News Continuous Bureau | Mumbai

Mumbai Hit and run :મુંબઈના બાંદ્રા વિસ્તારમાં શુક્રવારે રાત્રે થયેલા હિટ એન્ડ રન અકસ્માતે ફરી એકવાર શહેરને હચમચાવી દીધું છે. શહેરના બાંદ્રા વિસ્તારમાં એક ગમખ્વાર  અકસ્માતમાં 25 વર્ષની મોડલે જીવ ગુમાવ્યો હતો, જ્યારે તેની એક મિત્ર ઘાયલ થયો હતો આ અકસ્માત ત્યારે થયો જ્યારે મોડલ તેના મિત્ર સાથે બાઇક પર નીકળી હતી. પોલીસ ટેન્કર ચાલકને શોધવા માટે વિસ્તારમાં લગાવેલા સીસીટીવી ફૂટેજને સ્કેન કરી રહી છે. 

Mumbai Hit and run :પાણીના ટેન્કરે તેની બાઇકને ટક્કર મારી

મીડિયા રિપોર્ટ મુજબ આ ઘટના રાત્રે 8 વાગ્યાની આસપાસ ડૉ. બાબાસાહેબ આંબેડકર રોડ પર બની હતી, જ્યારે યુવતી અને તેનો મિત્ર મોટરસાઇકલ પર બાંદ્રા તરફ જઈ રહ્યા હતા. પોલીસના જણાવ્યા પ્રમાણે, એક ઝડપભેર પાણીના ટેન્કરે તેની બાઇકને ટક્કર મારી હતી. ટક્કર એટલી જોરદાર હતી કે યુવતી વાહનમાંથી કૂદીને સીધી ટેન્કરના પૈડા નીચે આવી ગઈ. તેને ગંભીર ઈજાઓ થઈ, અને તેને તાત્કાલિક નજીકની ભાભા હોસ્પિટલમાં લઈ જવામાં આવી જ્યાં ડૉક્ટરોએ તેને મૃત જાહેર કરી.

Mumbai Hit and run :અકસ્માત બાદ ટેન્કર ચાલક ફરાર

અકસ્માત સર્જી ટેન્કર ચાલક ઘટનાસ્થળેથી ફરાર થઈ ગયો હતો. બાંદ્રા પોલીસે અજાણ્યા આરોપી વિરુદ્ધ કેસ નોંધ્યો છે અને તેને શોધવા માટે વિસ્તારના સીસીટીવી ફૂટેજની શોધ કરવામાં આવી રહી છે. પોલીસનું કહેવું છે કે આરોપી ડ્રાઈવરની ઓળખ થતાં જ કડક કાર્યવાહી કરવામાં આવશે. યુવતી મલાડમાં રહેતી હતી અને વ્યવસાયે મોડલ હતી. આ અકસ્માતથી તેના પરિવારજનો અને મિત્રોમાં ઘેરા શોકની લાગણી છવાઈ ગઈ છે.

આ સમાચાર પણ વાંચો:  Mumbai Local mega block : મુંબઈમાં રવિવારે મેગા બ્લોક, સેન્ટ્રલ અને હાર્બર લાઇનની લોકલ ટ્રેન સેવાઓ થશે પ્રભાવિત; ચેક કરો શેડ્યુલ..

Mumbai Hit and run : મુંબઈમાં વધી રહ્યા છે હિટ એન્ડ રનના કેસ

મુંબઈમાં હિટ એન્ડ રનની ઘટનાઓ સતત વધી રહી છે. તાજેતરના સમયમાં આવા ઘણા કિસ્સાઓ પ્રકાશમાં આવ્યા છે, જે શહેરમાં માર્ગ સલામતી અંગે ચિંતા પેદા કરી રહ્યા છે. પોલીસે લોકોને માર્ગના નિયમોનું પાલન કરવા અને અકસ્માત થતાં તરત જ પોલીસનો સંપર્ક કરવા અપીલ કરી છે. આ કિસ્સાએ ફરી એકવાર માર્ગ સલામતી અને ટ્રાફિક નિયમોના કડક પાલનની જરૂરિયાતને ઉજાગર કરી છે.