News Continuous Bureau | Mumbai
Donald Trump। અમેરિકા અને ઈરાન વચ્ચે ચાલી રહેલું વાકયુદ્ધ હવે વધુ ઉગ્ર બની રહ્યું છે. અમેરિકી રાષ્ટ્રપતિ ડોનાલ્ડ ટ્રમ્પે ઈરાન દ્વારા મોકલવામાં આવેલા શાંતિ પ્રસ્તાવને ફગાવી દીધો છે. ટ્રમ્પે સ્પષ્ટ કર્યું છે કે તેઓ હોર્મુઝ સ્ટ્રેટ પરની નાકાબંધી હટાવવાના મૂડમાં નથી. આ દરમિયાન ટ્રમ્પે ઈરાન માટે જે શબ્દોનો પ્રયોગ કર્યો છે તેનાથી ઈરાનનો ગુસ્સો સાતમા આસમાને પહોંચી શકે છે.
“બોમ્બમારો કરવા કરતા નાકાબંધી વધુ અસરકારક” – ટ્રમ્પ
‘એક્સિયોસ’ ને આપેલા એક ઇન્ટરવ્યુમાં ડોનાલ્ડ ટ્રમ્પે ઈરાન વિરુદ્ધ સીધી સૈન્ય કાર્યવાહી કરવાને બદલે આર્થિક અને દરિયાઈ નાકાબંધીનો બચાવ કર્યો હતો. તેમણે કહ્યું કે, “આ નાકાબંધી બોમ્બમારો કરવા કરતા ક્યાંય વધુ અસરકારક છે. ઈરાનીઓ અત્યારે ‘સ્ટફ્ડ પિગ’ (ભરેલા ભૂંડ) ની જેમ ગૂંગળાઈ રહ્યા છે. તેમની હાલત હજુ વધુ ખરાબ થવાની છે, તેઓ પરમાણુ હથિયાર રાખી શકે નહીં.” ટ્રમ્પનું આ નિવેદન ઈરાન માટે અત્યંત અપમાનજનક માનવામાં આવી રહ્યું છે.
શરતો પર અડગ અમેરિકા
ઈરાને પાકિસ્તાન દ્વારા મધ્યસ્થી કરાવીને તબક્કાવાર રીતે મામલો ઉકેલવાનો પ્રસ્તાવ મૂક્યો હતો, જેમાં પહેલા હોર્મુઝ સ્ટ્રેટ ખોલવાની વાત હતી. જોકે, ટ્રમ્પ પોતાની શરતો પર અડગ છે. તેમનું કહેવું છે કે જ્યાં સુધી ઈરાન પોતાનો પરમાણુ કાર્યક્રમ સંપૂર્ણપણે બંધ નહીં કરે, ત્યાં સુધી આ પાબંદીઓ હટાવવામાં આવશે નહીં, ઉલટાનું તેને વધુ કડક બનાવવામાં આવશે. ટ્રમ્પના મતે આ નાકાબંધી ઈરાનને વાટાઘાટોના ટેબલ પર લાવવા માટેનું સૌથી મોટું હથિયાર છે.
ઈરાન અને અમેરિકા વચ્ચે મડાગાંઠ
હાલમાં બંને દેશો વચ્ચે ‘પહેલા કોણ’ ની સ્થિતિ સર્જાઈ છે. તેહરાન (ઈરાન) ની માંગ છે કે પહેલા વેપારી માર્ગો ખોલવામાં આવે અને પરમાણુ મુદ્દે પછીથી ચર્ચા કરવામાં આવશે. બીજી તરફ, વોશિંગ્ટન (અમેરિકા) એ શરત મૂકી છે કે પહેલા પરમાણુ કાર્યક્રમ પર પૂર્ણવિરામ મૂકો, તો જ વેપારી માર્ગો ખુલશે. ટ્રમ્પના આકરા વલણને કારણે હવે શાંતિ મંત્રણાના તમામ રસ્તાઓ લગભગ બંધ થતા દેખાઈ રહ્યા છે.
👉 આ સમાચાર વાચો:
Pune Gas Leak। પુણેમાં મોડી રાત્રે કેમિકલ ફેક્ટરીમાં ગેસ લીક 24 લોકોને શ્વાસ લેવામાં તકલીફ, લોકોએ ઘરની બહાર વિતાવી રાત
