્ક થયો નથી, જ્યારે યુએસ પ્રમુખ ડોનાલ્ડ ટ્રમ્પ દાવો કરી રહ્યા છે કે બેકચેનલથી વાતચીત હજુ પણ ચાલુ છે. હાલમાં હોર્મુઝ સ્ટ્રેટ પર સુરક્ષા સંકટ ઘેરૂ બન્યું છે. દુનિયાના કુલ તેલ અને ગેસ વેપારનો મોટો હિસ્સો આ જ દરિયાઈ માર્ગેથી પસાર થાય છે, તેથી અહીં પેદા થતી અસ્થિરતા સીધી વૈશ્વિક ઉર્જા બજારને હચમચાવી રહી છે.
👉 આ સમાચાર વાચો:
USIran Tension Escalates| અમેરિકા અને ઈરાન વચ્ચે યુદ્ધ જેવી સ્થિતિ, કુવૈતમાં યુએસ આર્મી કેમ્પ પર મોટો હુમલો
