News Continuous Bureau | Mumbai
ઈરાન અને અમેરિકા વચ્ચે ચાલી રહેલા ભીષણ સંઘર્ષને રોકવા માટે મધ્યસ્થી દેશોનો એક સમૂહ સક્રિય થયો છે. નવા રિપોર્ટ મુજબ, બંને પક્ષો ૪૫ દિવસના યુદ્ધવિરામની શરતો પર ચર્ચા કરી રહ્યા છે. આ સીઝફાયરને કાયમી શાંતિની દિશામાં એક મહત્વનું ડગલું માનવામાં આવી રહ્યું છે. જોકે, આ મંત્રણા એવા સમયે થઈ રહી છે જ્યારે અમેરિકી રાષ્ટ્રપતિ ડોનાલ્ડ ટ્રમ્પે ઈરાનને મંગળવાર રાત સુધીનું અલ્ટીમેટમ આપ્યું છે.
આગામી ૪૮ કલાક નિર્ણાયક: સંઘર્ષ ટાળવાની છેલ્લી તક
અમેરિકી, ઈઝરાયેલી અને પ્રાદેશિક સૂત્રોના જણાવ્યા અનુસાર, આગામી ૪૮ કલાકમાં કોઈ આંશિક સમજૂતી થવાની શક્યતા ઓછી છે, તેમ છતાં આ પ્રયાસને છેલ્લી તક માનવામાં આવે છે. જો આ વાટાઘાટો નિષ્ફળ જશે, તો ઈરાનના નાગરિક ઈન્ફ્રાસ્ટ્રક્ચર પર મોટા પાયે હુમલા થઈ શકે છે અને બદલામાં ઈરાન ખાડી દેશોની ઉર્જા અને જળ સુવિધાઓને નિશાન બનાવી શકે છે. આ સ્થિતિ આખા પ્રદેશમાં અસ્થિરતા લાવી શકે છે.
આ સમાચાર પણ વાંચો : Tehran Under Attack: તેહરાનમાં ભયાનક તબાહી: રહેણાંક વિસ્તારો અને યુનિવર્સિટી પર હુમલામાં ૧૩ના મોત, ગેસ સપ્લાય ઠપ થતા જનજીવન અસ્તવ્યસ્ત!
ટ્રમ્પની ‘નરક’ માં મોકલવાની ધમકી અને ડેડલાઈન
ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ’ પર ઈરાનને ખુલ્લેઆમ ધમકી આપી છે. તેમણે કહ્યું કે જો મંગળવાર રાત (ભારતીય સમય મુજબ બુધવાર સવાર) સુધીમાં હોર્મુઝની ખાડી ખોલવામાં નહીં આવે અને સમજૂતી નહીં થાય, તો ઈરાનમાં પાવર પ્લાન્ટ અને પુલો સુરક્ષિત રહેશે નહીં. ટ્રમ્પે સ્પષ્ટ કર્યું છે કે જો સમજૂતી નહીં થાય તો તેઓ ‘બધું જ ઉડાવી દેવા’ માટે તૈયાર છે.
ઈરાનનો વળતો પ્રહાર: ‘વિનાશક જવાબ આપીશું’
ઈરાનની કેન્દ્રીય સૈન્ય કમાન્ડ દ્વારા સોમવારે એક નિવેદન બહાર પાડીને ટ્રમ્પની ધમકીનો જવાબ આપવામાં આવ્યો છે. ઈરાને કહ્યું કે જો પ્રતિસ્પર્ધી દેશોએ તેના નાગરિક ઠેકાણાઓને નિશાન બનાવ્યા, તો તે અત્યંત વિનાશક જવાબ આપશે. ઈરાન અત્યારે મધ્યસ્થીઓ દ્વારા ૪૫ દિવસના યુદ્ધવિરામ માટે અંતિમ પ્રયાસ કરી રહ્યું છે, જેથી હોર્મુઝ સ્ટ્રેટ ફરીથી ખોલી શકાય અને યુદ્ધને અટકાવી શકાય.
