News Continuous Bureau | Mumbai
ISRO Income Tax: ભારતમાં ખેતીની આવક ટેક્સ ફ્રી હોવાનો લાભ ઉઠાવીને કરોડો રૂપિયાનું કાળું નાણું સફેદ કરનારાઓ માટે હવે મુશ્કેલીના દિવસો શરૂ થયા છે. સેન્ટ્રલ બોર્ડ ઓફ ડાયરેક્ટ ટેક્સિસ (CBDT) અને ભારતીય અંતરિક્ષ સંશોધન સંસ્થા (ISRO) વચ્ચે એક મહત્વપૂર્ણ સમજૂતી કરાર (MoU) થયા છે. આ અંતર્ગત ઈસરો તેના આધુનિક સેટેલાઈટ દ્વારા જમીન પરની ખેતીની ચોક્કસ વિગતો પૂરી પાડશે, જેના આધારે આવકવેરા વિભાગ ટેક્સ ચોરી પકડશે.
સેટેલાઈટ કેવી રીતે પકડશે જૂઠાણું?
આ નવી વ્યવસ્થા મુજબ, ISRO આવકવેરા વિભાગને હાઈ-રેઝોલ્યુશન સેટેલાઈટ ઈમેજરી અને જિયો-મેપિંગ ડેટા પૂરો પાડશે. જ્યારે કોઈ કરદાતા કરોડોની ખેતીની આવક બતાવશે, ત્યારે આવકવેરા વિભાગ તે ચોક્કસ જમીનના લોકેશનની સેટેલાઈટ ઈમેજ મંગાવશે. આ ડેટા દ્વારા નીચેની બાબતો સ્પષ્ટ થશે:
શું તે જમીન પર ખરેખર પાક લેવામાં આવ્યો હતો કે તે સૂકી હતી?
પાકની પેટર્ન અને જમીનનો પ્રકાર શું છે?
શું તે જમીન ખેતી લાયક છે કે ત્યાં કોઈ બાંધકામ થયેલું છે?
આ સમાચાર પણ વાંચો : Mumbai BMC Anti-Encroachment Drive:મુંબઈમાં અતિક્રમણ વિરોધી ઝુંબેશમાં રાજકીય રોડા: કોંગ્રેસના કોર્પોરેટર પર BMC અધિકારીઓને ધમકાવવાનો ગંભીર આક્ષેપ
ઐતિહાસિક રેકોર્ડ્સ અને જિયો-ટેગિંગ
આ ટેકનોલોજીની સૌથી મોટી ખાસિયત એ છે કે સેટેલાઈટ પાસે છેલ્લા ૨ થી ૩ વર્ષના ઐતિહાસિક રેકોર્ડ્સ ઉપલબ્ધ હોય છે. જો કોઈ વ્યક્તિ પાછલી તારીખથી ખેતીની આવક બતાવે, તો સેટેલાઈટ ડેટા દ્વારા તે વર્ષની પાક પેટર્નની ઊંડાણપૂર્વક તપાસ કરી શકાશે. જિયો-મેપિંગ દ્વારા જમીનના દરેક ટુકડાનું ચોક્કસ સરનામું અને તેની સ્થિતિ આવકવેરા વિભાગના સર્વર પર ઉપલબ્ધ હશે, જે માનવીય હસ્તક્ષેપ વગર સચોટ માહિતી આપશે.
કાળા નાણાંને ધોળા કરવાના કૌભાંડ પર બ્રેક
ઘણા માલેતુજારો અને મોટા વેપારીઓ પોતાની અન્ય આવકને ‘ખેતીની આવક’ તરીકે દર્શાવીને ટેક્સ બચાવતા હોય છે. આ ટેકનોલોજીકલ ક્રાંતિથી હવે ખેતીના નામે થતું મની લોન્ડરિંગ અટકશે તેવી સરકારને અપેક્ષા છે. આ સિસ્ટમ લાગુ થવાથી પ્રામાણિક ખેડૂતોને કોઈ તકલીફ પડશે નહીં, પરંતુ જે લોકો ખેતીના ઓઠા હેઠળ ટેક્સ ચોરી કરે છે તેઓ સીધા સેટેલાઈટના રડારમાં આવી જશે.
