News Continuous Bureau | Mumbai
મુંબઈ ઈન્ટરનેશનલ એરપોર્ટ પરથી એક વિચિત્ર ઘટના સામે આવી છે. અહીં મુંબઈ એરપોર્ટ પર વિવિધ દેશોમાં જવા માટે બોર્ડિંગ પાસની અદલાબદલી કરનારા બે વિદેશી નાગરિકોની ધરપકડ કરવામાં આવી છે. તેમાંથી એક શ્રીલંકન મૂળનો છે અને બીજો જર્મન મૂળનો છે.
બોર્ડિંગ પાસ પર અલગ-અલગ નંબરો હતા
આ મામલાની તપાસ કરી રહેલા એક અધિકારીએ ગુરુવારે જણાવ્યું હતું કે, લંડન અને કાઠમંડુ જવા માટે બોર્ડિંગ પાસની અદલાબદલી કરવા બદલ પોલીસે શ્રીલંકાના વતની અને જર્મન નાગરિકની ધરપકડ કરી છે. મુંબઈ એરપોર્ટ પર તપાસ કરતાં જર્મન નાગરિકના પાસપોર્ટ પરની ડિપાર્ચર સ્ટેમ્પ બનાવટી હોવાનું જણાયું હતું. તેમજ પાસપોર્ટ પર ડિપાર્ચર ટિકિટ નંબર અલગ હતો. તેમના બોર્ડિંગ પાસ પરના નંબર પણ અલગ હતા.
આ સમાચાર પણ વાંચો: અજિત પવાર CM શિંદે અને ફડણવીસને મળ્યા, લગભગ 1 કલાક સુધી ચાલી બેઠક, ત્રણેય દિગ્ગ્જ્જો વચ્ચે શું ચર્ચા થઈ? રાજકીય વર્તુળોમાં ચર્ચા તેજ..
સહાર પોલીસ આ મામલે તપાસ કરી રહી છે
જ્યારે પોલીસે જર્મન નાગરિકની તપાસ કરી તો જાણવા મળ્યું કે તેણે એરપોર્ટના ટોયલેટમાં જ શ્રીલંકાના નાગરિક પાસેથી બોર્ડિંગ પાસ બદલાવી નાખ્યો હતો. દરમિયાન, શ્રીલંકન નાગરિક બદલાયેલ બોર્ડિંગ પાસ સાથે યુકે પહોંચ્યો, તેથી પોલીસે શ્રીલંકાના નાગરિકને તાત્કાલિક મુંબઈ મોકલવા માટે યુકેના એરપોર્ટ સત્તાવાળાઓનો સંપર્ક કર્યો. આ પછી યુકે એરપોર્ટે શ્રીલંકાના નાગરિકને મુંબઈ મોકલ્યો હતો. આ પછી, સહાર પોલીસ સ્ટેશને બંને આરોપીઓ સામે ગુનો નોંધી સઘન તપાસ શરૂ કરી છે. બંને વિદેશીઓની પૂછપરછ દરમિયાન એવું બહાર આવ્યું હતું કે તેઓ 9 એપ્રિલના રોજ મુંબઈમાં એરપોર્ટ નજીક એક લક્ઝરી હોટલમાં રોકાયા હતા અને બોર્ડિંગ પાસની આપ-લે કરવાની યોજના બનાવી હતી.
હવે પોલીસે બંને વિદેશી નાગરિકો સામે વિવિધ છેતરપિંડી અને ગુનાઈત ષડયંત્ર સહિતની વિવિધ કલમો હેઠળ ગુનો નોંધી વધુ તપાસ હાથ ધરી છે. પોલીસ એ બાબતની તપાસ પણ કરી રહી છે કે, ગુનામાં અન્ય લોકો સામેલ છે કે નહીં.
