News Continuous Bureau | Mumbai
અમેરિકા અને ઈરાન વચ્ચેના સંબંધો હવે નિર્ણાયક વળાંક પર છે. વ્હાઇટ હાઉસના અધિકારીઓ અને લશ્કરી વિશ્લેષકો માને છે કે બંને દેશો વચ્ચે મોટા પાયે સૈન્ય ટકરાવ ગમે તે ક્ષણે શરૂ થઈ શકે છે. ઈઝરાયેલના પૂર્વ લશ્કરી ગુપ્તચર વડા આમોસ યાદલિનના જણાવ્યા અનુસાર, યુદ્ધની શક્યતા પહેલા કરતા ઘણી વધી ગઈ છે. અમેરિકી રાષ્ટ્રપતિ ડોનાલ્ડ ટ્રમ્પ ઈરાનના વલણથી નારાજ છે અને તેમણે ‘તમામ વિકલ્પો ખુલ્લા છે’ તેવી ચેતવણી આપી છે.રિપોર્ટ મુજબ, જો હુમલો થશે તો તે પ્રતીકાત્મક નહીં હોય, પરંતુ ઈરાનના પરમાણુ ઠેકાણાઓ અને સૈન્ય સંસાધનોને નિશાન બનાવતું વ્યાપક અભિયાન હશે, જેમાં ઈઝરાયેલની પણ મોટી ભૂમિકા હોઈ શકે છે.
અમેરિકાની સૈન્ય ઘેરાબંધી અને ઈરાનની તૈયારી
અમેરિકાએ અત્યાધુનિક એફ-૨૨, એફ-૩૫ અને એફ-૧૬ લડાયક વિમાનો મિડલ ઈસ્ટ તરફ રવાના કરી દીધા છે. બીજી તરફ, ઈરાને પણ પીછેહઠ કરવાને બદલે રશિયા સાથે ઓમાનના સમુદ્ર અને ઉત્તર હિંદ મહાસાગરમાં સંયુક્ત નૌકાદળ અભ્યાસની જાહેરાત કરી છે. ઈરાની રિવોલ્યુશનરી ગાર્ડ્સે હોર્મુઝની સામુદ્રધુનીમાં યુદ્ધાભ્યાસ શરૂ કરી દીધો છે, જે વૈશ્વિક તેલ પુરવઠા માટે અત્યંત મહત્વપૂર્ણ છે.
આ સમાચાર પણ વાંચો : Rashmika Vijay wedding: લગ્નની અટકળો વચ્ચે વિજય દેવરકોંડાનું ઘર રોશનીથી ઝળહળ્યું, રશ્મિકા મંદાના સાથેના વીડિયોએ જીત્યા દિલ
જીનીવા વાટાઘાટો નિષ્ફળ રહેવાના સંકેત
રાજદ્વારી સ્તરે જીનીવામાં અમેરિકા અને ઈરાન વચ્ચે પરમાણુ મંત્રણાનો બીજો રાઉન્ડ યોજાયો હતો. જોકે, અમેરિકી ઉપરાષ્ટ્રપતિ જેડી વેન્સે સ્પષ્ટ કર્યું છે કે તેહરાન હજુ પણ વોશિંગ્ટનની ‘રેડ લાઇન્સ’ સ્વીકારી રહ્યું નથી. અમેરિકાનું સ્ટેન્ડ સ્પષ્ટ છે કે તે ઈરાનને કોઈ પણ સંજોગોમાં પરમાણુ હથિયાર મેળવવા દેશે નહીં. આ મડાગાંઠ હવે યુદ્ધ તરફ દોરી જાય તેવા ચિહ્નો છે.
તેહરાન પાસે ધડાકાના અહેવાલથી ગભરાટ
બુધવારે તેહરાન પ્રાંતના પરંદ વિસ્તારમાં આગ અને ધડાકાના અવાજો સંભળાયા હોવાના અહેવાલોથી ભયનું વાતાવરણ સર્જાયું હતું. જોકે, ઈરાની મીડિયાએ તેને ઘાસમાં લાગેલી સામાન્ય આગ ગણાવી હતી. છતાં, જે રીતે ઈઝરાયેલમાં પણ નાગરિકો ઈરાન સાથેના સંભવિત ટકરાવની તૈયારી કરી રહ્યા છે, તે જોતા પશ્ચિમ એશિયા હાલમાં દારૂગોળાના ઢગલા પર બેઠેલું જણાય છે.
