News Continuous Bureau | Mumbai
ભારત અને અમેરિકા વચ્ચે વધતા વેપાર વિવાદ વચ્ચે એક ચોંકાવનારો ખુલાસો સામે આવ્યો છે. જર્મનીના એક અગ્રણી અખબાર ‘ફ્રેન્કફર્ટર ઓલ્ગેમાઇન ઝાઇતુંગ’ના અહેવાલ મુજબ, વડાપ્રધાન નરેન્દ્ર મોદીએ અમેરિકી રાષ્ટ્રપતિ ડોનાલ્ડ ટ્રમ્પના એકથી વધુ ફોન કોલ્સનો જવાબ આપ્યો નથી. આ ખુલાસો એવા સમયે થયો છે જ્યારે અમેરિકાએ ભારતીય ઉત્પાદનો પર વધારાના 25% ટેરિફ લાદવાની જાહેરાત કરી છે, જેના કારણે કુલ ટેરિફ 50% થઈ ગયો છે. ભારતે આ નિર્ણયને ‘અન્યાયી’ અને ‘ગેરવાજબી’ ગણાવીને તેનો સખત વિરોધ કર્યો છે.
ટ્રમ્પની આક્રમક રણનીતિ સામે ભારતનું મૌન
રિપોર્ટમાં દાવો કરવામાં આવ્યો છે કે રાષ્ટ્રપતિ ટ્રમ્પની વેપાર યુદ્ધની રણનીતિ એક ચોક્કસ પેટર્ન પર કામ કરે છે. તે પહેલા વેપાર ખાધ પર અસંતોષ વ્યક્ત કરે છે અને પછી ઉચ્ચ ટેરિફની ધમકી આપે છે. આ પછી, સામાન્ય રીતે વાટાઘાટો શરૂ થાય છે. આ પ્રક્રિયામાં ટ્રમ્પ ઘણીવાર ટેરિફ લાદતા પહેલા રાહત આપે છે અથવા લાદ્યા પછી વાટાઘાટો દ્વારા તેને ઘટાડે છે. જોકે, રિપોર્ટ મુજબ, ભારત આ રણનીતિથી ડર્યું નથી. લેખમાં કહેવામાં આવ્યું છે કે “અત્યાર સુધી, અમેરિકી રાષ્ટ્રપતિએ ટેરિફ વિવાદમાં તમામ પ્રતિસ્પર્ધીઓને હરાવ્યા છે. પરંતુ ભારત સાથે આવું નથી.”
આ સમાચાર પણ વાંચો : Trump Tariffs: ભારત પર 50% ટેરિફ ની વચ્ચે ટ્રમ્પ નો દાવો: ભારત અને પાકિસ્તાન વચ્ચેના તણાવને લઈને કહી આવી વાત
રશિયન તેલની ખરીદી મુદ્દે મતભેદ
અમેરિકા દ્વારા ભારતીય સામાન પર ટેરિફ લાદવાનું મુખ્ય કારણ રશિયા પાસેથી સબસિડીવાળા ભાવે તેલની ખરીદી છે. અમેરિકાનું માનવું છે કે આ ખરીદી રશિયાને યુક્રેન યુદ્ધ માટે ભંડોળ પૂરું પાડી રહી છે. જોકે, ભારતે આ આરોપોને સખત રીતે નકારી કાઢ્યા છે. ભારતે હંમેશા પોતાના રાષ્ટ્રીય હિતોને સર્વોચ્ચ રાખવાની વાત કરી છે. ભારતના વિદેશ મંત્રી એસ. જયશંકર અને ભૂતપૂર્વ અમેરિકી રાજદૂત એરિક ગાર્સેટી સહિત ઘણા લોકોએ એ પણ નોંધ્યું છે કે થોડા સમય પહેલા સુધી અમેરિકાએ જ ભારતને વૈશ્વિક ઊર્જા બજારને સ્થિર કરવા માટે રશિયન તેલ ખરીદવા પ્રોત્સાહિત કર્યું હતું.
ભારતીય નિકાસકારો પર સંભવિત અસર
અમેરિકા દ્વારા લાદવામાં આવેલા નવા 50% ટેરિફને કારણે ભારતીય નિકાસકારો (એક્સપોર્ટર્સ) માટે ચિંતા વધી છે. આ ટેરિફ બુધવારથી લાગુ થઈ ગયા છે, અને વેપાર અધિકારીઓ માની રહ્યા છે કે તાત્કાલિક કોઈ રાહત મળે તેવી શક્યતા નથી. વાણિજ્ય મંત્રાલયના એક અધિકારીએ જણાવ્યું કે ટેરિફથી પ્રભાવિત નિકાસકારોને સરકાર આર્થિક સહાય પૂરી પાડશે અને તેમને ચીન, લેટિન અમેરિકા અને મધ્ય પૂર્વ જેવા વૈકલ્પિક બજારોમાં વેપાર કરવા પ્રોત્સાહિત કરવામાં આવશે. આ પગલાં ભારતને અમેરિકા પરની નિર્ભરતા ઘટાડવામાં મદદ કરશે.
