News Continuous Bureau | Mumbai
Iran Protests 2026 ઈરાનમાં સર્વોચ્ચ નેતા અયાતુલ્લા અલી ખામેની સામે જનતાનો રોષ ચરમસીમાએ છે. પશ્ચિમી દેશો દ્વારા લદાયેલા આર્થિક પ્રતિબંધો અને જૂન ૨૦૨૫માં ઈઝરાયેલ સાથે થયેલા સાત દિવસના યુદ્ધને કારણે ઈરાનનું અર્થતંત્ર બરબાદ થઈ ગયું છે. દેશની રાજધાની તેહરાન સહિત અનેક શહેરોમાં વિદ્યાર્થીઓ અને વેપારીઓ ‘ખામેની મુર્દાબાદ’ના નારા લગાવી રહ્યા છે. લોર્દેગાન, કુહદશ્ત અને ઇસ્ફહાન જેવા શહેરોમાં દેખાવકારો અને સુરક્ષા દળો વચ્ચેની અથડામણમાં સાત લોકોએ જીવ ગુમાવ્યા છે.
મોંઘવારી અને આર્થિક પ્રતિબંધોનો માર
ડિસેમ્બર ૨૦૨૫ માં ઈરાનમાં ફુગાવાનો દર (Inflation) વધીને ૪૨.૫% થઈ ગયો છે. અમેરિકાએ ઈરાનના ત્રણ પરમાણુ મથકો પર કરેલા હવાઈ હુમલા અને વ્યાપાર પ્રતિબંધોને કારણે દેશમાં ખાદ્યચીજો અને જીવનજરૂરી વસ્તુઓના ભાવ સામાન્ય માણસની પહોંચ બહાર ગયા છે. આ જ કારણ છે કે હવે જનતા સીધી સત્તાપલટાની માંગ કરી રહી છે.
પેરામિલિટરી યુનિટનો આંદોલનને ટેકો
આ વખતે આંદોલન વધુ ગંભીર બન્યું છે કારણ કે ઈરાનનું ‘બાસજી પેરામિલિટરી યુનિટ’ ખામેની સરકારનો સાથ છોડીને આંદોલનકારીઓ સાથે જોડાઈ ગયું હોવાના અહેવાલ છે. લોર્દેગાન શહેરમાં ઈસ્લામિક રિવોલ્યુશનરી ગાર્ડ્સ (IRGC) અને દેખાવકારો વચ્ચે થયેલી હિંસામાં બે લોકોના મોત થયા છે. સુરક્ષા દળોમાં પડેલા આ ભંગાણને કારણે ખામેની શાસન પર જોખમ વધી ગયું છે.
આ સમાચાર પણ વાંચો : BMC Election 2026: ઠાકરે-મનસે યુતિ અને ભાજપની ઊંઘ હરામ કરનારા બળવાખોરો કોણ? ફોર્મ પાછા ખેંચવાની ડેડલાઈન પહેલાં રાજકીય હલચલ તેજ
રઝા પહલવીના સમર્થનમાં નારા
આશ્ચર્યજનક રીતે, આંદોલન દરમિયાન ૧૯૭૯ની ક્રાંતિ પહેલાના શાહ મોહમ્મદ રઝા પહલવીના પુત્ર રઝા પહલવીના સમર્થનમાં નારા લાગી રહ્યા છે. રઝા પહલવી અત્યારે અમેરિકામાં છે અને તેમણે સોશિયલ મીડિયા પર પોસ્ટ કરીને ઈરાની જનતાને ટેકો જાહેર કર્યો છે. તેમણે કહ્યું છે કે ખામેનીને સત્તા પરથી હટાવ્યા વગર ઈરાનની સ્થિતિ સુધરશે નહીં.
