News Continuous Bureau | Mumbai
Chocolate Theft in Borivali: મુંબઈના બોરીવલી પશ્ચિમ વિસ્તારમાં આવેલી એક સુપર માર્કેટમાંથી હજારો રૂપિયાની ચોકલેટની ચોરી કરવાનો અજીબોગરીબ પ્રયાસ નિષ્ફળ ગયો છે. સુપર માર્કેટમાં ત્રાટકેલી ત્રણ શખ્સોની ટોળકી પૈકી 19 વર્ષીય એક યુવકને દુકાનદારે હિંમત બતાવી રંગેહાથ પકડી પાડ્યો હતો. આ તસ્કરોએ દુકાનમાંથી અંદાજે ₹12,000ની કિંમતની પ્રીમિયમ ચોકલેટો ચોરીને ભાગવાનો પ્રયાસ કર્યો હતો.
CCTV ફૂટેજમાં કેદ થઈ તસ્કરોની શંકાસ્પદ હિલચાલ
પ્રાપ્ત વિગતો અનુસાર, વહેલી સવારે જ્યારે સુપર માર્કેટમાં ત્રણ શંકાસ્પદ શખ્સો હિલચાલ કરી રહ્યા હતા, ત્યારે દુકાનદારની નજર સીસીટીવી (CCTV) સ્ક્રીન પર પડી હતી. ચોરીના ઈરાદે આવેલા આ શખ્સો ગલ્લાને બદલે કિંમતી ચોકલેટોના બોક્સ ભેગા કરી રહ્યા હોવાનું દેખાતા દુકાનદાર સતર્ક થઈ ગયા હતા. તસ્કરો જેવી ચોકલેટો ભરીને દુકાનની બહાર નીકળવા ગયા કે તરત જ દુકાનદારે તેમને પકડવા માટે દોટ મૂકી હતી.
આ સમાચાર પણ વાંચો : Tension in Worli: ડીજે મ્યુઝિક વગાડવા બાબતે પોલીસ સાથે ઘર્ષણ: રોષે ભરાયેલા કાર્યકરોએ વરલીમાં રસ્તા રોકીને ચક્કાજામ સર્જ્યો
દુકાનદારે પીછો કરીને એક આરોપીને દબોચ્યો
ચોરીની ઘટનાનો અહેસાસ થતા જ દુકાનદાર તાત્કાલિક બહાર દોડી આવ્યા હતા અને ભાગવાનો પ્રયાસ કરી રહેલા તસ્કરોનો પીછો કર્યો હતો. આ ઝપાઝપી દરમિયાન 19 વર્ષીય એક યુવક દુકાનદારના હાથે ઝડપાઈ ગયો હતો, જ્યારે તેના અન્ય બે સાથીદારો અંધારાનો લાભ લઈને નાસી છૂટવામાં સફળ રહ્યા હતા. પકડાયેલા યુવક પાસેથી ચોરી કરેલો તમામ માલ એટલે કે ₹12,000ની ચોકલેટો રિકવર કરવામાં આવી છે.
બોરીવલી પોલીસે અન્ય બે ફરાર આરોપીઓની તપાસ તેજ કરી
ઘટનાની જાણ થતા જ બોરીવલી પોલીસ ઘટનાસ્થળે પહોંચી હતી અને ઝડપાયેલા યુવકને પોતાની કસ્ટડીમાં લીધો હતો. પોલીસે ચોરીની કિંમતી ચોકલેટો જપ્ત કરી છે અને ફરાર થઈ ગયેલા અન્ય બે આરોપીઓને પકડવા માટે સીસીટીવી ફૂટેજની મદદથી તપાસ તેજ કરી છે. પોલીસ તપાસમાં એ જાણવાનો પ્રયાસ કરવામાં આવી રહ્યો છે કે આ ટોળકી અન્ય કોઈ વિસ્તારમાં કે સુપર માર્કેટમાં અગાઉ આવી કોઈ ચોરીની ઘટનામાં સામેલ છે કે કેમ.
