News Continuous Bureau | Mumbai
PM Modi UAE Visit| મિડલ ઈસ્ટમાં ઈઝરાયેલ, અમેરિકા અને ઈરાન વચ્ચે વધી રહેલા તણાવ અને દરિયાઈ માર્ગો (Shipping Lanes) પરના જોખમ વચ્ચે વડાપ્રધાન નરેન્દ્ર મોદી આજે સંયુક્ત આરબ અમીરાત (UAE) ના મહત્વપૂર્ણ પ્રવાસે પહોંચી રહ્યા છે. ભારત તેની જરૂરિયાતનું ૮૫% ક્રૂડ ઓઈલ આ વિસ્તારમાંથી આયાત કરે છે, ત્યારે રશિયાના તેલ પર ફરીથી લાગનારા પ્રતિબંધો અને મોંઘવારીના ‘ચોતરફી એટેક’ વચ્ચે આ મુલાકાત ભારત માટે ગેમચેન્જર સાબિત થઈ શકે છે.
ઉર્જા સુરક્ષા અને તેલ ભંડાર પર રહેશે નજર
વડાપ્રધાન મોદી અબુધાબીમાં UAE ના રાષ્ટ્રપતિ શેખ મોહમ્મદ બિન જાયદ અલ નાહયાન સાથે મુલાકાત કરશે. આ બેઠકમાં મુખ્ય એજન્ડા કાચા તેલ અને LNG નો લાંબા ગાળાનો પુરવઠો સુનિશ્ચિત કરવાનો રહેશે. ભારત પાસે હાલમાં ૫.૩૩ મિલિયન મેટ્રિક ટન ક્ષમતાના ત્રણ વ્યૂહાત્મક તેલ ભંડાર છે. એક્સપર્ટ્સના મતે, ભારત હવે UAE સાથે મળીને આ ભંડારની ક્ષમતા વધારવા અને સપ્લાય ચેઈન ખોરવાય તો પણ તેલનો જથ્થો મળતો રહે તેવા લવચીક કરારો (Resilient Terms) પર ભાર મૂકશે.
૪૫ લાખ ભારતીયો અને રેમિટન્સનું મહત્વ
UAE ભારત માટે માત્ર તેલનો સ્ત્રોત નથી, પણ તે ૪૫ લાખથી વધુ ભારતીયોનું ઘર પણ છે. આ આરબ દેશમાંથી ભારતને સૌથી વધુ રેમિટન્સ (વિદેશથી મોકલાતા નાણાં) મળે છે. મિડલ ઈસ્ટમાં અસ્થિરતાની સીધી અસર આ ભારતીય પરિવારો અને ભારતના વિદેશી મુદ્રા ભંડાર પર પડે છે. રેઝર કેપિટલના મેનેજિંગ પાર્ટનર અભિનવ મુંશીના જણાવ્યા અનુસાર, UAE હવે ભારતનો માત્ર સપ્લાયર નથી પણ એક સાચો ‘એનર્જી પાર્ટનર’ બની ગયો છે, જેણે ભારતના તેલ ભંડારમાં પોતાની ભાગીદારી વધારીને ૧૦% કરી દીધી છે.
આર્થિક ભાગીદારી અને ૨૦૦ અબજ ડોલરનો લક્ષ્યાંક
ભારત અને UAE વચ્ચે ૨૦૨૨માં થયેલા CEPA (વ્યાપક આર્થિક ભાગીદારી કરાર) બાદ દ્વિપક્ષીય વેપારમાં મોટો ઉછાળો આવ્યો છે. UAE ભારતનો ત્રીજો સૌથી મોટો વેપાર ભાગીદાર છે અને આગામી વર્ષોમાં વેપારનો લક્ષ્યાંક ૨૦૦ અબજ ડોલર સુધી પહોંચાડવાનો છે. જાન્યુઆરીમાં થયેલા ૩ અબજ ડોલરના LNG કરારને આ મુલાકાત દરમિયાન આગળ વધારવામાં આવી શકે છે. ખાસ કરીને જ્યારે રશિયા પાસેથી તેલ મેળવવામાં મુશ્કેલી પડી શકે તેમ છે (૧૬ મેથી પ્રતિબંધોની શક્યતા), ત્યારે UAE એક વિશ્વસનીય વૈકલ્પિક આયાતકાર તરીકે ઉભરી આવ્યું છે.
👉 આ સમાચાર વાચો:
Stock Market Today| શેરબજારમાં જબરદસ્ત જોશ સેન્સેક્સનિફ્ટીમાં તેજીથી રોકાણકારો ગદગદ, આ સેક્ટરના શેરો રોકેટ બન્યા
