News Continuous Bureau | Mumbai
IranUS War| ઈરાન અને અમેરિકા વચ્ચે ચાલી રહેલા યુદ્ધે હવે એક નવો અને ભયાનક વળાંક લીધો છે. અત્યાર સુધી હોર્મુઝ સ્ટ્રેટ માત્ર તેલ અને જહાજોની અવરજવર માટે વ્યૂહાત્મક માર્ગ માનવામાં આવતો હતો, પરંતુ હવે સમુદ્રના પેટાળમાં બિછાવેલી ઈન્ટરનેટ કેબલ પર મોટો ખતરો તોળાઈ રહ્યો છે. ઈરાની મીડિયાના અહેવાલ મુજબ, આ સંવેદનશીલ ડેટા કેબલ્સને જો નુકસાન પહોંચાડવામાં આવે, તો ખાડીના દેશોમાં મોટા પાયે ઈન્ટરનેટ સેવાઓ બંધ થઈ શકે છે.
ડિજિટલ લાઈફલાઈન પર સંકટ
હોર્મુઝ સ્ટ્રેટમાંથી FALCON, AAE-1, TGN-Gulf અને SEA-ME-WE જેવી મહત્વપૂર્ણ સબમરીન કેબલ સિસ્ટમ્સ પસાર થાય છે. આ કેબલ યુએઈ, કતાર, બહેરીન, કુવૈત અને સાઉદી અરેબિયા જેવા દેશો માટે ઈન્ટરનેટ, બેંકિંગ, ક્લાઉડ સર્વિસ અને સંચારની મુખ્ય ધરી છે. આ તમામ કેબલ એક જ સાંકડા વિસ્તારમાંથી પસાર થતા હોવાથી જોખમ અનેકગણું વધી જાય છે. જો આ કેબલને કોઈ રીતે નુકસાન પહોંચે, તો આ દેશોની આર્થિક ગતિવિધિઓ અને રોજિંદું જીવન સંપૂર્ણપણે ઠપ્પ થઈ શકે છે.
શું છે ભૂતકાળનો અનુભવ?
આ ખતરો માત્ર અનુમાન નથી. ૨૦૨૪ અને ૨૦૨૫ માં રેડ સીમાં સબમરીન કેબલને થયેલા નુકસાનને કારણે ઈન્ટરનેટની ગતિ ખૂબ જ ધીમી થઈ ગઈ હતી અને સેવાઓ ખોરવાઈ ગઈ હતી. તે સમયે આ કેબલને રિપેર કરવામાં મહિનાઓનો સમય લાગ્યો હતો કારણ કે તે વિસ્તારમાં કામ કરવું અત્યંત જોખમી હતું. હુથી વિદ્રોહીઓ દ્વારા પણ ભૂતકાળમાં આવી માળખાકીય સુવિધાઓને નિશાન બનાવવામાં આવી છે, જેનાથી હવે આંતરરાષ્ટ્રીય સ્તરે ચિંતા વ્યાપી છે કે ભવિષ્યમાં ઈન્ટરનેટ કેબલ્સ પણ યુદ્ધનું હથિયાર બની શકે છે.
ડિજિટલ યુદ્ધની આશંકા
ખાડીના દેશોમાં ખાસ કરીને યુએઈ અને બહેરીનમાં ડેટા સેન્ટર્સ એક જ સ્થળે કેન્દ્રિત છે, જે તેને સરળ નિશાન બનાવે છે. અહેવાલો મુજબ, ઈરાની ડ્રોન હુમલાઓમાં એવા ઠેકાણાઓને નિશાન બનાવવામાં આવ્યા છે જે ક્લાઉડ સેવાઓ સાથે જોડાયેલા હતા. આ ઘટનાઓ સંકેત આપે છે કે હવે ડિજિટલ માળખું પણ યુદ્ધનો એક ભાગ બની રહ્યું છે. નિષ્ણાતો માને છે કે સમુદ્રની અંદર રહેલા કેબલની સુરક્ષા કરવી અત્યંત મુશ્કેલ છે, અને આ પ્રકારના ‘ડેટા વોર’ ની શક્યતા વૈશ્વિક અર્થતંત્ર માટે ગંભીર ખતરો છે.
👉 આ સમાચાર વાચો:
US Navy Secretary| અમેરિકામાં સત્તાપલટો હોર્મુઝ સંકટ વચ્ચે નેવી સેક્રેટરી જોન ફેલેનનું રાજીનામું.
