News Continuous Bureau | Mumbai
Stock Market Opening:અમેરિકા અને ઈરાન વચ્ચે બે અઠવાડિયા માટે થયેલા સીઝફાયરની સીધી અને સકારાત્મક અસર ભારતીય શેરબજાર પર જોવા મળી છે. બુધવારે બજાર ખુલતાની સાથે જ બીએસઈ (BSE) ના 30 શેરો વાળા સેન્સેક્સમાં 2700 પોઈન્ટથી વધુનો ઉછાળો જોવા મળ્યો હતો, જ્યારે એનએસઈ (NSE) નિફ્ટીએ પણ ઓપનિંગમાં જ 800 પોઈન્ટની મજબૂત છલાંગ લગાવી હતી. ગ્લોબલ માર્કેટમાં જોવા મળેલી તેજીના પગલે ભારતીય બજાર માટે પોઝિટિવ સિગ્નલ વહેલી સવારથી જ મળી રહ્યા હતા.બુધવારે કારોબારની શરૂઆત થતા જ બોમ્બે સ્ટોક એક્સચેન્જનો સેન્સેક્સ તેના અગાઉના બંધ 74,616.58 ની સરખામણીએ સીધો 77,290 ના લેવલ પર ખુલ્યો હતો. ગણતરીની સેકન્ડોમાં જ તેની રફ્તાર તેજ બની અને તે 77,392 ના સ્તર પર ટ્રેડ કરતો જોવા મળ્યો હતો. યુદ્ધના વાદળો વિખેરાતા રોકાણકારોમાં ભારે ઉત્સાહ જોવા મળી રહ્યો છે.
નિફ્ટીમાં પણ જોવા મળી તોફાની તેજી
નેશનલ સ્ટોક એક્સચેન્જના નિફ્ટી ઇન્ડેક્સની વાત કરીએ તો, તે તેના અગાઉના બંધ 23,123.65 ની સરખામણીએ જોરદાર ઉછાળા સાથે 23,855 પર ઓપન થયો હતો. સેન્સેક્સની સાથે કદમ મિલાવીને નિફ્ટી પણ એક ઝટકે 800 પોઈન્ટ વધીને 23,938 ના લેવલ પર પહોંચી ગયો હતો. બજારના નિષ્ણાતો માને છે કે ક્રૂડ ઓઈલની કિંમતોમાં ઘટાડો થવાની આશાએ બજારને મોટો ટેકો આપ્યો છે.
આ સમાચાર પણ વાંચો : Kirit Somaiya Office Fire: રાજકીય અદાવત કે પર્સનલ ગુસ્સો? કિરીટ સોમૈયાની ઓફિસની નેમપ્લેટમાં આગ ચાંપનાર યુવકની કુંડળી આવી સામે
હોર્મુઝ સ્ટ્રેટ ખુલવાના સમાચારથી બજાર ગેલમાં
ઈરાને આગામી બે અઠવાડિયા માટે હોર્મુઝ સ્ટ્રેટ ખોલવાની જાહેરાત કરી છે, જેનાથી વૈશ્વિક તેલ પુરવઠો સુચારૂ થવાની આશા જાગી છે. તેલની કિંમતો સ્થિર થવાથી ભારત જેવા આયાતકાર દેશોની અર્થવ્યવસ્થા પર દબાણ ઓછું થશે. આ જ કારણ છે કે બજાર ખુલતાની સાથે જ તમામ સેક્ટરમાં લેવાલી જોવા મળી હતી.
રોકાણકારોની સંપત્તિમાં કરોડોનો વધારો
બજારમાં આવેલા આ તોફાની ઉછાળાને કારણે રોકાણકારોની સંપત્તિમાં મિનિટોમાં જ કરોડો રૂપિયાનો વધારો થયો છે. બેન્કિંગ, આઈટી (IT) અને ઓઈલ એન્ડ ગેસ સેક્ટરના શેરોમાં સૌથી વધુ તેજી જોવા મળી રહી છે. જોકે, નિષ્ણાતો સાવચેત રહેવાની પણ સલાહ આપી રહ્યા છે કારણ કે આ સીઝફાયર અત્યારે માત્ર બે અઠવાડિયા માટે જ છે.
