News Continuous Bureau | Mumbai
Air India Iran Flight Alert ઈરાનમાં સર્જાયેલી ગંભીર સુરક્ષા કટોકટી અને ત્યાંની સરકાર દ્વારા એરસ્પેસ બંધ કરવાના નિર્ણયને પગલે વૈશ્વિક એવિએશન સેક્ટરમાં હલચલ મચી ગઈ છે. ભારતની અગ્રણી એરલાઈન એર ઈન્ડિયાએ આ સ્થિતિને ગંભીર ગણીને પોતાના મુસાફરો માટે ટ્રાવેલ એડવાઈઝરી જારી કરી છે. ઈરાન ઉપરથી પસાર થતી આંતરરાષ્ટ્રીય ફ્લાઈટ્સના પૈડાં થંભી ગયા છે, જેના કારણે યુરોપ અને અમેરિકા જતી ફ્લાઈટ્સના શિડ્યુલ ખોરવાયા છે. એર ઈન્ડિયાએ સ્પષ્ટ કર્યું છે કે મુસાફરો અને ક્રૂ મેમ્બર્સની સુરક્ષા તેમની સર્વોચ્ચ પ્રાથમિકતા છે. ઈરાનના એરસ્પેસ પરના પ્રતિબંધને કારણે હવે વિમાનોએ લાંબો રૂટ લેવો પડી રહ્યો છે, જેના કારણે મુસાફરીના સમયમાં વધારો થશે અને કેટલીક ફ્લાઈટ્સ મોડી પડી શકે છે. જે રૂટ પર વૈકલ્પિક રસ્તો ઉપલબ્ધ નથી, તેવી ફ્લાઈટ્સને એરલાઈન દ્વારા રદ કરવામાં આવી છે.
એર ઈન્ડિયાની ટ્રાવેલ એડવાઈઝરી અને હેલ્પલાઈન
એર ઈન્ડિયાએ ટ્વિટ કરીને માહિતી આપી છે કે, ઈરાનમાં બદલાતી પરિસ્થિતિને કારણે ફ્લાઈટ્સને સુરક્ષિત વિસ્તારોમાંથી ડાયવર્ટ કરવામાં આવી રહી છે. એરલાઈને મુસાફરોને વિનંતી કરી છે કે એરપોર્ટ પર રવાના થતા પહેલા તેમની ફ્લાઈટનું સ્ટેટસ સત્તાવાર વેબસાઈટ પર ચોક્કસ તપાસી લેવું. જો તમારી ફ્લાઈટ રદ થઈ હોય, તો એરલાઈન દ્વારા રિફંડ અથવા ફ્રી રિ-બુકિંગની સુવિધા આપવામાં આવી રહી છે.
કયા રૂટ પર સૌથી વધુ અસર પડી?
ઈરાન એરસ્પેસ બંધ થવાથી ખાસ કરીને ભારતથી લંડન, ન્યૂયોર્ક, પેરિસ અને ફ્રેન્કફર્ટ જતી ફ્લાઈટ્સને અસર પડી છે. આ ફ્લાઈટ્સ હવે ઈરાનને બદલે સાઉદી અરેબિયા કે અન્ય મધ્ય એશિયાઈ દેશોના એરસ્પેસનો ઉપયોગ કરી રહી છે. ઈન્ડિગો એરલાઈને પણ સ્વીકાર્યું છે કે તેના આંતરરાષ્ટ્રીય ઓપરેશન્સ પર આની સીધી અસર પડી છે. એવિએશન નિષ્ણાતોના મતે, આ લાંબા રૂટને કારણે એરલાઈન્સના ઈંધણના ખર્ચમાં પણ વધારો થશે.
આ સમાચાર પણ વાંચો : BMC Election 2026: મહારાષ્ટ્રમાં મિનિ વિધાનસભાનો જંગ: BMC સહિત 29 મહાનગરપાલિકાઓ માટે મતદાન શરૂ, મોહન ભાગવત અને અક્ષય કુમારે કર્યું મતદાન.
ઈરાનમાં તણાવ વધવાનું મુખ્ય કારણ
ઈરાનમાં આર્થિક કટોકટી અને મોંઘવારી સામે ચાલી રહેલા દેશવ્યાપી વિરોધ પ્રદર્શનો હિંસક બન્યા છે. અમેરિકા સાથે વધતા તણાવ અને આંતરિક અસ્થિરતાને કારણે ઈરાને પોતાની એર ડિફેન્સ સિસ્ટમને હાઈ એલર્ટ પર રાખી છે. સુરક્ષા એજન્સીઓના મતે, સિવિલ એરક્રાફ્ટ માટે ઈરાનનું આકાશ હાલમાં અસુરક્ષિત હોવાથી મોટાભાગની આંતરરાષ્ટ્રીય એરલાઈન્સે આ રૂટ છોડી દીધો છે. જ્યાં સુધી સ્થિતિ સામાન્ય નહીં થાય ત્યાં સુધી આ ડાયવર્ઝન ચાલુ રહે તેવી શક્યતા છે.
