News Continuous Bureau | Mumbai
USChina Summit 2026| અમેરિકા અને ચીન વચ્ચે ચાલી રહેલા વ્યાપારિક અને ટેકનોલોજીકલ વિવાદો વચ્ચે અમેરિકી રાષ્ટ્રપતિ ડોનાલ્ડ ટ્રમ્પ ગુરુવારે બીજિંગ પહોંચ્યા હતા. બીજિંગના પ્રતિષ્ઠિત ‘ગ્રેટ હોલ ઓફ ધ પીપલ’ ખાતે ચીની રાષ્ટ્રપતિ શી જિનપિંગે ટ્રમ્પનું ભવ્ય સ્વાગત કર્યું હતું. બંને નેતાઓએ ઉષ્માભર્યા અંદાજમાં હાથ મિલાવ્યા હતા, જેનો ફોટો અત્યારે સોશિયલ મીડિયા પર વાયરલ થઈ રહ્યો છે. ૨૦૧૭ પછી ટ્રમ્પની આ પ્રથમ ચીન મુલાકાત છે, જેના પર સમગ્ર વિશ્વની નજર ટકેલી છે.
ટ્રમ્પને અપાયું ભવ્ય ગાર્ડ ઓફ ઓનર
સ્વાગત સમારોહ દરમિયાન ચીની પીપલ્સ લિબરેશન આર્મીની ઓનર ગાર્ડ બટાલિયન દ્વારા રાષ્ટ્રપતિ ટ્રમ્પને ઔપચારિક ‘ગાર્ડ ઓફ ઓનર’ આપવામાં આવ્યું હતું. ટ્રમ્પે તેમના પ્રતિનિધિમંડળના સભ્યો, જેમાં વિદેશ મંત્રી માર્કો રુબિયો અને યુદ્ધ મંત્રી પીટ હેગસેથનો સમાવેશ થાય છે, તેમનો પરિચય શી જિનપિંગ સાથે કરાવ્યો હતો. ઔપચારિક કાર્યક્રમ બાદ બંને દેશો વચ્ચે ઉચ્ચ સ્તરીય દ્વિપક્ષીય મંત્રણાનો પ્રારંભ થયો છે.
આર્થિક સહયોગ અને ટેરિફ પર ચર્ચાની શક્યતા
આ બેઠકમાં મુખ્યત્વે અમેરિકા અને ચીન વચ્ચેના આર્થિક સંબંધો, નવા ટેરિફ (Tariffs), વૈશ્વિક સપ્લાય ચેઈન અને પ્રાદેશિક સુરક્ષા જેવા સંવેદનશીલ મુદ્દાઓ પર ચર્ચા થવાની આશા છે. નિષ્ણાતો માને છે કે આ મુલાકાત ભવિષ્યના અમેરિકા-ચીન સંબંધોની દિશા નક્કી કરવામાં નિર્ણાયક ભૂમિકા ભજવશે. રાષ્ટ્રપતિ ટ્રમ્પના માનમાં આજે સાંજે ભવ્ય રાજકીય ભોજન સમારંભ (State Banquet) નું પણ આયોજન કરવામાં આવ્યું છે.
ચીને ‘ચાર રેડ લાઇન’ અંગે આપી છે ચેતવણી
ટ્રમ્પની મુલાકાત પહેલા અમેરિકામાં સ્થિત ચીની દૂતાવાસે સોશિયલ મીડિયા પર સ્પષ્ટ કર્યું હતું કે બંને દેશોના સંબંધોમાં ‘ચાર રેડ લાઇન’ છે જેને પડકારવી જોઈએ નહીં. આ મુદ્દાઓમાં તાઇવાનનો પ્રશ્ન, લોકશાહી અને માનવાધિકાર, ચીની રાજકીય વ્યવસ્થા અને ચીનના વિકાસના અધિકારનો સમાવેશ થાય છે. આ સંવેદનશીલતા વચ્ચે બંને નેતાઓ કેવી રીતે મધ્યમ માર્ગ કાઢે છે તે જોવું રસપ્રદ રહેશે.
👉 આ સમાચાર વાચો:
China Gold Reserve Increase 2026| ચીનની સોનાની ખરીદીએ અમેરિકાના ઉડાડ્યા હોશ! ડોલર સામે યુદ્ધની તૈયારી? ગ્લોબલ ઇકોનોમીમાં મોટા પરિવર્તનના સંકેત
