News Continuous Bureau | Mumbai
અમેરિકી રાષ્ટ્રપતિ ડોનાલ્ડ ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ પર એક અત્યંત મહત્વની જાહેરાત કરતા જણાવ્યું છે કે અમેરિકા ફરી એકવાર ‘રિયલ એનર્જી ડોમિનન્સ’ તરફ પરત ફરી રહ્યું છે. ટ્રમ્પે ટેક્સાસના બ્રાઉન્સવિલેમાં છેલ્લા ૫૦ વર્ષમાં અમેરિકાની પ્રથમ નવી ઓઈલ રિફાઈનરી શરૂ કરવાની જાહેરાત કરી છે. આ ૩૦૦ બિલિયન ડોલરનો સોદો અમેરિકાના ઇતિહાસનો સૌથી મોટો સોદો માનવામાં આવે છે.ટ્રમ્પે આ પ્રોજેક્ટમાં ભારતની સૌથી મોટી ખાનગી ઉર્જા કંપની રિલાયન્સ ના રોકાણની ખાસ નોંધ લીધી છે અને આ વિશાળ રોકાણ બદલ ભારતનો આભાર માન્યો છે. ટ્રમ્પના મતે, તેમની ‘અમેરિકા ફર્સ્ટ’ નીતિ, પરમિટ પ્રક્રિયામાં સરળતા અને ટેક્સમાં ઘટાડાને કારણે આટલા મોટા રોકાણો અમેરિકા પરત આવી રહ્યા છે.
વિશ્વની સૌથી સ્વચ્છ રિફાઈનરી બનશે
બ્રાઉન્સવિલે પોર્ટ પર નિર્માણ પામનાર આ રિફાઈનરી માત્ર અમેરિકાના બજારને ઈંધણ પૂરું પાડશે એટલું જ નહીં, પણ તે ‘વિશ્વની સૌથી સ્વચ્છ રિફાઈનરી’ હોવાનો દાવો પણ કરવામાં આવ્યો છે. આ પ્રોજેક્ટથી અમેરિકાની રાષ્ટ્રીય સુરક્ષા મજબૂત થશે અને ઉર્જા ઉત્પાદનમાં મોટો ઉછાળો આવશે. આ પ્લાન્ટ ગ્લોબલ એક્સપોર્ટ (નિકાસ) પાવર હાઉસ તરીકે કાર્ય કરશે, જે વિશ્વના અન્ય દેશોને પણ તેલની સપ્લાય કરવામાં મદદરૂપ થશે.
આ સમાચાર પણ વાંચો : India LPG Plan-B Success:ગેસ સંકટમાંથી ભારત ઉગર્યું! સરકારના ‘પ્લાન-બી’ થી LPG સપ્લાયમાં મોટો ઉછાળો; હવે નવા મિત્ર દેશો આપશે ભારતને સસ્તો ગેસ.
હજારો નોકરીઓ અને આર્થિક તેજી
દક્ષિણ ટેક્સાસના આ વિસ્તારમાં વર્ષોથી જે વિકાસની રાહ જોવાતી હતી, તે હવે આ પ્રોજેક્ટથી પૂરી થશે. ટ્રમ્પના જણાવ્યા અનુસાર, આ રિફાઈનરીથી હજારો નવી નોકરીઓ સર્જાશે અને પ્રદેશમાં અબજો ડોલરની આર્થિક અસરો જોવા મળશે. ખાસ કરીને અમેરિકી કામદારો માટે આ એક મોટી જીત સમાન છે. રિલાયન્સ જેવી દિગ્ગજ ભારતીય કંપનીનું અમેરિકામાં આટલું મોટું રોકાણ વૈશ્વિક ઉર્જા બજારમાં નવા સમીકરણો રચશે.
ભારત અને અમેરિકા વચ્ચે મજબૂત ઉર્જા ભાગીદારી
મિડલ ઈસ્ટમાં ચાલી રહેલા યુદ્ધ અને તેલના ભાવોમાં થતી અસ્થિરતા વચ્ચે અમેરિકામાં નવી રિફાઈનરીની શરૂઆત ભારત માટે પણ મહત્વની છે. રિલાયન્સની ટેકનિકલ કુશળતા અને અમેરિકાના સંસાધનો મળીને વિશ્વને તેલના નવા વિકલ્પો પૂરા પાડશે. ટ્રમ્પે સ્પષ્ટ કર્યું છે કે ‘અમેરિકા ફર્સ્ટ’ એજન્ડા હેઠળ તેઓ ઉર્જા ક્ષેત્રે વિશ્વ પર પ્રભુત્વ મેળવવા માંગે છે અને ભારત આ સફરમાં તેમનો મહત્વનો ભાગીદાર છે.
