News Continuous Bureau | Mumbai
ઇન્ડિયન ક્રિકેટ ટીમ માટે એક ખરાબ સમાચાર સામે આવી રહ્યા છે. સ્ટાર ફાસ્ટ બોલર જસપ્રીત બુમરાહ ઓસ્ટ્રેલિયા સામે ચાલી રહેલી બોર્ડર-ગાવસ્કર ટેસ્ટ શ્રેણીમાંથી સંપૂર્ણપણે બહાર થઈ ગયો છે. અગાઉ એવું કહેવામાં આવી રહ્યું હતું કે બુમરાહ ઈજામાંથી સાજો થઈ ગયો છે અને તે 4 મેચોની ટેસ્ટ શ્રેણીની છેલ્લી બે મેચ રમી શકે છે. પરંતુ હવે મીડિયા રિપોર્ટ્સમાં કહેવામાં આવી રહ્યું છે કે બુમરાહ આખી સિરીઝમાંથી બહાર છે. જો કે, તે પછી બુમરાહ ઓસ્ટ્રેલિયા સામેની ત્રણ મેચની ડોમેસ્ટિક વનડે સીરીઝમાં વાપસી કરશે.
મહત્વનું છે કે બુમરાહ આ સમયે સ્વસ્થ થઈ ગયો છે. ઈજામાંથી સાજા થયા બાદ તે રિહેબ માટે નેશનલ ક્રિકેટ એકેડમીમાં છે. બુમરાહે પણ બોલિંગ શરૂ કરી દીધી છે. પરંતુ ભારતીય ટીમ મેનેજમેન્ટની થિંક ટેન્ક બુમરાહને લઈને જોખમ લેવા માંગતી નથી. આ જ કારણ છે કે તેણે બુમરાહને ટેસ્ટ શ્રેણીમાંથી બહાર રાખ્યો છે.
આ સમાચાર પણ વાંચો : જાસૂસી કરી રહ્યું હતું ચાઈનીઝ બલૂન, અમેરિકાના દાવા પર ભડકેલા ચીને આપ્યો આવો જવાબ
બુમરાહે સપ્ટેમ્બર 2022 પછી એકપણ મેચ રમી નથી
ઉલ્લેખનીય છે કે 29 વર્ષીય બુમરાહે પીઠની ઈજાને કારણે ગયા વર્ષે સપ્ટેમ્બરથી કોઈ આંતરરાષ્ટ્રીય મેચ રમી નથી. ઓસ્ટ્રેલિયા સામેની પ્રથમ બે ટેસ્ટ મેચ માટે પણ તેને ટીમમાં પસંદ કરવામાં આવ્યો ન હતો. જોકે તેણે NCAમાં નેટ પર બોલિંગ શરૂ કરી દીધી છે. તેમ છતાં, શ્રેણીમાંથી તેના બહાર નીકળવાના આ સમાચારે ચાહકોને નિરાશ કર્યા છે.
