News Continuous Bureau | Mumbai
MumbaiPune Missing Link। મુંબઈપુણે એક્સપ્રેસવે પરનો બહુપ્રતિક્ષિત ‘મિસિંગ લિંક’ પ્રોજેક્ટ ટ્રાફિક માટે ખુલ્લો મુકાયાના માત્ર 48 કલાકની અંદર જ હાઈવે પોલીસે કડક કાર્યવાહી શરૂ કરી દીધી છે. આ આધુનિક એન્જિનિયરિંગના ચમત્કારને જોવા માટે ઉમટેલા પ્રવાસીઓ સુરક્ષાના નિયમો નેવે મૂકીને ટનલ અને પુલ પર ગાડીઓ ઉભી રાખી ફોટો અને રીલ્સ બનાવી રહ્યા છે. ટ્રાફિકમાં અવરોધ અને અકસ્માતનું જોખમ વધતા પોલીસે અત્યાર સુધીમાં અનેક વાહનચાલકો વિરુદ્ધ દંડાત્મક કાર્યવાહી કરી છે.
ગિનીસ બુક ઓફ વર્લ્ડ રેકોર્ડની ભૂરકી અને પ્રવાસીઓનો ઘસારો
ખોપોલીથી કુસગાવ વચ્ચેનો 13.3 કિમીનો આ માર્ગ તેની ભવ્યતાને કારણે ચર્ચામાં છે. અહીં વિશ્વની સૌથી પહોળી ટનલ છે, જેની નોંધ ગિનીસ બુક ઓફ વર્લ્ડ રેકોર્ડ્સમાં થઈ છે. આ ઉપરાંત, અહીં દેશનો સૌથી ઊંચો કેબલ સ્ટેડ બ્રિજ પણ છે. કુદરતી સૌંદર્ય અને આ ભવ્ય રચનાને કારણે પ્રવાસીઓ ગાડીઓ ઉભી રાખીને સેલ્ફી લેવા અને સોશિયલ મીડિયા માટે રીલ્સ બનાવવા લલચાઈ રહ્યા છે, જે અન્ય ઝડપી વાહનો માટે જોખમી સાબિત થઈ રહ્યું છે.
500નો દંડ અને મોટર વ્હીકલ એક્ટ હેઠળ કાર્યવાહી
હાઈવે પોલીસ અધિક્ષક તાનાજી ચિખલેએ જણાવ્યું છે કે આ માર્ગ પર વાહનોની સ્પીડ લિમિટ 80 થી 100 કિમી પ્રતિ કલાકની છે. આવા હાઈ-સ્પીડ કોરિડોર પર વાહન ઉભું રાખવું એ ટ્રાફિકના નિયમોનું ગંભીર ઉલ્લંઘન છે. મોટર વ્હીકલ એક્ટની કલમ 122 અને 177 હેઠળ ખોટી રીતે પાર્કિંગ કરવા બદલ વાહનચાલકો પાસેથી 500નો દંડ વસૂલવામાં આવી રહ્યો છે. શનિવારે જ પોલીસે નિયમ તોડનારા 15 વાહનચાલકો સામે કાર્યવાહી કરી હતી.
આ પ્રવાસન સ્થળ નથી, હાઈવે છે: MSRDC
મહારાષ્ટ્ર સ્ટેટ રોડ ડેવલપમેન્ટ કોર્પોરેશન (MSRDC) એ સ્પષ્ટ કર્યું છે કે મિસિંગ લિંક એ મુંબઈ-પુણે વચ્ચેના મુસાફરીના સમયને ઘટાડવા માટેનું સાધન છે, કોઈ પ્રવાસન સ્થળ નથી. MSRDC ના અધિકારીઓએ પ્રવાસીઓને અપીલ કરી છે કે તેઓ પોતાની અને અન્યોની સુરક્ષા માટે ક્યાંય પણ વાહન ઉભું ન રાખે. આ પ્રોજેક્ટ 7,180 કરોડના ખર્ચે તૈયાર થયો છે અને તેનો મુખ્ય હેતુ ટ્રાફિક જામની સમસ્યા હલ કરવાનો છે, નહીં કે ફોટોગ્રાફી માટેની જગ્યા પૂરી પાડવાનો.
👉 આ સમાચાર વાચો:
Baramati Bypoll Result 2026। બારામતી પેટાચૂંટણીના પ્રથમ વલણો આવ્યા સામે NCP ચીફ સુનેત્રા પવાર આગળ, જાણો શું છે સ્થિતિ
