News Continuous Bureau | Mumbai
Delhi Car Blast દિલ્હી કાર વિસ્ફોટ કેસમાં ફરીદાબાદમાંથી ધરપકડ કરાયેલા ડૉ. શાહીનના કારનામાથી તેના પૂર્વ પતિ ડૉ. ઝફર હયાત પણ આઘાતમાં છે. કાનપુરની એક સરકારી હોસ્પિટલમાં નેત્ર રોગ વિશેષજ્ઞ તરીકે કામ કરી રહેલા ડૉ. ઝફરે જણાવ્યું કે તેમના લગ્ન માત્ર 10 વર્ષ ચાલ્યા હતા. 2003 માં લગ્ન થયા બાદ 2012 ના અંતમાં છૂટાછેડા થયા હતા. ડૉ. ઝફરને છૂટાછેડાનું ચોક્કસ કારણ આજે પણ ખબર નથી. તેમને બે પુત્રો છે, જે ડૉ. ઝફર પાસે જ રહે છે.
બુરખા પ્રત્યે નફરત અને યુરોપમાં વસવાની ઇચ્છા
ડૉ. ઝફરે જણાવ્યું કે છૂટાછેડા પછી શાહીને ક્યારેય તેમનો સંપર્ક પણ કર્યો નથી. તેમણે ખુલાસો કર્યો કે શાહીનને બુરખો પહેરવો જરાય પસંદ નહોતો. તે સંબંધીઓ અને મિત્રો સાથે પણ વધારે સંબંધો રાખતી નહોતી. તે એક સારી પત્ની અને માતા તરીકે પોતાના પરિવારની સંભાળ રાખતી હતી, પરંતુ તેનો મોટાભાગનો સમય લેપટોપ સાથે જ પસાર થતો હતો. સૂત્રોના જણાવ્યા અનુસાર, ડૉ. શાહીન યુરોપ અથવા ઓસ્ટ્રેલિયામાં વસવાટ કરવા માગતી હતી.
GSVM મેડિકલ કોલેજમાં ATSની તપાસ
ડૉ. શાહીન અગાઉ કાનપુર મેડિકલ કોલેજમાં પ્રોફેસર તરીકે ભણાવતી હતી. આ સંબંધમાં મંગળવારે ATSની એક ટીમ GSVM મેડિકલ કોલેજ પહોંચી હતી. ટીમે કોલેજ મેનેજમેન્ટ પાસેથી શાહીન વિશે માહિતી એકઠી કરી. ATSએ તેના દસ્તાવેજો, કોલેજમાં રહેવા દરમિયાનની તેની પ્રવૃત્તિઓ અને તેના મિત્રો વિશે પણ પૂછપરછ કરી. પોલીસ કમિશનર એ જણાવ્યું કે ATSના અધિકારીઓ શાહીન સંબંધિત માહિતી માટે આવ્યા હતા અને કમિશનરેટ પોલીસ તપાસ એજન્સીઓના સંપર્કમાં છે.
આ સમાચાર પણ વાંચો : PM Modi: દિલ્હી બ્લાસ્ટના ઘાયલોને LNJP હોસ્પિટલમાં મળ્યા વડાપ્રધાન નરેન્દ્ર મોદી
જૈશ-એ-મોહમ્મદ સાથે કનેક્શન
તપાસ એજન્સીઓનો દાવો છે કે ડૉ. શાહીન પ્રતિબંધિત આતંકવાદી સંગઠન જૈશ-એ-મોહમ્મદની મહિલા પાંખ જમાત-ઉલ-મોમિનાતનો ભાગ છે. તેના પર ભારતમાં આ સંગઠનની મહિલા વિંગ બનાવવાની જવાબદારી હતી. ડૉ. શાહીન પાકિસ્તાનમાં બેઠેલા હેન્ડલરના સંપર્કમાં હતી. તેના પિતાએ જણાવ્યું કે તેમને જ્યારે ખબર પડી કે શાહીન આવા કામમાં સામેલ છે, ત્યારે તેમના પગ નીચેથી જમીન ખસી ગઈ હતી.
