ન્યુઝ કન્ટિન્યુઝ બ્યુરો
મુંબઈ, 6 સપ્ટેમ્બર, 2021
સોમવાર
બીજી પત્ની રાખવાની કબૂલાત કરી વિવાદાસ્પદ બની ગયેલા રાષ્ટ્રવાદી કૉન્ગ્રેસના નેતા અને મહારાષ્ટ્રના સામાજિક ન્યાયપ્રધાન ધનંજય મુંડેનાં બીજાં પત્ની કરુણા મુંડે ફરી વિવાદમાં આવી ગયાં છે. કરુણા મુંડેની કારમાંથી ગેરકાયદે રીતે પિસ્તોલ મળી આવવાના આરોપ હેઠળ પોલીસે તેમની ધરપકડ કરી છે. પરલીમાં આ કાર્યવાહી કરવામાં આવી છે. એની સામે કરુણા મુંડેએ કોઈએ તેમની ગાડીમાં આ પિસ્તોલ મૂકીને તેમને ફસાવવાનો પ્રયાસ કર્યો હોવાનો આરોપ કર્યો છે.
કરુણા મુંડે 5 સપ્ટેમ્બરના પરલીમાં ગયાં હતાં. કરુણા પરલીમાં જવાનાં હોવાથી તણાવ વધવાની શક્યતાને પગલે તકેદારીના પગલારૂપે પોલીસે બંદોબસ્ત વધાર્યો હોવાનું માનવામાં આવે છે. તેઓ પરલીના પ્રસિદ્ધ મંદિરમાં જઈ રહ્યાં હતાં ત્યારે ધનંજય મુંડેના સમર્થકો અને રાષ્ટ્રવાદી કૉન્ગ્રેસની મહિલા કાર્યકર્તાઓએ તેમની ગાડી અટકાવી હતી. દરમિયાન ધક્કામુક્કી થતાં પોલીસે વધુ તણાવ ટાળવા માટે કરુણાની ગાડીને પોલીસ સ્ટેશન લઈ આવી હતી. ગાડીની ઝડતી લેવામાં આવતાં એમાંથી પિસ્તોલ મળી આવી હતી. પિસ્તોલનું લાઇસન્સ નહીં હોવાથી પોલીસે તેમની અટક કરી હતી.
હવે ગમે ત્યારે પકડાશે અનિલ દેશમુખ. કેન્દ્ર સરકારે આ આદેશ જાહેર કર્યો
કરુણાએ જોકે પિસ્તોલ તેની હોવાનો દાવો ફગાવી દીધો હતો અને મંદિરમાં થયેલી ધક્કામુક્કી દરમિયાન કોઈએ તેમની ગાડીમાં પિસ્તોલ મૂકી દીધી હોવાનો આરોપ કર્યો હતો. તેમને કોઈએ ફસાવવાના ઇરાદે આ કૃત્ય કર્યું હોવાનો આરોપ પણ તેમણે કર્યો હતો.
