News Continuous Bureau | Mumbai
LPG Shortage in Maharashtra: ઈરાન-ઈઝરાયેલ સંઘર્ષની અસર હવે મહારાષ્ટ્રના રસોડા સુધી પહોંચી છે. ઈંધણ અને એલપીજી ગેસની ભારે અછતને કારણે સામાન્ય નાગરિકો અને હોટલ વ્યવસાયીઓની હાલત કફોડી બની છે. ગેસના અભાવે લોકો હવે ઇન્ડક્શન અથવા પરંપરાગત ચૂલાનો ઉપયોગ કરી રહ્યા છે. આ સ્થિતિમાં પશુપાલકો માટે ‘અચ્છે દિન’ આવ્યા છે, કારણ કે અત્યારે બજારમાં ગાય-ભેંસના છાણાની માંગમાં જબરદસ્ત ઉછાળો જોવા મળી રહ્યો છે.જલગાંવ જેવા જિલ્લાઓમાં ગેસ સિલિન્ડરનો પુરવઠો ખોરવાતા લોકોએ છાણાનો સંગ્રહ કરવાનું શરૂ કર્યું છે. જે છાણા અગાઉ કોડી ના ભાવે મળતા હતા, તે હવે 7 થી 10 રૂપિયા નંગના ભાવે વેચાઈ રહ્યા છે. પશુપાલકોના જણાવ્યા મુજબ, હોટલ માલિકો એક દિવસ અગાઉથી જ છાણાનું બુકિંગ કરાવી રહ્યા છે.
સોલાપુરમાં ‘સાંભાર વગરની ઈડલી’ અને મેનૂમાં કાપ
સોલાપુરની પ્રખ્યાત હોટલોની બહાર હવે એવા બોર્ડ જોવા મળી રહ્યા છે કે, “ઈડલી સાથે માત્ર ચટણી મળશે, સાંભાર ખતમ થઈ ગયો છે.” ગેસની તંગીને કારણે હોટલ સંચાલકો સાંભાર જેવી વસ્તુઓ બનાવી શકતા નથી. અહલ્યાનગર અને ઇગતપુરીમાં પણ હોટલ માલિકોએ ઈંટોના ચૂલા બનાવીને રસોઈ કરવાનું શરૂ કર્યું છે. જોકે, ચૂલા પર રસોઈ કરવી મોંઘી પડતી હોવાથી ઘણા હોટલ માલિકોએ મેનૂમાં કાપ મૂક્યો છે તો કેટલાક લોકોએ હોટલ બંધ રાખવાનો નિર્ણય લીધો છે.
મુંબઈની ખાઉ ગલીમાં હાલાકી અને સિલિન્ડરની ચોરી
મુંબઈના છત્રપતિ શિવાજી મહારાજ ટર્મિનસ (CSMT) બહાર આવેલી ખાઉ ગલીમાં દુકાનદારો ઇલેક્ટ્રિક સગડી પર રસોઈ કરવા મજબૂર બન્યા છે. ગ્રાહકોની ભીડ હોવા છતાં ગેસના અભાવે પૂરો ઓર્ડર આપી શકાતો નથી. બીજી તરફ, બુલઢાણાની ટીબી હોસ્પિટલના રસોડામાંથી ભરેલા ગેસ સિલિન્ડરની ચોરી થવાની ઘટના સામે આવી છે. ગેસની અછતનો ફાયદો ઉઠાવીને કેટલાક તત્વો હોસ્પિટલના દરવાજા તોડીને સિલિન્ડર અને ઓક્સિજન પાઈપલાઈન ચોરી ગયા હોવાની ફરિયાદ પોલીસ મથકે નોંધાઈ છે.
આ સમાચાર પણ વાંચો : US Strike on Iran Oil: ખર્ગ આઈલેન્ડ: ઈરાનની શક્તિ કે સૌથી મોટી નબળાઈ? અમેરિકાના નિશાને રહેલા આ ટાપુ પાછળનું અસલી ગણિત જાણો
વરલીમાં ગેસની કાળાબજારી પર તવાઈ
મુંબઈના વરલી વિસ્તારમાં ઘરેલું અને કોમર્શિયલ ગેસ સિલિન્ડરનું ગેરકાયદે વેચાણ કરતી ટોળકીનો પર્દાફાશ થયો છે. પુરવઠા વિભાગે દરોડા પાડીને મોટા પ્રમાણમાં સિલિન્ડર જપ્ત કર્યા છે અને જવાબદારો સામે ગુનો દાખલ કર્યો છે. ગેસની અછતનો લાભ ઉઠાવીને કાળાબજારી કરનારાઓ સક્રિય થયા હોવાથી પ્રશાસન દ્વારા કડક દેખરેખ રાખવામાં આવી રહી છે. ઘણા દુકાનદારો ગેસ ન મળતા કંટાળીને પોતાના વતન પરત જઈ રહ્યા છે.
