News Continuous Bureau | Mumbai
Malad Digital Arrest Scam મુંબઈના પશ્ચિમ ઉપનગરમાં આવેલા મલાડ વિસ્તારમાં રહેતા એક નિવૃત્ત સરકારી વરિષ્ઠ દંપતીને ‘ડિજિટલ અરેસ્ટ’ ની જાળમાં ફસાવીને ૪૧.૫૦ લાખની ઓનલાઈન લૂંટ ચલાવવાનો સનસનાટીભર્યો કિસ્સો સામે આવ્યો છે. મુંબઈ પોલીસના નોર્થ રીજન સાયબર સેલે આ મામલે ત્વરિત કાર્યવાહી કરીને સાયબર ગુનેગારોને બેંક ખાતા અને કંપનીના દસ્તાવેજો પૂરા પાડનારા બે સાગરીતોની ધરપકડ કરી લીધી છે. પકડાયેલા આરોપીઓ પાસેથી મળેલા સુરાગના આધારે પોલીસે દેશભરના વિવિધ સાયબર ફ્રોડ સાથે જોડાયેલા કુલ ૭૮ બેંક ખાતાઓને ફ્રીઝ કરી દીધા છે.
Malad Digital Arrest Scam – વોટ્સએપ વીડિયો કોલ પર નકલી પોલીસ ઇન્સ્પેક્ટર બનીને ધમકાવ્યા
સાયબર સેલમાંથી મળતી સત્તાવાર વિગતો અનુસાર, મલાડમાં રહેતા ૬૭ વર્ષીય નિવૃત્ત મહિલા અને તેમના પતિને એક અજાણ્યો ફોન આવ્યો હતો. ફોન કરનારે ડરાવતા કહ્યું કે, “તમારા નામે કરોડો રૂપિયાનું ગેરકાયદેસર મની લોન્ડરિંગ થયું છે અને તમારી સામે કેસ નોંધાયો છે.” ત્યારબાદ ગઠિયાઓએ દંપતીને વૉટ્સએપ વીડિયો કોલ કર્યો હતો, જેમાં સામે એક શખ્સ પોલીસ યુનિફોર્મ પહેરીને બેઠો હતો અને તેણે પોતાની ઓળખ પોલીસ ઇન્સ્પેક્ટર તરીકે આપી હતી. દંપતીને સાચું મનાવવા માટે ઠગે કેટલાક ફેક (નકલી) બેંક સ્ટેટમેન્ટ બતાવ્યા અને દાવો કર્યો કે તમારા ખાતામાં ૨.૫ કરોડનું કાળું નાણું જમા થયું છે.
Malad Digital Arrest Scam – બદનામીના ડરથી દંપતીએ ફિક્સ ડિપોઝિટ (FD) તોડી પૈસા ટ્રાન્સફર કર્યા
નકલી પોલીસે દંપતીને કથિત ‘ડિજિટલ અરેસ્ટ’ હેઠળ રાખ્યા હતા, એટલે કે તેમને કેમેરા સામે જ બેસી રહેવા અને તપાસમાં સહકાર આપવા દબાણ કર્યું હતું. ધરપકડ અને બદનામીના ડરથી ગભરાઈ ગયેલા દંપતીને ઠગે પોતાની નિર્દોષતા સાબિત કરવા માટે બેંકમાં રહેલી ફિક્સ ડિપોઝિટ (FD) તાત્કાલિક તોડવા મજબૂર કર્યા હતા. સાયબર ગુનેગારોએ દંપતીને સખત ચેતવણી આપી હતી કે તેઓ બેંકના કોઈ પણ કર્મચારી સાથે આ તપાસ અંગે ચર્ચા ન કરે. દંપતીએ આ નકલી પોલીસના ખાતાઓમાં કુલ ૪૧,૫0,૦૦૦ (૪૧.૫૦ લાખ) ટ્રાન્સફર કરી દીધા. થોડા દિવસો બાદ જ્યારે એક સંબંધી દંપતીના ઘરે આવ્યા ત્યારે આખી હકીકત બહાર આવી હતી.
Malad Digital Arrest Scam – વસઈમાં મજૂરી કામ કરતા બે આરોપીઓ બોગસ ખાતા ખોલાવતા ઝડપાયા
સાયબર સેલે નાણાકીય વ્યવહારોની તપાસ કરતાં જાણવા મળ્યું કે દંપતીના પૈસા વસઈમાં એક ટ્રેડિંગ કંપનીના બેંક ખાતામાં ગયા હતા. પોલીસે દરોડો પાડીને વસઈમાંથી આ બંને સાગરીતોની ધરપકડ કરી લીધી છે. ચોંકાવનારી વાત એ છે કે આ બંને જણા વસઈમાં મજૂરી કામ કરે છે. પૂછપરછમાં તેમણે કબૂલાત કરી હતી કે તેમણે મોટી સાયબર ગેંગ્સને કમિશનના લાલચે પોતાના નામે બોગસ કંપનીઓ ખોલીને બેંક એકાઉન્ટ્સ પૂરા પાડ્યા હતા. આ ગેંગ સાથે જોડાયેલા સમગ્ર ભારતમાં કુલ ૭૮ બેંક ખાતાઓ (જેમાં મહારાષ્ટ્રના ૧૮ ખાતાઓ સામેલ છે) ને પોલીસે તાત્કાલિક ફ્રીઝ કરી દીધા છે.
👉 આ સમાચાર વાચો:
Prabhadevi Fake Currency Case પ્રભાદેવીમાં યુનિયન બેંકના કેશ ડિપોઝિટ મશીનમાં ૫૦,૦૦૦ ની નકલી નોટો જમા કરાવવાનો પ્રયાસ; દાદર પોલીસ મથકે ગુનો દાખલ
