News Continuous Bureau | Mumbai
US Iran Military Conflict| હોર્મુઝ સ્ટ્રેટમાં અમેરિકાના બે અપાચે હેલિકોપ્ટર તોડી પાડવામાં આવ્યા બાદ શરૂ થયેલો સૈન્ય સંઘર્ષ હવે સમગ્ર ખાડી ક્ષેત્રમાં ભયાનક રીતે ફેલાઈ ગયો છે. અમેરિકા દ્વારા ઈરાનના સૈન્ય ઠેકાણાઓ પર કરવામાં આવેલા હવાઈ હુમલાના જવાબમાં ઈરાનની ઇસ્લામિક રિવોલ્યુશનરી ગાર્ડ કોર્પ્સે બહેરીન, કુવૈત અને જોર્ડનમાં આવેલા અમેરિકી સૈન્ય મથકો પર મોટા પાયે બેલિસ્ટિક મિસાઈલ અને આત્મઘાતી ડ્રોન હુમલા કર્યાનો સત્તાવાર દાવો કર્યો છે. આ હુમલા બાદ સમગ્ર મિડલ ઈસ્ટ એટલે કે મધ્ય પૂર્વમાં યુદ્ધના વાદળો ઘેરાયા છે અને તમામ દેશોની એર ડિફેન્સ સિસ્ટમ સક્રિય થઈ ગઈ છે.
US Iran Military Conflict|બહેરીનમાં અમેરિકાના પ્રખ્યાત ફિફ્થ ફ્લીટ મુખ્યાલય પર મોટો પ્રહાર
ઈરાનના સૈન્ય સંગઠન આઈઆરજીસીના જણાવ્યા અનુસાર, તેમણે સૌથી મોટો પ્રહાર બહેરીનમાં તૈનાત અમેરિકી નૌસેનાના પ્રખ્યાત ફિફ્થ ફ્લીટ મુખ્યાલય પર કર્યો છે. સ્થાનિક સમય મુજબ વહેલી સવારે આશરે અઢી વાગ્યે ડ્રોન અને મિસાઈલો વડે આ સૈન્ય મથકને નિશાન બનાવાયું હતું. ઈરાની મીડિયાના અહેવાલો મુજબ, એક મિસાઈલ સીધી અમેરિકી સૈન્ય બેઝની અંદર જઈને ત્રાટકી હતી, જેના કારણે ત્યાં ભીષણ વિસ્ફોટ થયો હતો. હુમલા બાદ બહેરીનના ગૃહ મંત્રાલયે આખા દેશમાં ઈમરજન્સી સાયરન વગાડીને નાગરિકોને સુરક્ષિત સ્થાનો પર આશ્રય લેવાની અપીલ કરી હતી. સ્થાનિક સૂત્રોના મતે બહેરીનમાં ૧૬ થી વધુ પ્રચંડ ધડાકા સંભળાયા હતા.
US Iran Military Conflict|કુવૈતનું અલી અલ સલેમ એરબેઝ અને જોર્ડનની સરહદો ધ્રૂજી ઊઠી
ઈરાની સેનાએ કુવૈતમાં આવેલા અમેરિકી વાયુસેનાના અત્યંત મહત્વના મથક એવા અલી અલ સલેમ એરબેઝ પર પણ અંધાધુંધ ડ્રોન હુમલા કર્યા છે. હુમલા બાદ કુવૈતી સેનાએ સત્તાવાર નિવેદન જાહેર કરીને જણાવ્યું કે તેમની એર ડિફેન્સ સિસ્ટમ દુશ્મનના હવાઈ લક્ષ્યોને હવામાં જ તોડી પાડવા માટે સક્રિય થઈ ગઈ છે. બીજી તરફ, જોર્ડનની સેનાએ પણ દાવો કર્યો છે કે તેમણે ઈરાન તરફથી આવી રહેલી પાંચ મોટી મિસાઈલોને સફળતાપૂર્વક હવામાં જ ઇન્ટરસેપ્ટ કરીને નષ્ટ કરી દીધી છે, જે જોર્ડનના અલ-અજરાક વિસ્તાર તરફ વધી રહી હતી જ્યાં અમેરિકી સૈન્ય ગતિવિધિઓનું મુખ્ય કેન્દ્ર આવેલું છે. આ કાર્યવાહી દરમિયાન મિસાઈલનો કાટમાળ જમીન પર પડ્યો હતો પરંતુ કોઈ જાનહાનિ થઈ નથી.
US Iran Military Conflict| અમેરિકાના ૨૧ સૈન્ય મથકો ટાર્ગેટ પર, ઈરાને આપી મોટી ચેતવણી
ઈરાનની લશ્કરી પાંખ આઈઆરજીસીએ દાવો કર્યો છે કે તેમણે આ ઓપરેશન અંતર્ગત સમગ્ર ખાડી ક્ષેત્રમાં ફેલાયેલા અમેરિકી સેનાના કુલ ૨૧ એર અને નેવલ બેઝ એટલે કે હવાઈ અને નૌકાદળના મથકોને એકસાથે નિશાન બનાવ્યા છે. સંગઠને અમેરિકાને કડક શબ્દોમાં ચેતવણી આપી છે કે જો ઈરાનની ધરતી પર વધુ હુમલા કરવામાં આવશે, તો આનાથી પણ વધુ વિનાશક વળતો પ્રહાર કરવામાં આવશે. ઈરાનના વિદેશ મંત્રી અબ્બાસ અરાગચીનીએ પણ અમેરિકાને તાત્કાલિક ખાડી વિસ્તાર છોડી દેવાની સલાહ આપતા કહ્યું છે કે ઈરાન પોતાની સાર્વભૌમત્વની રક્ષા માટે કોઈપણ હદ સુધી જવા તૈયાર છે. સંરક્ષણ નિષ્ણાતોના મતે આ આંતરરાષ્ટ્રીય વિવાદ હવે એક મોટા પ્રાદેશિક યુદ્ધનું સ્વરૂપ લઈ રહ્યો છે.
👉 આ સમાચાર વાચો:
Uri Army Camp Grenade Blast। ઉરી આર્મી કેમ્પમાં મોટો ધડાકો, બે જવાન શહીદ! હેન્ડ ગ્રેનેડ ફાટતાં સેનામાં ભારે અરેરાટી, જાણો હુમલો છે કે અકસ્માત?
