News Continuous Bureau | Mumbai
Donald Trump અમેરિકાના રાષ્ટ્રપતિ ડોનાલ્ડ ટ્રમ્પે જાહેરમાં કહ્યું છે કે ઇઝરાયલના વડાપ્રધાન બેન્જામિન નેતન્યાહૂએ કતારમાં હમાસના નેતાઓ પર હુમલો કરતા પહેલા અમેરિકાને કોઈ જાણકારી આપી નહોતી. ટ્રમ્પે જણાવ્યું કે આ હુમલો સંપૂર્ણપણે ઇઝરાયલનો પોતાનો નિર્ણય હતો. ઓવલ ઓફિસમાં પત્રકારો સાથે વાત કરતા ટ્રમ્પે કહ્યું કે તેમને આ હુમલા અંગે કોઈ પૂર્વ જાણકારી નહોતી. તેમણે ભારપૂર્વક કહ્યું કે કતાર અમેરિકાનું એક મહત્વપૂર્ણ મિત્ર છે અને દોહાને ખાતરી આપી કે ઇઝરાયલ ભવિષ્યમાં કતાર પર કોઈ હુમલો નહીં કરે. ટ્રમ્પે દોહાની ભાગીદારીને ‘ખૂબ સારો સહયોગ’ ગણાવ્યો. આ દરમિયાન, ઇઝરાયલના વડાપ્રધાન કાર્યાલયે પણ પુષ્ટિ કરી કે કતારમાં થયેલો હુમલો ઇઝરાયલની સ્વતંત્ર કાર્યવાહી હતી, અને તેની સંપૂર્ણ જવાબદારી પણ લીધી છે.
અમેરિકાએ કતારને કરી અપીલ
અમેરિકાના વિદેશ મંત્રી માર્કો રુબિયોએ કહ્યું કે કતારે સંઘર્ષ ઉકેલવામાં એક સહયોગીની ભૂમિકા નિભાવવી જોઈએ. તેમણે કતારને ગાઝામાં બાકી રહેલા 48 બંધકોની મુક્તિમાં મદદ કરવા, હમાસના હથિયારો જમા કરાવવામાં સહયોગ આપવા અને ગાઝાના લોકોના સારા ભવિષ્ય માટે યોગદાન આપવા અપીલ કરી. રુબિયોએ ઇઝરાયલના વડાપ્રધાન નેતન્યાહૂ સાથે મળીને કતારને આ પ્રક્રિયામાં રચનાત્મક ભૂમિકા ભજવવા માટે પ્રોત્સાહિત કર્યા.
હમાસના નેતાઓને નિશાન બનાવતા રહીશું – નેતન્યાહૂ
ઇઝરાયલના વડાપ્રધાન નેતન્યાહૂએ કતારમાં થયેલા હુમલાની ટીકાને અવગણતા કહ્યું કે તેઓ ભવિષ્યમાં પણ હમાસના નેતાઓ પર ‘જ્યાં પણ હોય’ હુમલો કરતા અટકશે નહીં. તેમણે એમ પણ કહ્યું કે કતારમાં હાજર હમાસના નેતાઓને નિશાન બનાવવાથી ગાઝામાં યુદ્ધ સમાપ્ત કરવામાં અને તમામ બંધકોને મુક્ત કરવામાં સૌથી મોટી અડચણ દૂર થશે.
આ સમાચાર પણ વાંચો : Uttarakhand Disaster: ઉત્તરાખંડના સહસ્ત્રધારા માં ફાટ્યું વાદળ, રમકડાંની જેમ તણાઈ કાર, જાણો ક્યાં થયું કેટલું નુકશાન
હમાસના મુદ્દા પર પગલાં લેવા પડશે
જ્યારે ટ્રમ્પને પૂછવામાં આવ્યું કે શું તેઓ ઇઝરાયલના વડાપ્રધાન બેન્જામિન નેતન્યાહૂને કતારમાં હમાસના નેતાઓ પરના હુમલા અંગે કોઈ સંદેશ આપવા માંગે છે, ત્યારે ટ્રમ્પે કહ્યું કે તેમનો સંદેશ એ છે કે નેતન્યાહૂએ ખૂબ સાવચેત રહેવું જોઈએ અને હમાસના મુદ્દા પર કેટલાક પગલાં લેવા પડશે. તેમણે ફરી એકવાર કહ્યું કે કતાર અમેરિકાનું એક મહત્વપૂર્ણ સહયોગી રહ્યું છે. ન્યૂ જર્સીના મોરિસટાઉન એરપોર્ટ પર પત્રકારો સાથે વાતચીતમાં ટ્રમ્પે કતારના અમીર તમીમ બિન હમદ અલ થાનીની પ્રશંસા કરતા તેમને એક ‘શાનદાર વ્યક્તિ’ ગણાવ્યા.
