ન્યુઝ કન્ટીન્યુઝ બ્યુરો,
મુંબઈ
11 ડિસેમ્બર 2020
આજ સુધી ધરફોડી, દુકાન લૂંટવી, દાગીના ચોરવા જેવા કિસ્સા જોયા છે. પરંતુ કોઈએ હરતું ફરતું શૌચાલય જ ચોર્યું હોય એવું સાંભળ્યું છે!! પૂનામાં 3 થી 4 ડિસેમ્બર દરમિયાન કોઈક અજાણ્યા શખ્સોએ નિગડીના સ્પાઇન રોડ પરથી, પિમ્પરી ચિંચવાડ મ્યુનિસિપલ કોર્પોરેશન (પીસીએમસી) ની મોબાઇલ ટોયલેટ ટ્રોલીની ચોરી કરી લીધી છે.
નિગડી પોલીસ સબ ઇન્સ્પેક્ટર પ્રકાશ લોખંડેએ જણાવ્યું હતું કે, પીસીએમસીના આરોગ્ય વિભાગે નિગડી ઓટા યોજનામાં રહેતા લોકોના લાભાર્થે લગભગ બે વર્ષ પહેલા સ્પાઇન રોડ પર મોબાઇલ શૌચાલય ટ્રોલી ઉભી કરી હતી. "ટ્રોલીમાં 10 ટોઇલેટ કેબિન હતા અને દરેક ટ્રોલીની કિંમત આશરે રૂ .95,000 હતી." ઉલ્લેખનીય છે કે આજ ટ્રોલીના, લોકોએ, અગાઉ કેબિનનાં દરવાજા અને ટ્રોલી ઉપર ચઢવા માટેના લોખંડના પગથીયા પણ ચોરી લીધાં હતાં.
ફરિયાદી આધવે પોલીસને જણાવ્યું હતું કે 3 ડિસેમ્બરે બપોરના 15 કલાકની આસપાસ ટ્રોલી ઓપરેટરે તેની શિફ્ટ ડ્યુટી પૂરી કરી હતી. બીજા દિવસે સવારે 7 વાગ્યાની આસપાસ તે કામ પરત આવ્યો ત્યારે તેણે જોયું કે ટ્રોલી ગુમ થઈ ગઈ હતી.
ટ્રોલીને સ્વચ્છ ભારત અભિયાનના ભાગ રૂપે પીસીએમસી દ્વારા સ્થાપિત કરવામાં આવી હતી. નગરપાલિકા દ્વારા મોબાઇલ ટ્રોલીની શોધખોળ પણ વ્યર્થ સાબિત થઇ રહી છે. હવે પોલીસ આ વિસ્તારમાં સીસીટીવી ફૂટેજ ચકાસી રહી છે. લોખંડેએ જણાવ્યું હતું કે અમે સ્ક્રેપ ડીલરોની પણ તપાસ કરીશું.
