ન્યુઝ કન્ટીન્યુઝ બ્યુરો,
મુંબઈ
25 નવેમ્બર 2020
બિહાર વિધાનસભાના અધ્યક્ષની ચૂંટણી પૂર્વે ભારતીય જનતા પાર્ટીના નેતા સુશીલ કુમાર મોદીએ એક સનસનીખેજ દાવો કરતા બિહારનું રાજકારણ ગરમાયું છે. બિહારના પૂર્વ ઉપમુખ્યંત્રી સુશીલ કુમાર મોદીએ રાષ્ટ્રીય જનતા દળ (આરજેડી)ના સુપ્રીમો લાલુ પ્રસાદ યાદવ પર જેલમાંથી ભાજપના એમએલએને ફોન કરી પદનું લાલચ આપી ખરીદવાનો આક્ષેપ કર્યો છે. સુશીલ મોદીએ લાલુ પ્રસાદની કથિત ઓડિયો ટેપ પણ જાહેર કરી છે, જેમાં તેઓ ભાજપના ધારાસભ્ય સાથે ફોનમાં વાતચીત કરતા હોવાનું સાંભળવા મળે છે.
આમ લાલુ પ્રસાદ યાદવ પર જેલમાંથી ફોન કરીને બિહારની નીતીશ સરકારને પાડવાનું ષડયંત્ર રચી રહયાનો આરોપ મુકાયો છે. લાલુ યાદવ વિધાયકને લાલચ આપતા સંભળાય છે કે, "અમે લોકો તમને આગળ વધારીશું. કાલે સ્પીકરની ચૂંટણીમાં અમારો સાથ આપશો તો અમે સરકાર પાડી દઈશું અને તમને મંત્રી બનાવીશું. મતદાનમાં એબ્સન્ટ થઈ જાઓ. કહી દેજો કે કોરોના થઈ ગયો હતો."
આમ જેલમાં બેઠાબેઠા પણ લાલુ યાદવ તેજસ્વીને સીએમ બનાવવા થયા સક્રિય થયાં છે અને આ નેતાઓને ફોન કરી સરકાર તોડવાના પ્રયાસ કરી રહયાં હોવાના આરોપ લાગ્યાં છે.
