News Continuous Bureau | Mumbai
BMC Election Twist: મુંબઈ મહાનગરપાલિકા (BMC) ની ચૂંટણીના પરિણામો બાદ હવે મેયર પદની ખુરશી મેળવવા માટે મુંબઈના રાજકારણમાં ભારે ગરમાવો જોવા મળી રહ્યો છે. ભાજપ અને એકનાથ શિંદેની મહાયુતિ પાસે સ્પષ્ટ બહુમતી હોવા છતાં, ઉદ્ધવ ઠાકરેની શિવસેના (UBT) એ મોટો દાવો કરીને ખળભળાટ મચાવી દીધો છે. સાંસદ સંજય રાઉતે સંકેત આપ્યા છે કે વિપક્ષી ગઠબંધન બહુમતીના આંકડાથી માત્ર 6 કદમ દૂર છે અને આગામી દિવસોમાં મોટો ઉલટફેર થઈ શકે છે.227 બેઠકો ધરાવતી દેશની સૌથી ધનિક મ્યુનિસિપલ કોર્પોરેશનમાં મેયર બનવા માટે 114 ના જાદુઈ આંકડાની જરૂર છે. ચૂંટણી પરિણામો મુજબ, ભાજપ 89 બેઠકો સાથે સૌથી પક્ષ મોટો બન્યો છે, જ્યારે એકનાથ શિંદેની શિવસેનાને 29 બેઠકો મળી છે. આમ, મહાયુતિ પાસે કુલ 118 બેઠકો છે, જે બહુમતી કરતા 4 વધુ છે. પરંતુ સંજય રાઉતના નિવેદને સત્તાધારી ગઠબંધનની ચિંતા વધારી દીધી છે.
સંજય રાઉતનો ગણિતનો દાવો: વિપક્ષ પાસે 108 બેઠકો
સંજય રાઉતે પત્રકાર પરિષદમાં જણાવ્યું હતું કે, “અમારી પાસે હાલમાં 108 બેઠકોનું સમર્થન છે. અમારે લક્ષ્ય સુધી પહોંચવા માટે માત્ર 6 વધુ કોર્પોરેટર્સની જરૂર છે. મુંબઈના રાજકારણમાં ક્યારે શું થાય તે કહી શકાય નહીં.” રાઉતના મતે, જો વિપક્ષી ગઠબંધન અન્ય નાના પક્ષો અને નારાજ કોર્પોરેટર્સને પોતાની તરફ ખેંચવામાં સફળ રહે, તો મેયરની ખુરશીઉદ્ધવ જૂથ પાસે જઈ શકે છે.
વિપક્ષી છાવણીમાં બેઠકોનું સમીકરણ
વિપક્ષી ગઠબંધનમાં શિવસેના (UBT) પાસે 65 બેઠકો છે. આ સિવાય, રાજ ઠાકરેની મહારાષ્ટ્ર નવનિર્માણ સેના (MNS) એ પણ ઉદ્ધવ જૂથને ટેકો આપવાના સંકેત આપ્યા છે, જેમની પાસે 6 બેઠકો છે. કોંગ્રેસ અને વંચિત બહુજન આઘાડીના ફાળે 24 બેઠકો આવી છે. જ્યારે AIMIM પાસે 8, સપા પાસે 2 અને શરદ પવારની NCP પાસે 1 બેઠક છે. આ તમામ આંકડાઓને ભેગા કરવામાં આવે તો વિપક્ષ મજબૂત સ્થિતિમાં દેખાય છે.
આ સમાચાર પણ વાંચો : Donald Trump’s Peace Plan: ડોનાલ્ડ ટ્રમ્પની ‘શાંતિ યોજના’માં કાશ્મીરનો ઉલ્લેખ! શું અમેરિકા ભારતની આંતરિક બાબતોમાં દખલ કરશે? જાણો દિલ્હીમાં કેમ મચી છે હલચલ
તાજ લેન્ડ્સ એન્ડ હોટલમાં ‘હોટલ પોલિટિક્સ’ શરૂ
મેયર પદની ચૂંટણી પહેલા ધારાસભ્યો કે કોર્પોરેટર્સ તૂટે નહીં તે માટે એકનાથ શિંદેએ પોતાના વિજેતા ઉમેદવારોને મુંબઈની ‘તાજ લેન્ડ્સ એન્ડ’ હોટલમાં શિફ્ટ કર્યા છે. સંજય રાઉતે આ અંગે કટાક્ષ કરતા કહ્યું કે, શિંદે જૂથને પોતાના જ લોકો પર ભરોસો નથી અને તેઓએ કોર્પોરેટર્સને નજરકેદ રાખ્યા છે. બીજી તરફ, ડેપ્યુટી સીએમ દેવેન્દ્ર ફડણવીસ દાવોસ પ્રવાસેથી પરત ફર્યા બાદ ભાજપ આ મામલે અંતિમ નિર્ણય લે તેવી શક્યતા છે.
