News Continuous Bureau | Mumbai
Diego Garcia Missile Attack પશ્ચિમ એશિયામાં ચાલી રહેલું યુદ્ધ હવે મધ્ય-પૂર્વની સીમાઓ વટાવીને હિંદ મહાસાગર સુધી પહોંચી ગયું છે. વોલ સ્ટ્રીટ જર્નલના અહેવાલ મુજબ, ઈરાને હિંદ મહાસાગરમાં સ્થિત અમેરિકા અને બ્રિટનના સંયુક્ત મિલિટરી બેઝ ‘ડિએગો ગાર્સિયા’ પર બે મધ્યમ અંતરની બેલિસ્ટિક મિસાઈલો દાગી છે. આ હુમલાએ અમેરિકી સંરક્ષણ નિષ્ણાતોને ચિંતામાં મૂકી દીધા છે, કારણ કે આ સ્થળ ઈરાનથી અંદાજે ૪,૦૦૦ કિલોમીટર દૂર છે.
ઈરાનની મિસાઈલ શક્તિ: ૨ હજાર કિમીનો દાવો પોકળ સાબિત થયો
અત્યાર સુધી ઈરાન એવો દાવો કરતું હતું કે તેની મિસાઈલોની મારક ક્ષમતા માત્ર ૨,૦૦૦ કિલોમીટર સુધી મર્યાદિત છે. જોકે, ૪,૦૦૦ કિમી દૂર આવેલા ડિએગો ગાર્સિયા પર હુમલો કરીને ઈરાને સાબિત કર્યું છે કે તેની પાસે લાંબા અંતરની મારક ક્ષમતા ધરાવતી મિસાઈલો છે. જોકે, સૂત્રોના જણાવ્યા મુજબ, એક મિસાઈલમાં ટેકનિકલ ખામી સર્જાઈ હતી અને બીજી મિસાઈલને રોકવા માટે અમેરિકી યુદ્ધ જહાજે ‘SM-3 ઇન્ટરસેપ્ટર’ (SM-3 Interceptor) દાગ્યું હતું. આ હુમલામાં કોઈ જાનહાનિ કે નુકસાનના સમાચાર નથી.
રહસ્યોથી ઘેરાયેલું ટાપુ ‘ડિએગો ગાર્સિયા’
ડિએગો ગાર્સિયા હિંદ મહાસાગરમાં આવેલું એક નાનું પણ અત્યંત મહત્વનું વ્યૂહાત્મક ટાપુ છે. અહીં કોઈ કોમર્શિયલ ફ્લાઈટ આવતી નથી અને સામાન્ય લોકો માટે અહીં પ્રવેશવાની સખત મનાઈ છે. આ બેઝનો ઉપયોગ અમેરિકા અને બ્રિટન તેમના મિલિટરી ઓપરેશન્સ અને લોજિસ્ટિક્સ માટે કરે છે. પત્રકારોને પણ અહીં જવાની મંજૂરી મળતી નથી. આ ટાપુનું સંચાલન લંડન દ્વારા કરવામાં આવે છે, પરંતુ તે બ્રિટન અને મોરેશિયસ વચ્ચેના પ્રાદેશિક વિવાદનું કેન્દ્ર પણ છે.
આ સમાચાર પણ વાંચો : US Lift Iran Oil Sanctions: ‘બજારમાં તેલ-ગેસનો પુરવઠો થશે પૂર્વવત! હોર્મુઝની સામુદ્રધુનીમાં અવરોધ દૂર થવાના સંકેત; અમેરિકાની જાહેરાતથી ભારત સહિત અનેક દેશોને રાહત
ટ્રમ્પનો સૈન્ય અભિયાન સમેટવાનો સંકેત
આ હુમલાની વચ્ચે અમેરિકી રાષ્ટ્રપતિ ડોનાલ્ડ ટ્રમ્પે સંકેત આપ્યો છે કે અમેરિકા હવે ઈરાન વિરુદ્ધના પોતાના સૈન્ય અભિયાનને ‘સમેટવા’ પર વિચાર કરી રહ્યું છે. ટ્રમ્પે એમ પણ કહ્યું કે હોર્મુઝની સામુદ્રધુનીની દેખરેખ હવે અન્ય દેશોએ પણ કરવી પડશે. બીજી તરફ, ઈરાનની ઈસ્લામિક રિવોલ્યુશનરી ગાર્ડ કોર્પ્સ એ અમેરિકી દાવાઓને ફગાવી દીધા છે કે તેમના હુમલાઓએ ઈરાનની મિસાઈલ બનાવવાની ક્ષમતાને નષ્ટ કરી દીધી છે.
