ન્યુઝ કન્ટિન્યુઝ બ્યુરો
મુંબઈ, 30, સપ્ટેમ્બર 2021
ગુરુવાર.
જો કોઈને પૂછવામાં આવે કે દુનિયાની સૌથી કીમતી વસ્તુ કઈ છે, તો તે ચોક્કસપણે કહેશે કે હીરા કે સોનું. પરંતુ જો તમને એમ કહેવામાં આવે કે ‛લાકડું’ એ હીરા, સોના અથવા કોઈ કીમતી રત્ન કરતાં મોંઘું છે, તો તમે માનશો? કોઈ પણ વ્યક્તિ માટે આ માનવું મુશ્કેલ છે, પરંતુ એ સાચું છે કે વિશ્વના દુર્લભ લાકડાની કિંમત હીરા અને સોના કરતાં વધુ મોંઘી છે. તો ચાલો તમને આ લાકડા વિશે વધુ માહિતી આપીએ.
‛અગરવુડ’, અકીલારિયા વૃક્ષમાંથી મળી આવે છે, તેને ઇગલવુડ અથવા એલોસવુડ તરીકે પણ ઓળખવામાં આવે છે. આ લાકડું ચીન, જાપાન, ભારત, અરેબિયા અને દક્ષિણ પૂર્વ એશિયાના દેશોમાં જોવા મળે છે. અગરવુડ લાકડું વિશ્વનું સૌથી દુર્લભ પરંતુ સૌથી મોંઘું લાકડું છે. આ લાકડાની કિંમત હીરા અને સોના કરતાં વધુ મૂલ્યવાન છે.
ભારતમાં એક ગ્રામ હીરાની કિંમત આશરે 3,25,000 રૂપિયા છે, જ્યારે 10 ગ્રામ સોનાની કિંમત આશરે 47,695 રૂપિયા છે. પરંતુ માત્ર 1 ગ્રામ અગરવુડનું લાકડું 10,000 ડૉલર એટલે કે 7 લાખ રૂપિયામાં વેચાય છે.
ગુજરાતથી આવનાર ભારે વાહનો આ જગ્યાએ રોકવામાં આવે તેવી સંભાવના, વેપારીઓને થશે અસર; જાણો વિગત
અગરવુડને જાપાનમાં ક્યાનમ અથવા ક્યારા તરીકે પણ ઓળખવામાં આવે છે. આ લાકડામાંથી અત્તર અને પર્ફ્યુમ બનાવવામાં આવે છે. લાકડા સડી ગયા પછી એનો ઉપયોગ અત્તરના ઉત્પાદનમાં થાય છે. એટલું જ નહીં, અગરવુડના લાકડાના રેઝિનમાંથી પણ ઓડ તેલ કાઢવામાં આવે છે. તમને જણાવી દઈએ કે આ તેલનો ઉપયોગ માત્ર સેન્ટમાં થાય છે અને આજના સમયમાં આ તેલની કિંમત 25 લાખ રૂપિયા પ્રતિ કિલો છે. ખૂબ કીમતી હોવાને કારણે, અગરવુડને વુડ ઑફ ગોડ્સ એટલે કે ભગવાનનું લાકડું પણ કહેવામાં આવે છે.
ઉલ્લેખનીય છે કે હૉન્ગકૉન્ગ, ચીન, જાપાનના વિસ્તારમાં અકીલારિયાનાં ઘણાં વૃક્ષો છે, પરંતુ એમાંથી બહાર આવતા અગરવુડ એટલા મૂલ્યવાન છે કે તેની કાપણી અને દાણચોરી મોટા પાયે થઈ રહી છે. BBCના એક રિપૉર્ટ અનુસાર આ લાકડાની એટલી બધી દાણચોરી થઈ રહી છે કે અકીલારિયા વૃક્ષની પ્રજાતિ નાબૂદ કરવામાં આવી રહી છે. અહેવાલ અનુસાર એશિયન પ્લાન્ટેશન કૅપિટલ કંપની અકીલારિયા વૃક્ષો સાથે સંબંધિત એશિયાની સૌથી મોટી કંપની છે.
