News Continuous Bureau | Mumbai
Kharghar Tragedy। નવી મુંબઈના ખારઘર વિસ્તારમાં એક ગમખ્વાર અકસ્માત સર્જાયો હતો, જેમાં ૨૮ વર્ષીય આશાસ્પદ વકીલનું કમકમાટીભર્યું મોત નીપજ્યું છે. પૂરઝડપે આવી રહેલા કાટમાળ ભરેલા ડમ્પરે મોટરસાઈકલને અડફેટે લેતા આ દુર્ઘટના બની હતી. આ ઘટનાને પગલે સ્થાનિક રહીશો અને મૃતકના પરિવારે રસ્તા પર ઉતરી આવી વિરોધ પ્રદર્શન કરતા કલાકો સુધી ટ્રાફિક જામની સ્થિતિ સર્જાઈ હતી.
બ્લાઈન્ડ સ્પોટમાં આવતા ડમ્પરનું ટાયર ફરી વળ્યું
મૃતક યુવક ખારઘર સેક્ટર-૧૨નો રહેવાસી હતો. તે તેના મિત્ર સાથે મોટરસાઈકલ પર ઘરે પરત ફરી રહ્યો હતો ત્યારે સીબીડી બેલાપુરથી સેન્ટ્રલ પાર્ક તરફ જતા રોડ પર આ અકસ્માત નડ્યો હતો. પ્રત્યક્ષદર્શીઓના જણાવ્યા મુજબ, યુવક ડમ્પરના ‘બ્લાઈન્ડ સ્પોટ’માં આવી ગયો હતો અને ડમ્પરનું પાછળનું ટાયર તેના પર ફરી વળતા તેનું ઘટનાસ્થળે જ મોત નીપજ્યું હતું. જોકે, બાઈક પર પાછળ બેઠેલો તેનો મિત્ર બીજી તરફ ફંગોળાઈ જતાં તેનો ચમત્કારિક બચાવ થયો હતો.
લોકોનો આક્રોશ અને ચક્કાજામ
અકસ્માત સર્જ્યા બાદ ડમ્પર ચાલક વાહન મૂકીને ઘટનાસ્થળેથી નાસી છૂટ્યો હતો. અકસ્માતની જાણ થતા જ આસપાસના લોકોના ટોળા ઉમટી પડ્યા હતા. રોષે ભરાયેલા પરિવારે અને સ્થાનિકોએ રસ્તો બ્લોક કરી દીધો હતો અને આરોપી ચાલકની તાત્કાલિક ધરપકડ કરી કડક કાર્યવાહી કરવાની માંગ કરી હતી. પરિસ્થિતિ વણસતા ખારઘર પોલીસ અને રાયોટ કંટ્રોલ ફોર્સના જવાનોને શાંતિ જાળવવા તૈનાત કરવામાં આવ્યા હતા.
પોલીસ તપાસ અને કાર્યવાહી
ખારઘર પોલીસે ફરાર ડમ્પર ચાલક વિરુદ્ધ ગુનો નોંધી તેને પકડવા માટે તપાસના ચક્રો ગતિમાન કર્યા છે. પોલીસ હાલ આસપાસના સીસીટીવી ફૂટેજ ચકાસી રહી છે જેથી આરોપીનું પગેરું મેળવી શકાય. ખારઘર વિસ્તારમાં બાંધકામના ડમ્પરોની બેફામ સ્પીડ અવારનવાર જીવલેણ સાબિત થતી હોવાથી સ્થાનિકોએ વહીવટીતંત્ર સામે ભારે નારાજગી વ્યક્ત કરી છે.
👉 આ સમાચાર વાચો:
Navi Mumbai Cable Theft Scam 200 Crore। નવી મુંબઈમાં ૨૦૦ કરોડનું કેબલ ચોરી કૌભાંડ બેનકાબ તુર્ભેના જંગલમાં મધ્યરાત્રિએ પોલીસના દરોડા, ૩૫ની ધરપકડ
