News Continuous Bureau | Mumbai
Energy Security| વૈશ્વિક સ્તરે ‘સ્ટ્રેટ ઓફ હોર્મુઝ’ (Strait of Hormuz) માં વધતા તણાવ અને સપ્લાય ચેઈનમાં આવતા અવરોધોને જોતા ભારત સરકારે પોતાની ઊર્જા સુરક્ષા મજબૂત કરવા માટે એક અત્યંત મહત્વાકાંક્ષી યોજના પર કામ તેજ કર્યું છે. ભારત હવે ખાડી દેશોમાંથી ગેસનો અવિરત પુરવઠો સુનિશ્ચિત કરવા માટે અરબ સાગરના તળિયેથી સીધી પાઇપલાઇન બિછાવવાની તૈયારી કરી રહ્યું છે. આ પાઇપલાઇન કાર્યરત થયા પછી ભારતને હોર્મુઝ જેવા સંવેદનશીલ દરિયાઈ માર્ગો પર નિર્ભર રહેવું પડશે નહીં.
MEIDP પ્રોજેક્ટ: વિશ્વની સૌથી ઊંડી દરિયાઈ પાઇપલાઇન
પેટ્રોલિયમ મંત્રાલયના જણાવ્યા અનુસાર, આ ‘મિડલ ઇસ્ટ-ઈન્ડિયા ડીપ-વોટર પાઇપલાઇન’ (MEIDP) ની અંદાજિત કિંમત લગભગ 40,000 કરોડ રૂપિયા છે. આ પાઇપલાઇન ઓમાનને સીધું ગુજરાતના દરિયાકાંઠા સાથે જોડશે. જેની લંબાઈ 2,000 કિમી હશે અને તે સમુદ્રમાં 3,450 મીટરની ઊંડાઈએ બિછાવવામાં આવશે, જે તેને વિશ્વની સૌથી ઊંડી દરિયાઈ પાઇપલાઇન બનાવશે. તેના દ્વારા દરરોજ અંદાજે 31 મિલિયન સ્ટાન્ડર્ડ ક્યુબિક મીટર કુદરતી ગેસની સપ્લાય થઈ શકશે.
હોર્મુઝ સંકટ અને વધતી જતી ગેસની માંગ
ભારતની કુદરતી ગેસની માંગ 2030 સુધીમાં વધીને 290-300 મિલિયન સ્ટાન્ડર્ડ ક્યુબિક મીટર થવાનો અંદાજ છે. હાલમાં ભારતની કુલ જરૂરિયાતનો મોટો હિસ્સો હોર્મુઝની ખાડીમાંથી પસાર થાય છે, જે ઈરાન-અમેરિકા સંઘર્ષને કારણે વારંવાર જોખમમાં મુકાય છે. આ પાઇપલાઇનથી ભારતને મોંઘા ‘સ્પૉટ માર્કેટ’ પર નિર્ભર રહેવાને બદલે સ્થિર અને સસ્તો ગેસ મળશે. અત્યારે ભારત પાસે ગેસનો વ્યૂહાત્મક ભંડાર માત્ર 10-12 દિવસનો જ છે, જે ચીનની સરખામણીએ ઘણો ઓછો છે.
ભવિષ્યમાં અન્ય ખાડી દેશો સાથે જોડાણ
આ પ્રોજેક્ટ માત્ર ઓમાન પૂરતો મર્યાદિત નહીં રહે, પરંતુ ભવિષ્યમાં યુએઈ (UAE), સાઉદી અરેબિયા, ઈરાન અને કતાર જેવા દેશોને પણ આ નેટવર્ક સાથે જોડી શકાશે. ‘ધ સાઉથ એશિયા ગેસ એન્ટરપ્રાઇઝ’ (SAGE) દ્વારા કરવામાં આવેલા અભ્યાસ મુજબ, નવી ટેકનોલોજી દ્વારા ઊંડા સમુદ્રમાં પાઇપલાઇન નાખવી અને તેનું સમારકામ હવે શક્ય બન્યું છે. ગેસ ઓથોરિટી ઓફ ઈન્ડિયા (GAIL) અને ઈન્ડિયન ઓઈલ (IOC) જેવી કંપનીઓને આ અંગે વિગતવાર રિપોર્ટ તૈયાર કરવા સૂચના આપવામાં આવી છે.
👉 આ સમાચાર વાચો:
MHADA Mumbai Lottery 2026। મુંબઈમાં મ્હાડા લોટરીની મુદત ફરી વધી; 610 ઘરોની કિંમતમાં 7.5 ટકાનો ઘટાડો, ઘાટકોપરબાંદ્રા માં મળશે હકનું ઘર
