News Continuous Bureau | Mumbai
Middle East War| મિડલ ઈસ્ટ (પશ્ચિમ એશિયા) માં ચાલી રહેલો સંઘર્ષ હવે સંપૂર્ણ મહાયુદ્ધના ભયાનક વળાંક પર પહોંચી ગયો છે. અમેરિકાના રાષ્ટ્રપતિ ડોનાલ્ડ ટ્રમ્પની સખત હિદાયત અને ચેતવણીને સરેઆમ અનસુની કરીને ઇઝરાયેલે ઈરાન પર બહુ મોટો જવાબી હુમલો કર્યો છે. ઇઝરાયેલી વાયુસેનાએ (IAF) મોડી રાત્રે ઈરાનના મધ્ય અને પશ્ચિમી વિસ્તારોમાં આવેલા વ્યૂહાત્મક સૈન્ય ઠેકાણાઓને નિશાન બનાવીને ભયાનક એરસ્ટ્રાઈક કરી છે. સોમવાર, ૮ જૂન ૨૦2૬ ના રોજ સામે આવેલા વૈશ્વિક અહેવાલો અનુસાર, આ સૈન્ય કાર્યવાહી બાદ સમગ્ર મિડલ ઈસ્ટમાં સ્થિતિ અત્યંત તણાવપૂર્ણ બની ગઈ છે.
એક્સ (X) પર ઇઝરાયેલી સેનાએ કરી સત્તાવાર પુષ્ટિ, તેહરાન અને ઇસ્ફહાનમાં પ્રચંડ ધડાકા
ઇઝરાયેલી સેનાએ (IDF) પોતાના સત્તાવાર સોશિયલ મીડિયા પ્લેટફોર્મ એક્સ (અગાઉનું ટ્વિટર) પર એક પોસ્ટ દ્વારા આ જવાબી એરસ્ટ્રાઈકની સત્તાવાર માહિતી આપી છે. આંતરરાષ્ટ્રીય ન્યૂઝ એજન્સી ના (AP) હવાલાથી ઈરાનના સરકારી ટીવીએ પણ પુષ્ટિ કરી છે કે રાજધાની તેહરાન (Tehran) ઉપરાંત ઇસ્ફહાન અને તબરીજ જેવા મોટા શહેરોમાં મોડી રાત્રે પ્રચંડ બોમ્બ ધડાકાના અવાજો સાંભળવા મળ્યા છે. હુમલાની ભયાનકતા અને ગંભીરતાને જોતાં ઈરાન સરકારે તાત્કાલિક ધોરણે તેહરાનમાં આવેલા ઇમામ ખુમેની ઇન્ટરનેશનલ એરપોર્ટની આસપાસનો તમામ એરસ્પેસ (હવાઈ ક્ષેત્ર) કાયમ માટે બંધ કરી દીધો છે અને તમામ વ્યાપારી ઉડાનો રદ કરી દીધી છે.
ટ્રમ્પની કૂટનીતિ નિષ્ફળ, નેતન્યાહૂને ફોન પર આપી હતી હુમલો ન કરવાની કડક સૂચના
આંતરરાષ્ટ્રીય મીડિયા હાઉસ ના અહેવાલ મુજબ, આ હુમલાના થોડા સમય પહેલા જ અમેરિકી રાષ્ટ્રપતિ ડોનાલ્ડ ટ્રમ્પે ઇઝરાયેલના વડાપ્રધાન બેન્જામિન નેતન્યાહૂ સાથે ફોન પર લાંબી વાતચીત કરી હતી. ટ્રમ્પે નેતન્યાહૂને બે ટૂંક શબ્દોમાં ચેતવણી આપી હતી કે તેઓ ઈરાન પર કોઈ પણ પ્રકારનો જવાબી હુમલો ન કરે, કારણ કે વોશિંગ્ટન ઈરાન સાથે એક મોટી શાંતિ ડીલ કરવાની ખૂબ જ નજીક છે. પરંતુ ઇઝરાયેલે પોતાના સૌથી મોટા વૈશ્વિક સાથી અને મદદગાર દેશ અમેરિકાના રાષ્ટ્રપતિના આ આદેશને સરેઆમ ફગાવી દીધો હતો. રિપોર્ટ અનુસાર, ટ્રમ્પે નેતન્યાહૂ પર દબાણ કર્યું હતું કે વ્હાઇટ હાઉસ દ્વારા લેવાયેલો છેલ્લો નિર્ણય જ આખરી ગણાશે, પરંતુ ઇઝરાયેલે પોતાની સૂરક્ષાનો હવાલો આપીને મિસાઈલ વર્ષા કરી દીધી હતી.
સીઝફાયરના ઉલ્લંઘનથી શરૂ થયો વિવાદ, અમેરિકાની મધ્યસ્થતાના પ્રયાસોને લાગ્યો મોટો ઝટકો
આ ભયાનક હુમલાના મૂળિયા થોડા દિવસ પહેલાની ઘટનાઓ સાથે જોડાયેલા છે. એપ્રિલની શરૂઆતમાં થયેલા નાજુક સીઝફાયર (યુદ્ધવિરામ) બાદ ઈરાને ઇઝરાયેલ પર મિસાઈલો દાગી હતી, જેનો તર્ક એવો હતો કે ઇઝરાયેલ લેબનોન પર સતત બોમ્બમારો કરી રહ્યું હતું. ઈરાનના તે હુમલાના જવાબમાં હવે ઇઝરાયેલે આ જવાબી પ્રહાર કર્યો છે. એક વરિષ્ઠ અમેરિકી અધિકારીના જણાવ્યા મુજબ, ટ્રમ્પ પ્રશાસને લેબનોનની રાજધાની બેરૂતમાં (Beirut) થયેલા હુમલા માટે પણ ઇઝરાયેલને લીલી ઝંડી આપી નહોતી. અમેરિકાના ઉપરાષ્ટ્રપતિ જેડી વેન્સ (JD Vance) લાંબા સમયથી ઈરાન સાથે કૂટનીતિક સમજૂતી માટે વાટાઘાટો ચલાવી રહ્યા હતા, પરંતુ ઇઝરાયેલ અને ઈરાન વચ્ચે શરૂ થયેલા આ સામસામે હુમલાના કારણે વૈશ્વિક શાંતિની તમામ આશાઓ પર પાણી ફરી વળ્યું છે અને આંતરરાષ્ટ્રીય શેરબજાર તેમજ તેલના ભાવોમાં પણ મોટો ઉછાળો આવવાની સંભાવના છે.
👉 આ સમાચાર વાચો:
IPL Transfer Buzz| મુંબઈ ઈન્ડિયન્સ છોડશે સૂર્યકુમાર યાદવ? સોશિયલ મીડિયા પર પુરાવો વાયરલ, આ ૨ ફ્રેન્ચાઇઝી ખરીદવા તૈયાર!
