News Continuous Bureau | Mumbai
Marine Drive Accident| મુંબઈના મરીન ડ્રાઈવ વિસ્તારમાં સોમવારે વહેલી સવારે એક અત્યંત દુઃખદ અને માર્ગ અકસ્માતની ઘટના સામે આવી છે. મોર્નિંગ વોક પર નીકળેલા એક વૃદ્ધને બે પૂરપાટ ઝડપે આવી રહેલી બાઈકચાલકોએ અડફેટે લેતા ગંભીર અકસ્માત સર્જાયો હતો. આ ઘટનામાં વૃદ્ધ અને બાઈક પર સવાર યુવકયુવતી મળીને કુલ ત્રણ લોકોના કરુણ મોત નિપજ્યા છે.
અકસ્માતની ઘટના કેવી રીતે બની?
પોલીસના જણાવ્યા અનુસાર, સોમવારે સવારે લગભગ પોણા છ વાગ્યાના સુમારે ગિરગામ વિસ્તારના એક વૃદ્ધ દરરોજની જેમ મરીન ડ્રાઈવ પર મોર્નિંગ વોક માટે ગયા હતા. તે જ સમયે, બે બાઈક પર સવાર યુવક-યુવતી પૂરપાટ ઝડપે ત્યાંથી પસાર થઈ રહ્યા હતા. બંને બાઈકની ગતિ એટલી વધારે હતી કે ચાલકો વૃદ્ધને ટક્કર માર્યા બાદ નિયંત્રણ ગુમાવી બેઠા હતા, જેના કારણે બંને બાઈક પર સવાર યુવક-યુવતી પણ નીચે પટકાયા હતા. આ અકસ્માત એટલો ભીષણ હતો કે બાઈકના પાર્ટ્સ પણ છૂટા પડી ગયા હતા.
તાત્કાલિક સારવાર છતાં ત્રણેયના મોત
અકસ્માતની જાણ થતા જ પોલીસની ટીમ તાત્કાલિક ઘટનાસ્થળે દોડી આવી હતી. ગંભીર રીતે ઘાયલ થયેલા ત્રણેય વ્યક્તિઓને તુરંત જ નજીકની જીટી (GT) હોસ્પિટલમાં ખસેડવામાં આવ્યા હતા. જોકે, સારવાર દરમિયાન તબીબોએ ત્રણેયને મૃત જાહેર કર્યા હતા. હાલ પોલીસ મૃતકોની ઓળખ કરવાની પ્રક્રિયા કરી રહી છે અને તેમના પરિવારજનોનો સંપર્ક સાધી રહી છે.
રેસ કે બેદરકારી? પોલીસની તપાસ શરૂ
મરીન ડ્રાઈવ પોલીસ હવે આ અકસ્માતના મૂળ કારણોની તપાસ કરી રહી છે. પ્રાથમિક તપાસમાં એવી શંકા સેવાઈ રહી છે કે બાઈક સવાર રાત્રે ‘નાઈટ આઉટ’ કરીને ઘરે પરત ફરી રહ્યા હતા અને કદાચ બંને વચ્ચે રોડ પર ‘રેસ’ લાગી હતી. બાઈકની અત્યંત ઝડપ અને અકસ્માતની ભીષણતા જોતા પોલીસે આ દિશામાં પણ તપાસ શરૂ કરી છે કે આ અકસ્માત રેસિંગના કારણે થયો હતો કે માત્ર ડ્રાઈવરની બેદરકારીને કારણે.
👉 આ સમાચાર વાચો:
Stock Market Today| બજારમાં તેજીની લહેર! સેન્સેક્સ ૭૭,૦૦૦ ને પાર, સન ફાર્માના શેરમાં થયો તોફાની ઉછાળો
