News Continuous Bureau | Mumbai
ઉદ્ધવ ઠાકરે મુંબઈના રાજકીય મહાભારતમાં અભિમન્યુની ભૂમિકા નિભાવતા જોવા મળે છે. આવનારી BMC ચૂંટણીમાં જે લોકો એક સમયે તેમની સાથે હતા એ જ લોકો તેમની વિરુદ્ધ ચક્રવ્યુહ બનાવી રહ્યા છે. શુક્રવારે (21 ઓક્ટોબર) સાંજે શિવાજી પાર્કમાં દીપોત્સવના અવસર પર, MNS પ્રમુખ રાજ ઠાકરે, ડેપ્યુટી સીએમ દેવેન્દ્ર ફડણવીસ અને સીએમ એકનાથ શિંદે એક સાથ આવવાથી રાજકીય વર્તુળોમાં હલચલ મચી ગઈ છે. એવું માનવામાં આવે છે કે ત્રણેય સાથે મળીને ઉદ્ધવને ઘેરી રહ્યા છે.
મુખ્યમંત્રી એકનાથ શિંદે, નાયબ મુખ્યમંત્રી દેવેન્દ્ર ફડણવીસ અને MNS પ્રમુખ દિપોત્સવના ઉદ્ઘાટન માટે શિવાજી પાર્ક આવ્યા હતા, પરંતુ તેમના આ મિલને રાજ્યના રાજકારણમાં અટકળોને વેગ આપ્યો છે. ત્રણેયની આ નિકટતાને આવતા વર્ષની શરૂઆતમાં યોજાનારી મુંબઈ મહાનગરપાલિકાની ચૂંટણી સાથે જોડવામાં આવી રહી છે. ફડણવીસ અને શિંદે મહારાષ્ટ્રની સત્તામાં ભાગીદાર છે, હવે રાજ ઠાકરે પણ છેલ્લા કેટલાક મહિનામાં બંનેની ખૂબ નજીક આવી ગયા છે. મહારાષ્ટ્રના આ મજબૂત નેતાઓની નિકટતાને ઉદ્ધવ ઠાકરેની ઘેરાબંધી ગણવામાં આવી રહી છે.
મુંબઈના રાજકીય મહાભારતમાં ઉદ્ધવ ઠાકરે અભિમન્યુ તરીકે ઉભરી રહ્યા છે. ઉદ્ધવ ઠાકરે વિરુદ્ધ જે ચક્રવ્યુહ તૈયાર કરવામાં આવી રહ્યો છે તેમાં તેમના પિતરાઈ ભાઈ રાજ ઠાકરે, થોડા દિવસો પહેલા તેમની સાથે રહેનાર એકનાથ શિંદે અને 2019 સુધી તેમના રાજકીય ભાગીદાર રહેનારા દેવેન્દ્ર ફડણવીસ છે. એટલે કે અભિમન્યુની જેમ જે લોકો એક સમયે તેમના પોતાના હતા તે લોકો ઉદ્ધવ સામે એકઠા થઈ રહ્યા છે.
ભાજપ અને એકનાથ શિંદેની બાલાસાહેબાંચી શિવસેના વિશે, એ લગભગ નક્કી થઈ ગયું છે કે બંને BMC ચૂંટણી એકસાથે લડશે. રાજ ઠાકરેએ તેમના પક્ષના કાર્યકરોને સ્વતંત્ર રીતે ચૂંટણીની તૈયારી કરવા કહ્યું છે, પરંતુ તેનો અર્થ એ નથી કે તેઓ ભાજપ કે શિંદે સાથે પરોક્ષ રીતે ગઠબંધન ન કરી શકે. મરાઠી મતોના વિભાજન માટે ભાજપ રાજ ઠાકરેની પાર્ટીનો ઉપયોગ કરી શકે છે. જેથી ઉદ્ધવ ઠાકરેને નુકસાન થશે. રાજ ઠાકરે પાસે અત્યારે ગુમાવવા જેવું કંઈ નથી. 2017ની BMC ચૂંટણીમાં તેમના 7 કાઉન્સિલરો ચૂંટાયા હતા, જેમાંથી 6 શિવસેનામાં ગયા હતા. શિંદે અને ફડણવીસ સાથે હાથ મિલાવીને રાજ ઠાકરે પોતાની પાર્ટીને પુનર્જીવિત કરવાની તક શોધી રહ્યા છે.
ત્રણેયના એકસાથે આવવાથી રાજકીય વર્તુળોમાં ગણગણાટ શરૂ થઈ ગયો છે, પરંતુ દીપોત્સવ પ્રસંગે કોઈએ કોઈ રાજકીય વાત કરી નથી. જો કે સવાલ એ ઉઠી રહ્યો છે કે જો ફડણવીસ, શિંદે અને રાજ ઠાકરે ઉદ્ધવ સામે એક થઈ જશે તો ઉદ્ધવ સાથે કોણ રહેશે. મહાવિકાસ અઘાડીમાં ઉદ્ધવની એનસીપી અને કોંગ્રેસ ભાગીદાર હતા. મુંબઈમાં એનસીપીની હાજરી નજીવી છે, જ્યારે કોંગ્રેસ આંતરિક જૂથવાદને કારણે નબળી પડી છે. આવી સ્થિતિમાં આ જોવું રહ્યું કે ઉદ્ધવ આ ચક્રવ્યુહને તોડી શકે છે કે નહીં.
