News Continuous Bureau | Mumbai

Bandra Murder:મુંબઈના પોશ ગણાતા બાંદ્રા પૂર્વ વિસ્તારમાં એક હૃદયદ્રાવક હત્યાની ઘટના બની છે. ખેરવાડીમાં આવેલી મ્હાડા ઓફિસની બિલકુલ સામે જ એક 56 વર્ષીય સિક્યુરિટી ગાર્ડની છરીના ઘા ઝીંકીને નિર્મમ હત્યા કરવામાં આવી છે. પોલીસની પ્રાથમિક તપાસમાં આ હત્યા માત્ર મોબાઈલ ફોન પર વાત કરવા જેવી અત્યંત સામાન્ય બાબતના વિવાદમાં થઈ હોવાનું બહાર આવ્યું છે, જેનાથી સમગ્ર વિસ્તારમાં સનસનાટી મચી ગઈ છે.

ડ્યુટી પર તૈનાત ગાર્ડ પર અચાનક કરાયો જીવલેણ હુમલો

પ્રાપ્ત વિગતો મુજબ, મૃતક સુરક્ષા રક્ષક એક ખાનગી કંપનીમાં ફરજ બજાવતા હતા. જ્યારે તેઓ પોતાની ડ્યુટી પર તૈનાત હતા, ત્યારે એક શખ્સે તેમની પાસે આવીને વિવાદ શરૂ કર્યો હતો. જોતજોતામાં મામલો એટલો બિચક્યો કે આરોપીએ પોતાની પાસે રહેલી છરી કાઢી સુરક્ષા રક્ષક પર તૂટી પડ્યો હતો. હુમલાખોરે ગળા અને હાથના ભાગે એટલા ગંભીર ઘા ઝીંક્યા હતા કે સુરક્ષા રક્ષકને સંભાળવાની તક પણ મળી ન હતી અને તેમનું ઘટનાસ્થળે જ પ્રાણપંખેરુ ઊડી ગયું હતું.

આ સમાચાર પણ વાંચો : Fraud in Mumbai:મુંબઈમાં નૌકાદળના નકલી અધિકારીનો આતંક: ફોર્ટના વેપારી સાથે ₹4.44 લાખની ઠગાઈ, યુનિફોર્મ પહેરીને આવ્યો હતો ગઠિયો

માત્ર ફોન ન ઉપાડ્યો હોવાના ગુસ્સામાં આરોપીએ હત્યા કરી

પોલીસ સૂત્રોના જણાવ્યા અનુસાર, આ હત્યા પાછળ કોઈ મોટી જૂની અદાવત નહીં પણ નજીવો ઝઘડો કારણભૂત હોવાની આશંકા છે. પ્રાથમિક માહિતી મુજબ, હુમલાખોરે સુરક્ષા રક્ષકને ફોન કર્યો હતો, પરંતુ તેમણે કોઈ કારણસર ફોન ઉપાડ્યો ન હતો અથવા યોગ્ય જવાબ આપ્યો ન હતો. આ નાની એવી બાબતથી ઉશ્કેરાઈને આરોપીએ પોતાનો પિત્તો ગુમાવ્યો હતો અને ઘાતકી પગલું ભરીને નિર્દોષ સુરક્ષા રક્ષકની હત્યા કરી નાખી હતી.

 ખેરવાડી પોલીસે સીસીટીવી ફૂટેજના આધારે તપાસ તેજ કરી

ઘટનાની જાણ થતા જ ખેરવાડી પોલીસનો કાફલો ઘટનાસ્થળે પહોંચી ગયો હતો. પોલીસે મ્હાડા ઓફિસ અને આસપાસના સીસીટીવી ફૂટેજની તપાસ હાથ ધરી છે, જેમાં આરોપીની ઓળખ કરી લેવામાં આવી હોવાનું જાણવા મળે છે. હાલ આરોપીને ઝડપી પાડવા માટે પોલીસે અલગ-અલગ ટીમો બનાવી છે અને વિવિધ સ્થળોએ દરોડા પાડવામાં આવી રહ્યા છે. પોલીસે મૃતદેહને પોસ્ટમોર્ટમ માટે મોકલીને હત્યાનો ગુનો નોંધી વધુ કાયદેસરની કાર્યવાહી હાથ ધરી છે.