Mumbai Crime। તિલક રોડ પર પાર્ક કરેલી ગાડીઓમાંથી વેચાતી હતી પ્રતિબંધિત ઈસિગારેટ; BMCએ પાનનો ગલ્લો બુલડોઝર ફેરવી તોડી પાડ્યો

Mumbai Crime। મુંબઈના ઘાટકોપર પૂર્વમાં આવેલા પંત નગર પોલીસ સ્ટેશનની હદમાં પોલીસે એક મોટા ગેરકાયદેસર ઈસિગારેટ (ECigarette) અને ઈમ્પોર્ટેડ (વિદેશી) સિગારેટના રેકેટનો પર્દાફાશ કર્યો છે. તિલક રોડ નજીકથી ચાલતા આ કાળા કારોબારના નેટવર્ક પર પોલીસે ઓચિંતો દરોડો પાડીને મોટી માત્રામાં પ્રતિબંધિત તમાકુ ઉત્પાદનો જપ્ત કર્યા છે. આ સાથે જ બૃહન્મુંબઈ મહાનગરપાલિકા (BMC) દ્વારા કડક પગલાં ભરીને કાયદાનું ઉલ્લંઘન કરનારા સંબંધિત પાનના ગલ્લાને ઘટનાસ્થળે જ જમીનદોસ્ત કરી દેવામાં આવ્યો છે.

પાર્ક કરેલી ગાડીઓને બનાવી દીધી હતી ગુપ્ત ગોડાઉન

પંત નગર પોલીસને ગુપ્ત બાતમી મળી હતી કે ઘાટકોપરના તિલક રોડ વિસ્તારમાં રસ્તા કિનારે કાયમી ધોરણે પાર્ક કરવામાં આવેલી કેટલીક ખાનગી ગાડીઓને ગોડાઉન બનાવીને તેમાંથી પ્રતિબંધિત ઈ-સિગારેટ અને વિદેશી સિગારેટનું ગેરકાયદેસર વેચાણ થઈ રહ્યું છે. આ ચોંકાવનારી બાતમીના આધારે પોલીસે ત્વરિત કાર્યવાહી કરીને આસપાસ ઊભેલી બે શંકાસ્પદ કાર અને નજીકના એક પાનના ગલ્લા પર સામટો દરોડો પાડ્યો હતો. આ સર્ચ ઓપરેશન દરમિયાન પોલીસને બંને કારની ડીકી અને દુકાનમાંથી મોટી માત્રામાં વિદેશી ઈ-સિગારેટનો સ્ટોક મળી આવ્યો હતો. પોલીસે બંને વાહનો સહિત લાખો રૂપિયાનો મુદ્દામાલ જપ્ત કર્યો છે.

મુંબઈ મનપાના N-વોર્ડના અધિકારીઓએ ફેરવ્યું બુલડોઝર

આ ગંભીર મામલે સ્થાનિક જનપ્રતિનિધિઓની હાજરી વચ્ચે બૃહન્મુંબઈ મહાનગરપાલિકા (BMC) ના એન-વોર્ડના અધિકારીઓ અને પોલીસ દ્વારા સંયુક્ત ઓપરેશન હાથ પાડવામાં આવ્યું હતું. નિયમોને નેવે મૂકીને ગેરકાયદેસર રીતે નશાનો વેપાર કરતા આ પાનના ગલ્લા પર પાલિકાની ટીમે તાત્કાલિક બુલડોઝર ફેરવી દીધું હતું અને સમગ્ર ગેરકાયદેસર બાંધકામને તોડી પાડ્યું હતું. પાલિકાની આ આક્રમક કાર્યવાહીથી વિસ્તારના અન્ય ગેરકાયદે વેપારીઓમાં ફફડાટ વ્યાપી ગયો છે.

કોટપા (COTPA) અને પ્રતિબંધ અધિનિયમ હેઠળ ગુનો દાખલ

પંત નગર પોલીસે આ મામલે સંબંધિત નશાના કારોબારીઓ વિરૂદ્ધ ‘ઈ-સિગારેટ પ્રતિબંધ અધિનિયમ’ (E-Cigarette Prohibition Act) અને કોટપા (COTPA) ની વિવિધ કડક કલમો હેઠળ ગુનો નોંધી કાયદેસરની કાર્યવાહી શરૂ કરી છે. પોલીસ હવે એ દિશામાં ઊંડી તપાસ કરી રહી છે કે આ વિદેશી અને પ્રતિબંધિત સિગારેટનો મોટો જથ્થો મુંબઈમાં કયા માર્ગેથી સપ્લાય કરવામાં આવતો હતો અને આ આંતરરાજ્ય રેકેટમાં અન્ય કેટલા મોટા માથાઓ સામેલ છે. હાલમાં દેશભરમાં તેલ સંકટ, નીટ પેપર લીક અને હવામાનના બદલાવ વચ્ચે મુંબઈ પોલીસની આ સ્થાનિક મોટી કાર્યવાહી ચર્ચાનો વિષય બની છે.

👉 આ સમાચાર વાચો:
Fatima Sana Fastest T20I Fifty 15 Balls। ક્રિકેટમાં બન્યો નવો વર્લ્ડ રેકોર્ડ પાકિસ્તાની કેપ્ટને માત્ર આટલી જ બોલમાં ફટકારી દીધી સૌથી ફાસ્ટેસ્ટ ફિફ્ટી