News Continuous Bureau | Mumbai
H1B Visa 2026 અમેરિકામાં નોકરી કરવાની ઈચ્છા રાખતા ભારતીય યુવાનો માટે એક માઠા સમાચાર આવ્યા છે. ટ્રમ્પની રિપબ્લિકન પાર્ટીના સાંસદ ગ્રેગ સ્ટ્યૂબીએ વિદેશી કામદારોને મળતા H1B વિઝાની સુવિધા ખતમ કરવા માટે ‘EXILE એક્ટ’ (Ending Exploitative Imported Labor Exemption Act) નામનું વિધેયક રજૂ કર્યું છે. જો આ બિલ પાસ થઈ જાય તો અમેરિકામાં ટેકનોલોજી અને અન્ય ક્ષેત્રોમાં કામ કરવા જતા ભારતીયો માટે દરવાજા બંધ થઈ શકે છે.
શા માટે H1B વિઝા બંધ કરવાની માંગ ઉઠી?
સાંસદ ગ્રેગ સ્ટ્યૂબીએ સોશિયલ મીડિયા પર લખ્યું કે, લાંબા સમયથી H1B વિઝા પ્રોગ્રામ દ્વારા અમેરિકન કામદારોનું શોષણ કરવામાં આવી રહ્યું છે. કંપનીઓ પોતાના નફા માટે વિદેશથી સસ્તા કામદારોને બોલાવે છે, જેના કારણે અમેરિકાના સ્થાનિક લોકો સારી સેલરીવાળી નોકરીઓથી વંચિત રહી જાય છે. તેમણે દાવો કર્યો કે ડિઝની અને માઈક્રોસોફ્ટ જેવી કંપનીઓએ વિદેશી કામદારોને રાખવા માટે સેંકડો અમેરિકન કર્મચારીઓને છૂટા કર્યા છે.
બિલમાં શું છે જોગવાઈ અને ક્યારથી અમલ?
પ્રસ્તાવિત EXILE એક્ટ હેઠળ ઇમિગ્રેશન એન્ડ નેશનલિટી એક્ટના સેક્શન 214(g)(1)(A) માં સુધારો કરવાનું સૂચન છે. આ સુધારા મુજબ, નાણાકીય વર્ષ ૨૦૨૭ થી H1B વિઝાની સંખ્યા ઘટાડીને ‘શૂન્ય’ કરી દેવામાં આવશે. આંકડાઓ ટાંકીને જણાવાયું છે કે, H1B વિઝા હેઠળ વિદેશી ડોક્ટરોને બોલાવવાથી હજારો અમેરિકન ફિઝિશિયનોને રેસીડેન્સી પ્રોગ્રામમાં પ્રવેશ મળતો નથી.
આ સમાચાર પણ વાંચો : Apple AirPods Pro 4 Camera: એપલ એરપોડ્સમાં આવશે ખાસ કેમેરા ટેકનોલોજી, જાણો ક્યારે લોન્ચ થશે અને મ્યુઝિક કંટ્રોલ કરવાની નવી રીત
ભારતીયો પર કેટલી થશે અસર?
આ વિધેયક ભારતીયો માટે સૌથી મોટો ફટકો છે કારણ કે અમેરિકાના H1B વિઝા ધારકોમાં ૭૦ ટકાથી વધુ હિસ્સો ભારતીયોનો છે. આ એક ‘નોન-ઇમિગ્રન્ટ’ વિઝા છે જેના દ્વારા અમેરિકી કંપનીઓ એન્જિનિયરિંગ, મેડિકલ અને ફાયનાન્સ જેવા ક્ષેત્રોમાં વિદેશી નિષ્ણાતોને નોકરી આપે છે. જોકે, અત્યારે આ બિલ માત્ર નીચલા ગૃહ (લોઅર હાઉસ) માં રજૂ થયું છે. તે હાઉસ કમિટીમાં જશે અને ત્યાંથી પાસ થયા બાદ સીનેટમાં જશે. જો બંને ગૃહોમાં પાસ થાય અને રાષ્ટ્રપતિ હસ્તાક્ષર કરે તો જ તે કાયદો બનશે.
