News Continuous Bureau | Mumbai
Mumbai Indians IPL 2026। આઈપીએલ 2026માં પાંચ વખતની ચેમ્પિયન મુંબઈ ઈન્ડિયન્સની હાલત અત્યંત દયનીય જોવા મળી રહી છે. એક તરફ હાર્દિક પંડ્યાની કેપ્ટનશીપ સતત વિવાદોમાં છે, તો બીજી તરફ ટીમના સૌથી ભરોસાપાત્ર ગણાતા ખેલાડી સૂર્યકુમાર યાદવની નિષ્ફળતાએ ફ્રેન્ચાઈઝીની ચિંતામાં મોટો વધારો કર્યો છે. મુંબઈ ઈન્ડિયન્સે સૂર્યાને આ સીઝન માટે 16.35 કરોડ રૂપિયા જેવી માતબર રકમ આપીને રિટેન કર્યો હતો, પરંતુ મેદાન પર તેની અસર શૂન્ય દેખાઈ રહી છે.
આંકડામાં સૂર્યાનું કંગાળ પ્રદર્શન
આઈપીએલ 2026માં અત્યાર સુધી રમાયેલી 8 મેચોમાં સૂર્યકુમાર યાદવે માત્ર 19.88ની સરેરાશથી 159 રન બનાવ્યા છે. આ આંકડા તેના કદ અને કિંમતની સરખામણીએ ખૂબ જ ઓછા છે. ઉલ્લેખનીય છે કે સૂર્યાએ કોલકાતા નાઈટ રાઈડર્સ સામે સીઝનની પહેલી જ મેચમાં અડધી સદી ફટકારી હતી, પરંતુ તે પછીની મેચોમાં તે રન બનાવવા માટે સંઘર્ષ કરતો જોવા મળ્યો છે.
મુંબઈ ઈન્ડિયન્સનો મજબૂત સ્તંભ હવે નબળો પડ્યો
સોશિયલ મીડિયા પર ચાહકો હવે એવો સવાલ પૂછી રહ્યા છે કે મુંબઈ ઈન્ડિયન્સને આટલો મોટો ‘ચૂનો’ કોણ લગાવી રહ્યું છે? સૂર્યકુમાર યાદવ જે અગાઉ મુંબઈની બેટિંગનો મુખ્ય આધારસ્તંભ ગણાતો હતો, તે હવે ટીમના પતનનું કારણ બની રહ્યો હોય તેમ લાગે છે. ટીમના પિલર સમાન આ ખેલાડીના નબળા ફોર્મને કારણે મુંબઈ ઈન્ડિયન્સ પોઈન્ટ ટેબલમાં સૌથી નીચેના સ્થાને પહોંચી ગઈ છે.
હાર્દિક પંડ્યા અને ટીમ મેનેજમેન્ટની મુશ્કેલીઓ
કેપ્ટન હાર્દિક પંડ્યા પહેલાથી જ ટ્રોલિંગનો સામનો કરી રહ્યો છે, ત્યારે સૂર્યાની નિષ્ફળતાએ બળતામાં ઘી હોમવાનું કામ કર્યું છે. જો મુંબઈને પ્લેઓફની રેસમાં ટકી રહેવું હોય તો સૂર્યાએ તાત્કાલિક ફોર્મમાં આવવું પડશે. જો આગામી મેચોમાં પણ આવું જ પ્રદર્શન ચાલુ રહ્યું, તો 16.35 કરોડનું આ રોકાણ મુંબઈ ઈન્ડિયન્સ માટે સૌથી મોટો ફ્લોપ સોદો સાબિત થઈ શકે છે.
👉 આ સમાચાર વાચો:
Elon Musk AI Warning। OpenAI પર એલોન મસ્કનો પ્રહાર ‘ચેરિટી ચોરી’ કરવાનો આરોપ લગાવતા કોર્ટમાં આપી AI થી માનવજાતને ખતરાની ગંભીર ચેતવણી
