News Continuous Bureau | Mumbai
Thackeray Brothers Reunion: મુંબઈ મહાનગરપાલિકાની ચૂંટણીના રસાકસીભર્યા પરિણામો બાદ હવે મહારાષ્ટ્રના રાજકારણમાં સૌથી મોટી હલચલ જોવા મળી રહી છે. શિવસેના (UBT) પ્રમુખ ઉદ્ધવ ઠાકરે અને મહારાષ્ટ્ર નવનિર્માણ સેનાના (MNS) અધ્યક્ષ રાજ ઠાકરે ફરી એકવાર એક જ મંચ પર જોવા મળશે. આગામી 23 જાન્યુઆરીએ શિવસેના પ્રમુખ સ્વ. બાળાસાહેબ ઠાકરેની જન્મશતાબ્દી વર્ષની ઉજવણી નિમિત્તે બંને ભાઈઓ એકસાથે જાહેર કાર્યક્રમમાં હાજરી આપશે. શિવસેના (UBT) ના સાંસદ સંજય રાઉતે પુષ્ટિ કરી છે કે માટુંગાના ષણ્મુખાનંદ હોલ ખાતે આ વિશેષ કાર્યક્રમનું આયોજન કરવામાં આવ્યું છે. મુંબઈ મહાનગરપાલિકાની ચૂંટણીમાં જોકે બંને પક્ષોને ધાર્યું પરિણામ મળ્યું નથી, પરંતુ ચૂંટણી દરમિયાન જોવા મળેલી ઠાકરે બંધુઓની આ યુતિની ચર્ચા સમગ્ર રાજ્યમાં થઈ રહી છે.
માટુંગાના મંચ પરથી ગુંજશે ઠાકરે બ્રાન્ડ
23 જાન્યુઆરીના રોજ આયોજિત આ કાર્યક્રમ માત્ર સ્મૃતિઓનો જ નહીં, પરંતુ વિચારોનો પણ હશે. સંજય રાઉતે જણાવ્યું કે આ એક ઐતિહાસિક ક્ષણ હશે જ્યારે મહારાષ્ટ્રના બે પ્રભાવશાળી નેતાઓ અને ભાઈઓ એકસાથે આવશે. બીએમસી ચૂંટણીના પરિણામો અને મુંબઈના ભાવિ મુદ્દે બંને નેતાઓ આ મંચ પરથી શું બોલશે, તેના પર સૌની નજર છે.
આ સમાચાર પણ વાંચો : Donald Trump Air Force One: દુનિયાના સૌથી સુરક્ષિત વિમાનમાં ‘ગાબડું’! ટ્રમ્પના એર ફોર્સ વન ફેઈલ થતા ખળભળાટ; દાવોસ પહોંચતા પહેલા જ અધવચ્ચે અટક્યા રાષ્ટ્રપતિ
બિહાર ભવન મુદ્દે રાજકીય ગરમાવો
એક તરફ ઠાકરે બંધુઓ નજીક આવી રહ્યા છે, ત્યારે બીજી તરફ મુંબઈમાં ‘બિહાર ભવન’ અને ‘ઝારખંડ ભવન’ બનાવવાનો મુદ્દો ગરમાયો છે. મનસેએ મુંબઈમાં બિહાર ભવનનો વિરોધ કરવાની જાહેરાત કરી છે. આ મુદ્દે કેન્દ્રીય મંત્રી રામદાસ આઠવલેએ રાજ ઠાકરેની ટીકા કરતા કહ્યું કે, મનસેની આ ભૂમિકા બંધારણ વિરોધી છે. મુંબઈમાં અન્ય રાજ્યોના ભવનનો વિરોધ કરવો એ લોકશાહીની વિરુદ્ધ હોવાનું આઠવલેએ જણાવ્યું છે.
ચૂંટણીમાં ઠાકરે યુતિનો પ્રભાવ
ભલે આ વખતે બીએમસીમાં સત્તા મેળવવામાં ઠાકરે બંધુઓ સફળ રહ્યા નથી, પરંતુ તેમના એકસાથે આવવાથી ભાજપ અને શિંદે જૂથ માટે પડકારો વધ્યા છે. ખાસ કરીને મરાઠી મતોના વિભાજનને રોકવા માટે ઉદ્ધવ અને રાજ ઠાકરેની આ નવી રણનીતિ ભવિષ્યમાં રાજ્યના રાજકારણની દિશા બદલી શકે છે. 23 જાન્યુઆરીનો આ કાર્યક્રમ નવી રાજકીય યુતિના મંડાણ પણ હોઈ શકે છે.
