ન્યુઝ કન્ટીન્યુઝ બ્યુરો,
મુંબઈ
12 ડિસેમ્બર 2020
આજે દરેકના હાથમાં મોબાઈલ હોય છે અને મોટાભાગના લોકો ગુગલ મેપનો ઉપયોગ એક યા તો બીજા કામ માટે કરે જ છે. પછી તે કોઈ સ્થળ પર પહોંચવા માટે હોય, ટ્રાફિકની માહિતી માટે કે સારી હોટેલના રીવ્યુ ચેક કરવા હોય. પરંતુ, મોટાભાગના લોકોને ખબર જ નહીં હોતી કે આ બધી માહિતી ગુગલ મેપ પર આવે છે કેવી રીતે? કોણ એને મૂકે છે?
ગુજરાતના બે અલગારી યુવાનો ગુગલ માટે વોલેન્ટીયર તરીકે કામ કરી રહ્યા છે. નરેશ દરજી અને પ્રિયંકા ઉપાધ્યાય, ગુગલના લોકલ ગાઈડ તરીકે સેવા આપી રહ્યા છે. નરેશ દરજી ગુજરાત લોકલ ગાઈડ કોમ્યુનિટિ ચલાવે છે જેમા 200થી વધારે મેમ્બર છે. ગર્વની વાત એ છે કે આ બંન્નેએ ગુગલ ટોપ-50 લોકલ ગાઈડ 2018 સમિટમાં ગુજરાતનું પ્રતિનિધિત્વ કર્યું હતું અને ગુગલ દ્વારા તેમને કેલીફોર્નિયા આમંત્રિત કરવામાં આવ્યા હતા. નરેશ દરજીને શ્રેષ્ઠ કોમ્યુનિટિ બિલ્ડરનો એવોર્ડ મળ્યો તેમજ પ્રિયંકાને લોકલ બિઝનેસ ચેમ્પિયનનો એવોર્ડ મળ્યો છે
2015માં ગુગલ દ્વારા લોકલ ગાઈડ પ્રોગ્રામની શરૂઆત કરવામાં આવી હતી. જેમા સ્થાનિક લોકો તેમની આજુબાજુમાં આવેલા સ્થળોને મેપ પર મૂકી શકે છે. જેથી કરીને અન્ય લોકો સરળતાથી તેના વિશે માહિતી મેળવી શકે છે. સાથે જ ગુગલ દ્વારા તમને પોઈન્ટ પણ આપવામાં આવે છે. જેમા 1થી 10 લેવલ હોય છે. લેવલ 5 પાર કર્યા પછી તમે ગુગલ લોકલ ગાઈડની એન્યુલ સમિટ માટે અરજી કરી શકો છો. જો તમે સિલેક્ટ થયા તો તેઓ તમને ગુગલ હેડ ક્વાર્ટર ખાતે આમંત્રિત કરે છે. જેનો સંપૂર્ણ ખર્ચ ગુગલ ઉઠાવે છે. તેમજ વર્ષ દરમિયાન ગુગલ દ્વારા નાની મોટી પર્ક તેમજ ડીસ્કાઉન્ટ કુપનો પણ મળતી રહે છે.
