News Continuous Bureau | Mumbai
US-Iran Conflict:અમેરિકા અને ઈરાન વચ્ચે ચાલી રહેલી શાંતિ વાટાઘાટો નિષ્ફળ રહ્યા બાદ પશ્ચિમ એશિયામાં ફરી એકવાર યુદ્ધના વાદળો ઘેરાયા છે. ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC) ની નૌકાદળ દ્વારા હોર્મુઝની સામુદ્રધૂની ને લઈને કડક ચેતવણી જાહેર કરવામાં આવી છે. ઈરાને સ્પષ્ટ શબ્દોમાં જણાવ્યું છે કે આ વિસ્તારમાં ‘દુશ્મન’ ની કોઈ પણ ખોટી હરકત તેમના માટે જાનલેવા સાબિત થઈ શકે છે.ઈરાની નૌકાદળ દ્વારા સોશિયલ મીડિયા પર આ ચેતવણી સાથે હોર્મુઝ સ્ટ્રેટમાં ચાલી રહેલી હિલચાલના ડ્રોન ફૂટેજ પણ શેર કરવામાં આવ્યા છે, જે દર્શાવે છે કે ઈરાન આ રસ્તા પર પેની નજર રાખી રહ્યું છે.
હોર્મુઝ પર ઈરાનના સશસ્ત્ર દળોનો કબજો
IRGC ની નૌકાદળે દાવો કર્યો છે કે હોર્મુઝમાં થતી તમામ હિલચાલ અને જહાજોના થોભવા પર ઈરાની સશસ્ત્ર દળોનું સંપૂર્ણ નિયંત્રણ છે. અમેરિકી સેન્ટ્રલ કમાન્ડ દ્વારા તાજેતરમાં દાવો કરવામાં આવ્યો હતો કે બે અમેરિકી વોરશીપ (યુએસએસ માઈકલ મર્ફી અને યુએસએસ ફ્રેન્ક ઈ. પીટરસન) હોર્મુઝમાંથી પસાર થયા હતા અને તેમણે ત્યાંથી વિસ્ફોટક સુરંગો હટાવવાનું અભિયાન શરૂ કર્યું છે. જોકે, ઈરાને આ દાવાને નકારી કાઢતા તેને માત્ર ‘પબ્લિસિટી સ્ટંટ’ ગણાવ્યો છે.
આ સમાચાર પણ વાંચો : Trump Effect on Oil Prices:ટ્રમ્પનો ‘પાવર પ્લે’ અને જનતાની હાલત કફોડી! તેલના ભાવ વધવાના સંકેતથી આખું વિશ્વ ચિંતામાં, ભારત પર શું થશે અસર?
અમેરિકી જહાજોને પીછેહઠ કરવાની ફરજ પડી: ઈરાન
ઈરાનના સરકારી ટીવીના અહેવાલ મુજબ, અમેરિકી યુદ્ધ જહાજોએ હોર્મુઝમાં પ્રવેશવાનો પ્રયાસ કર્યો હતો, પરંતુ ઈરાની નૌકાદળના કડક વલણને કારણે તેમને પીછેહઠ કરવાની ફરજ પડી હતી. IRGC એ એક નિવેદનમાં જણાવ્યું છે કે,કોઈપણ સૈન્ય જહાજ ગમે તે નામ કે બહાના હેઠળ હોર્મુઝની નજીક આવશે, તો તેને સંઘર્ષ વિરામનું ઉલ્લંઘન માનવામાં આવશે. ઉલ્લંઘન કરનાર જહાજ સામે ઈરાની સેના અત્યંત કડક અને લશ્કરી કાર્યવાહી કરશે.
શરતો પર સમજૂતી ન થતા તણાવ વધ્યો
લગભગ એક મહિના સુધી ચાલેલા ભીષણ સંઘર્ષ બાદ ઈરાન અને અમેરિકાએ બે અઠવાડિયાના સીઝફાયર (Cessfire) ની જાહેરાત કરી હતી. જોકે, આ સમયગાળા દરમિયાન કાયમી શાંતિ માટે રાખવામાં આવેલી શરતો પર બંને દેશોમાં સહમતી બની શકી નથી. ડોનાલ્ડ ટ્રમ્પ દ્વારા ઈરાની બંદરોની નાકાબંધી કરવાની ધમકી બાદ ઈરાન હવે ‘આરપાર’ ના મૂડમાં જોવા મળી રહ્યું છે, જે વૈશ્વિક ઉર્જા સપ્લાય માટે મોટું જોખમ ઉભું કરી શકે છે.
