ન્યુઝ કન્ટીન્યુઝ બ્યુરો
મુંબઈ
15 ઓક્ટોબર 2020
દેશના ઉત્તર ક્ષેત્રના પહાડી અને મેદાની વિસ્તારમાં ચોમાસાની ઔપચારિક વિદાઈની સાથે શિયાળાની ઋતુની શરુઆત થઈ ગઈ છે. આગામી શિયાળાની સિઝનમાં કડકડતી ઠંડી પડશે અને શિયાળો લાંબો હોવાનો અંદાજો લગાવવામાં આવી રહ્યો છે. હવામાં ઘટતી આદ્રતા, સુકી હવા અને સ્પષ્ટ હવામાનને કારણે ઠંડીની લહેર શરુ થઈ જાય છે.
15 ઓક્ટોબરથી તાપમાનમાં ઘટાડો નોંધાશે એવું અનુમાન લગાવાઈ રહ્યું છે. ઉત્તર ક્ષેત્રોમાં ભારે દબાણના કારણે હવાની ગતિ વધી છે. જમ્મૂ-કશ્મીર, હિમાચલ, ઉત્તરાખંડ, પંજાબમાં ચોમાસાએ અલવિદા કહ્યું છે. ત્યારે હરિયાણા, રાજસ્થાન, પશ્ચિમ-ઉત્તર પ્રદેશ, મધ્યપ્રદેશમાં ચોમાસું પૂર્ણ થયું છે.
આવનારો શિયાળો ખેતી માટે મહત્વપૂર્ણ રહેશે. આ દરમિયાન ઈન્ડિયન ઈસ્ટિટ્યૂટ ઓફ વ્હીટ એન્ડ બારલે રિસર્ચના ડિરેક્ટરે કહ્યું છે કે ચોમાસાના સારા વરસાદને કારણે મધ્ય પ્રદેશ, ગુજરાત અને રાજસ્થાનની માટીમાં ભેજ છે જેના કારણે ઘઉંનો પાક સારો થઈ શકે છે.
આ વર્ષે ગરમી અને વરસાદે રેકર્ડ તોડયા બાદ શિયાળો પણ ઠંડીના રેકોર્ડ તોડે તેવા એંધાણ છે. આ વર્ષે શિયાળો લાંબો ચાલશે અને ઠંડી પણ હાડ થિજાવી દે તેવી પડવાની આગાહી હવામાન વિજ્ઞાનીઓએ કરી છે. આથી વિપરીત ઉત્તરી ક્ષેત્રમાં જળાશયોમાં જલ સ્તર સામાન્યથી ઓછું થયું છે. ઘઉં ઉત્પાદક આ રાજ્યોમાં ખેતી 100 ટકા સિંચિત છે પરંતુ શિયાળો લાંબો ખેંચાવાથી ઘઉંની ઉત્પાદકતા વધી શકે છે
