News Continuous Bureau | Mumbai
F-16 અમેરિકાએ પાકિસ્તાનને તેના F-૧૬ લડાકુ વિમાનો માટે $૬૮૬ મિલિયન (લગભગ ₹૫,૮૦૦ કરોડ)ની આધુનિક ટેક્નોલોજી અને સહાય વેચવાની મંજૂરી આપી દીધી છે. અમેરિકન ડિફેન્સ સિક્યોરિટી કોઓપરેશન એજન્સી (DSCA) એ આ અંગે યુએસ કોંગ્રેસને પત્ર મોકલ્યો છે.
પેકેજમાં શું છે ખાસ?
આ અપગ્રેડ પેકેજ પાકિસ્તાની F-૧૬ ની કાર્યક્ષમતામાં ધરખમ વધારો કરશે:
Link-૧૬ ડેટા લિંક સિસ્ટમ: આ સૌથી મહત્વપૂર્ણ સિસ્ટમ છે. આ અમેરિકા અને નાટો દેશોનું સુપર-સિક્યોર કમ્યુનિકેશન નેટવર્ક છે. તે યુદ્ધ દરમિયાન મિત્ર-દુશ્મનની ઓળખ, હથિયારો ચલાવવામાં કોઓર્ડિનેશન અને રીઅલ-ટાઇમ માહિતીની વહેંચણી કરે છે. આનાથી જામિંગ સામે પણ રક્ષણ મળે છે.
અન્ય અપગ્રેડ: ક્રિપ્ટોગ્રાફિક (ગુપ્ત કોડ) ઉપકરણો, નવા એવિયોનિક્સ (વિમાનની ઇલેક્ટ્રોનિક સિસ્ટમ), પાયલટ ટ્રેનિંગ, સ્પેર પાર્ટ્સ અને સોફ્ટવેર અપડેટ્સ પણ પેકેજમાં શામેલ છે.
ઉંમરમાં વધારો: આ અપગ્રેડથી F-૧૬ વિમાનોની ઓપરેશનલ લાઈફ વર્ષ ૨૦૪૦ સુધી વધી જશે અને તેમની ઉડાન સુરક્ષામાં સુધારો થશે.
અમેરિકાએ કેમ આપી મંજૂરી?
DSCA એ કોંગ્રેસને મોકલેલા પત્રમાં સ્પષ્ટ લખ્યું છે કે,પાકિસ્તાન આતંકવાદ વિરુદ્ધ અમેરિકા અને તેના ભાગીદાર દેશો સાથે મળીને કામ કરતું રહેશે.ભવિષ્યમાં કોઈપણ મોટી લડાઈમાં પાકિસ્તાની વાયુસેના અમેરિકન વાયુસેના સાથે સરળતાથી તાલમેલ બેસાડી શકશે.અમેરિકાનો દાવો છે કે આ વેચાણ દક્ષિણ એશિયામાં લશ્કરી સંતુલન બગાડશે નહીં.
આ સમાચાર પણ વાંચો : Mahayuti: નવી મુંબઈમાં રસાકસી મહાયુતિનું ગઠબંધન ફોર્મ્યુલા તૈયાર હોવા છતાં આ જગ્યાએ ‘ફ્રેન્ડલી ફાઇટ’ની શક્યતા કેમ?
ભારતની ચિંતા શું છે?
ભારતીય સંરક્ષણ નિષ્ણાતો માટે આ એક ચિંતાનો વિષય છે. Link-૧૬ જેવી સંવેદનશીલ ટેક્નોલોજી પાકિસ્તાનને અમેરિકા-નાટો સ્તરની માહિતી અને કમાન્ડ શેર કરવાની ક્ષમતા આપશે. ભારત પાસે હાલમાં Link-૧૬ નથી. ૨૦૧૯ના બાલાકોટ હુમલા પછી અમેરિકાએ પાકિસ્તાનના F-૧૬ માટે સ્પેરપાર્ટ્સ પણ રોકી દીધા હતા. હવે અચાનક આટલું મોટું પેકેજ મંજૂર કરવું ઘણા સવાલો ઊભા કરે છે.ભારત હવે તેના રાફેલ, સુખોઈ-૩૦ અને આગામી AMCA પ્રોજેક્ટ પર વધુ ઝડપથી કામ કરી રહ્યું છે. કોંગ્રેસ પાસે આ ડીલ રોકવા માટે ૩૦ દિવસનો સમય છે, જોકે સામાન્ય રીતે આવા સોદા પસાર થઈ જાય છે.
