News Continuous Bureau | Mumbai
Mojtaba Khamenei| ઇરાનના સુપ્રીમ લીડર અયાતુલ્લા અલી ખામૈનીના નિધન બાદ સત્તા સંભાળનાર તેમના પુત્ર મોજતબા ખામૈની હાલમાં ગંભીર સ્થિતિમાં છે. અહેવાલો મુજબ, અમેરિકા અને ઇઝરાયેલના સંયુક્ત હુમલા બાદ મોજતબા ગંભીર રીતે ઈજાગ્રસ્ત થયા છે અને છેલ્લા બે મહિનાથી ગુપ્ત રીતે તેમની સારવાર ચાલી રહી છે. 28 ફેબ્રુઆરીના રોજ થયેલી આ હવાઈ હુમલાની ઘટના બાદથી તેઓ જાહેરમાં સામે આવ્યા નથી.
ગંભીર ઈજાઓ અને સારવારનો દોર
મીડિયા ના અહેવાલ મુજબ, એર સ્ટ્રાઈકમાં મોજતબા ખામૈનીને ગંભીર ઈજાઓ પહોંચી હતી. તેમના એક પગની ત્રણ વખત સર્જરી કરવામાં આવી છે અને તેમને હવે આર્ટિફિશિયલ લેગ (Prosthetic) લગાવવાની તૈયારીઓ ચાલી રહી છે. એટલું જ નહીં, તેમના ચહેરા અને હોઠ પણ ગંભીર રીતે દાઝી ગયા હોવાથી તેમને બોલવામાં ભારે તકલીફ પડી રહી છે. ડોક્ટરોના જણાવ્યા અનુસાર, તેમને પ્લાસ્ટિક સર્જરીની પણ જરૂર પડી શકે છે.
ગુપ્ત ઠેકાણે સારવાર અને સુરક્ષા
ઇઝરાયેલના સતત ખતરાને ધ્યાનમાં રાખીને મોજતબા ખામૈનીના ઠેકાણાને અત્યંત ગુપ્ત રાખવામાં આવ્યું છે. ઇરાનના રાષ્ટ્રપતિ મસૂદ પેઝેશ્કિયાન, જે પોતે હાર્ટ સર્જન છે, અને આરોગ્ય મંત્રી સીધી રીતે તેમની સારવાર પર નજર રાખી રહ્યા છે. ઇરાનનું શાસન અત્યારે એક પ્રકારની અનિશ્ચિતતામાં છે અને વહીવટી સત્તા ઇસ્લામિક રિવોલ્યુશનરી ગાર્ડ્સ કોર્પ્સ (IRGC) ના હાથમાં હોવાનું માનવામાં આવે છે.
સંદેશા વ્યવહારની જૂની અને સુરક્ષિત પદ્ધતિ
મોજતબા ખામૈનીએ કાર્યભાર સંભાળ્યો ત્યારથી અત્યાર સુધી કોઈ પણ ઓડિયો કે વીડિયો સંદેશ જાહેર કર્યો નથી. તેઓ માત્ર લેખિત સંદેશાઓ દ્વારા જ જનતા સાથે સંવાદ સાધી રહ્યા છે. સુરક્ષાના કારણોસર, આ સંદેશાઓ હાથથી લખીને બંધ કવરમાં કુરિયર દ્વારા ગુપ્ત માર્ગે મોકલવામાં આવે છે. હાલમાં તેઓ દેશને એક કોર્પોરેટ બોર્ડની જેમ ચલાવી રહ્યા છે, જેમાં નિર્ણયો લેવા માટે તેઓ સેનાના જનરલોની સલાહ પર સંપૂર્ણપણે નિર્ભર છે.
👉 આ સમાચાર વાચો:
Today’s Horoscope : આજનો દિવસ:૨૪ એપ્રિલ ૨૦૨૬, શુક્રવાર, જાણો આપનું રાશિફળ
