News Continuous Bureau | Mumbai
IndiaPakistan relations। ભારત અને પાકિસ્તાન વચ્ચે ‘ઓપરેશન સિંદૂર’ ને એક વર્ષ વીતી ગયું છે. સત્તાવાર રીતે બંને દેશો વચ્ચે કોઈ સંપર્ક નથી, પરંતુ પડદા પાછળ વાતચીતનો રસ્તો ખોલવાના પ્રયાસો તેજ થયા છે. મીડિયા અહેવાલો મુજબ, પાછલા ત્રણ મહિનામાં ભારત અને પાકિસ્તાનના નિવૃત્ત સેના જનરલો અને રાજદ્વારીઓ વચ્ચે ઓછામાં ઓછી બે ગુપ્ત બેઠકો યોજાઈ છે.
ક્યાં અને કેમ યોજાઈ આ ગુપ્ત બેઠકો?
આ બેઠકો કતાર અને એશિયાના અન્ય એક દેશની રાજધાનીમાં યોજાઈ હોવાનું કહેવાય છે. જોકે આ મુલાકાતો ઔપચારિક નથી, પરંતુ તેનો હેતુ બંને દેશો વચ્ચે સંવાદનો એક ‘બેક-ચેનલ’ માર્ગ ખુલ્લો રાખવાનો છે. રાષ્ટ્રીય સુરક્ષા સલાહકાર (NSA) અજીત ડોભાલના કાર્યાલય અને રાષ્ટ્રીય સુરક્ષા પરિષદ સચિવાલયને આ વાતચીત અંગે માહિતગાર કરવામાં આવ્યા છે. મુખ્ય ઉદ્દેશ્ય ભવિષ્યમાં કોઈ સંભવિત આતંકી હુમલાની સ્થિતિમાં તણાવને કાબૂની બહાર જતો રોકવાનો છે.
પાકિસ્તાનનું બદલાયેલું સમીકરણ
હાલમાં પાકિસ્તાનના સૈન્ય પ્રમુખ ફિલ્ડ માર્શલ આસિમ મુનીરની પકડ મજબૂત થઈ છે અને તેમને અમેરિકી રાષ્ટ્રપતિ ડોનાલ્ડ ટ્રમ્પનું સમર્થન પ્રાપ્ત હોવાનું મનાય છે. વધુમાં, પાકિસ્તાને તાજેતરમાં જ લેફ્ટનન્ટ જનરલ મોહમ્મદ આસિમ મલિકને નવા NSA તરીકે નિયુક્ત કર્યા છે, જેઓ ISI પ્રમુખ પદ પણ સંભાળી રહ્યા છે. આ સ્થિતિમાં, જો કોઈ નવી અનિચ્છનીય ઘટના બને, તો ભારત માટે આંતરરાષ્ટ્રીય સ્તરે પાકિસ્તાન પર દબાણ લાવવું પડકારજનક બની શકે છે, તેથી સીધા સંવાદની વ્યવસ્થા જરૂરી બની છે.
આતંક અને વાતચીત સાથે નહીં પણ…
ભારતની આ ઘોષિત સ્થિતિ છે કે ‘આતંકવાદ અને વાતચીત સાથે ન ચાલી શકે’. જોકે, આ ગુપ્ત વાતચીતને એક કટોકટી વ્યવસ્થા તરીકે જોવામાં આવી રહી છે, જેથી ભારત સરકાર સીધી પાકિસ્તાની નેતૃત્વ સાથે કટોકટીના સમયે વાત કરી શકે. અગાઉ ૨૦૧૫ થી ૨૦૧૮ વચ્ચે પણ NSA ડોભાલે બેંગકોકમાં પાકિસ્તાની સમકક્ષો સાથે આવી બેઠકો કરી હતી. વર્તમાનમાં માત્ર સાપ્તાહિક હોટલાઈન જ સંપર્કનું એકમાત્ર માધ્યમ છે, જેને હવે વધુ વ્યાપક બનાવવાની કોશિશ થઈ રહી છે.
👉 આ સમાચાર વાચો:
New CDS of India 2026। દેશને મળ્યા નવા ચીફ ઓફ ડિફેન્સ સ્ટાફ લેફ્ટનન્ટ જનરલ એન. એસ. રાજા સુબ્રમણિ સંભાળશે કમાન, જાણો કેવું રહ્યું તેમનું કરિયર
